Day 16 明知山有虎(巴拉圭東方市)

(Day 16) 2011-02-21

住宿 :Centro Hotel $ 110000 Par ($180-HKD)

行程 :Foz do Iguacu(巴西) —> Ciudad Del Este(巴拉圭) —> Asuncion(巴拉圭)

揭開地圖，去完伊瓜蘇瀑布，下一站主要目的地係玻利維亞； 成日都有個構思，就係穿越巴拉圭再入阿根廷北部，如果淨睇地圖咁樣比較直接快捷，不過呢條路線我差不多見唔到有人去，連Lonely Planet都話，係巴拉圭見背包客比見到美洲豹更為罕有! 所以資料少之有少…

巴拉圭係南美最貧窮國家之一，當比人老笠後，同當地人打聽有關巴拉圭既情報，個個都話當地好危險，就算佢係當地人都比人老笠!!! 仲勸我地唔好去…

真係咁危險? 見過鬼我都唔怕黑？ 就算係龍潭虎穴都一定要試一試!

因為LP講，玻利維亞同秘魯治安仲恐怖呀! 而且呢兩個國家仲係今個旅程重點所在! 如果咁驚? 迷度度都唔使去?

係B&B食完早餐，見仲有麵包剩，我地總共包左4個芝腿包拎走，咁既包係街頭賣$3-Real一個($15-HKD) 即係攞走$60-HKD既野啦! 呢D包用黎作上路糧食架~

由於伊瓜蘇就正正係巴拉圭、巴西同阿根廷三國既邊境，所以係巴西呢面既伊瓜蘇都有好多車去巴拉圭既； 係巴士總站旁有個巴士站，D最殘最舊既巴士，就係去巴拉圭邊境城市，被喻為巴拉圭最危險既”東方市”喇! (Ciudad Del Este)

巴士開到連接兩國既”友誼橋”，巴西呢面既邊境落車辨離境手續，不過全車就只得我地兩人落車咋!!! 其他唔使落車應該係當地人!

辦完離境，就必需通過呢條長長既橋，先可以過對岸既巴拉圭! 呢條橋連Lonely Planet都極不建議步行過橋! 因為經常有遊客比人老笠! 但又唔想等咁耐巴士，又見個個當地人都咁行，一於行過去!

其實當踏上這條爛橋，遠望到巴拉圭既境況，有一種好似從文明回到落後既感覺...

條橋下面係隔住兩國既河流，我地慢慢步行，看唔見有任何遊客； 用左約15分鐘，係極度提高警覺下抵達對岸! Yeah~~~ 安全到步~~~