Day 14 癡呆在海邊(馬耳他Sliema)

(Day 14) 2008-10-16

住宿 ：Gorgianis Hotel

行程 ：St.Greoge Bay --> Sliema --> St.Greoge Bay

尋晚唔知係咪飲左D酒關係,11點上床,典到成半夜2點仲眼光光...

早上瞓到0800又好自然醒左,個肚又呼喚我食早餐啦~ 同尋日一樣,擦完牙去街口間酒店包埋既餐廳食早餐,食完返酒店擦完牙再瞓過!

一瞓又瞓到1300起床,又擦牙... 真係一日都唔知擦幾多次牙呀!!!

咁近沙灘只係晚晚去曬月光,諗住今日一於去曬吓太陽,點知天公不造美,陰天無太陽,不過都去海灘既沙灘椅灘吓啦! 到後來仲毛毛雨tim~

落雨就緊係搵個室內地方啦! 於是去左商場2/F一間叫Gusto Café食個Tea先~

Cheese Lover wrop€4.1

Cola€1.3

個侍應又係叫Milly,佢係美國人,一邊打工一邊遊世界... 我唔想咩! 但唔捨得放棄薪金唔錯既工作嘛...(對於讀書唔成既我來講)

間餐廳又有free Wifi,記住08年Wifi唔係有左好耐,但當地Wifi已經幾common啦! 香港直至今時今日既2012年都仲未普及有free wifi ! 淨係講最大連鎖既老麥都灰到爆啦!!!

係有Wifi既餐廳一玩msn又玩左個幾鐘(雖然酒店都有),玩到部電話都無晒電,於是返酒店差電,同諗吓今日餘吓既時間去邊度先~

於是就求其選定一處地方,就搭巴士前往~

Sliema位於海邊,有一條長長闊闊既海濱長廊,與對岸既首都Valletta遙遙相對,可以從海上既角度睇清楚城牆,不禁令人諗起以前打仗時,係一個多麼的堅固既小島國,而我覺得這裡是欣賞Valletta最靚既地點~

行到Sliema海濱長廓買左張Post card,搵張長櫈對住個海寫;今個旅程開始,我先寫post card咋,不過我寫都係要睇mood既,一定要搵左自己覺得有feel既環境先去寫~

寫完Post card就行落海邊,去到伸延至好出既岩石坐低欣賞個地中海,聽聽海浪聲~ 其實此時太陽已經下山了,坐多一陣個海已經漆黑一片,咁樣就係度痴呆左一粒鍾啦~ 正想起身走人之際,漆黑大海既盡頭,慢慢升起一個金黃色,好大既發光物體! 原來係月光呀~ 超靚! 原本諗住走都再留下來,欣賞多陣從海升上來的月亮~ 一呆又大半個鐘啦!!! 就係咁,係呢個海邊一hea就hea左半日啦~

沿海濱長廊漫步去St.Julian Bay,其實海濱長廊有好多食市,價錢都好合理,但尋晚決定左今晚食飯嘛~ 於是去一間叫”YIU”既中餐館,點左個海南雞飯+菜湯+可樂

其實菜湯只不過係有D青豆同蘿蔔粒既味噌湯而已,而海南雞飯也只是雞絲煲仔飯,雖然有D欺騙成份,但係久未聞過飯香既我,食得津津有味,一粒都無剩呀!

€9.55

返到去St.Greoge Bay諗住又去我最鍾意既沙灘坐陣,點知今晚鬼咁多人,都係早唞吧! 不過早極都要12點~