住宿 :Hostal Backpacker $ 40 Real ($240-HKD)
行程 :Foz do Iguacu(巴西) —> Puerto Iguazu(阿根廷)
世界三大瀑布之一既伊瓜蘇瀑布，橫跨阿根廷同巴西兩國，尋日去完巴西果邊，今日就去埋阿根廷呢邊睇吓有乜野唔同先!
起身先係Hostal食早餐，之後就搭車去阿根廷果邊； 個巴士站唔係總站裡面，而係總站既外圍，上車前先示意要辦出入境手續，佢先會係邊境停車架，因為有好多係當地人唔使落車嘛~
去到邊境就落車過巴西關，佢問我係咪即日來回，我話 yes 佢就放行，Passport都無蓋印，可能即日來回呱! 不過阿根廷果邊就有蓋印噃!
排隊巴西離境然後等下一班車
阿根廷呢面既伊瓜蘇勁掠水呀!!! 諗住咁大個國家公園會有ATM啦! 點知係無! 連Credit card都無得碌! 身上就只有巴西同烏拉圭錢… 找換店又無… 唯一既辦法就係要係間便利店買滿 $30 阿根廷peso先可以換錢(即$60-HKD)
咁既價錢只可以買到，兩枝可樂同一杯雪糕咋!! 貴到呢⋯ 我見到有好多既遊客係同一遭遇!
入場費 $100 Real ($ 500-HKD)
入閘前先攞免費地圖，然後先搽上太陽油，因為大陽極為猛烈，入場無耐先經過一個博物館，館內有伊瓜蘇動植物，部落等既簡介。
離博物館不遠有小火車，可載遊客去不同景點，我就先坐去尾站，先睇下阿根廷呢面既賣點，Garganta del Diablo(惡魔之喉)
相比巴西那邊，我個人認為這裡比較吸引，因為呢個伊瓜蘇瀑布，大部份係阿根廷呢面，所以可以好近距離接觸，而且園內景點同設施都比較多元化!
當坐小火車係尾站落車時，已經聽到隆隆聲，就像遠處有龍吟虎嘯! 沿住木橋行到觀景台，就係惡魔之喉所在地，眼前所見就好似細時睇”龍珠”咁，一個龜波氣功打左落地球深處一樣呀!!! 好似全地球既水都就快比佢吸晒咁呀!!!
睇完惡魔之喉，就去下一個景點，係瀑布下面距離瀑布最近既San Martin島勒! 去呢個島必定要去到瀑布既下面，有免費小船橫越瀑布運載乘客，不過服務時間去到1530… 已經過晒鐘喇! 極之失望…
由於阿根廷呢邊瀑布係森林裡面，沿途步行可以見到不同既動物，如大咀烏, 狸貓等…
玩完都天黑lu… 返到巴西都2100啦! 之前据扒果間餐廳今日星期日應該無開，再行前D搵到間更草根既餐廳，有6樣餸同白飯，但只可攞一次，$5-Real = $25-HKD
我就傻仔以為任食，食左兩次要比$10 Real… 不過真係好飽呀! 係巴西成日都有”飽飯”食架~ 好滿足~
銀仔:
回覆刪除1) 如我在巴西過境,即在foz do iguazu市中心搭local bus(ttu) 去阿根廷巴士總站 ,是否在總站下車, then 辦好出境巴西手續 , 之後在同一位置等下班巴士, 便是去阿根廷瀑布 ??
其實好多blog話好易,但聽落我覺得好似好複雜, 故想問清楚.
2) 你在烏拉圭被搶一劫,取回護照都已經好好啦,否則去補領更麻煩. 如我只得一個女子,比你地更驚慌 , 你地已經好勇敢囉 ! 我都打算一人去南美,但時間唔多,得一個月,可能只去阿根廷及到巴西瀑布一遊. 聽見你們在烏拉圭遭遇, 都有 d 擔心.
謝分享 ! mandy0110
[版主回覆01/07/2013 18:53:15]1)攪離境果度係中途站黎架,唔係總站,上車時同司機單聲就得,跟住搭下一班車~
2)呵~ 果次都算好彩,不過我都帶多本特區護照防身,如BNO唔見都可以嘗試吓; 一個人都無乜野好怕丫,我都時不時一個人去,而且日本同歐美都成日一個女仔去旅行,只要小心應該無問題的~