Day 14 失身記(巴西伊瓜蘇瀑布)

(Day 14) 2011-02-19

住宿:Hostal Backpacker $ 40 Real ($240-HKD)
行程: Proto Alegre —> Foz do Iguacu

Proto Alegre —> Foz do Iguacu，呢程夜車要 $115 Real ($570-HKD)； 坐左十幾個鐘頭車，係中午到達Foz do Iguacu，根據out date 既LP，搵到其中一間既住宿，竟然貴左一倍呀! 要成USD $80… 緊係無住啦!

離開呢間酒店去到街口，有一個職員係烈日當空下，專係對我地呢D搵住宿既遊客協助架，向我們介紹幾間平價住宿後，佢不問回報就走左lu~ 都幾好人噃~

於是去到介紹既一間叫Hostal Backparker $40 Real一晚，有Free Wifi，我地共住兩晚，放低行李即時沖涼，因為成兩日無沖涼啦!!!

有泳池架~

沖完涼就即時出發，去睇全球三大瀑布之一既伊瓜蘇瀑布勒! 睇瀑布前先醫吓肚先~ 去左街角既一間餐廳，食牛扒Buffet $6 Real； 牛扒就唔可以添食，D菜, 沙律, 飯就無限添食~ 到幾抵，可以好飽!

食飽後去返巴士總站，搭巴士去睇瀑布，巴士行到中途，烏雲蓋頂，下起傾盆大雨來… 一個小時車程終於到達，仍然落到好似倒屎咁!

唯有好似D遊客咁，用$4 Real買件有Iguacu Logo既雨褸啦… 然後再係ATM draw 埋錢比入場費，入場費 $37.7 Real(二百零蚊港幣)，入場後先有旅遊巴送你一程，係巴士上已經停雨Lu…(全程無著過件雨褸)，巴士送你到步行徑既起點，呢個起點已經見到澎湃既伊瓜蘇瀑布啦!

88蝶, 南美獨有品種~

步行徑用木造既棧道，由高處既起點往下行，行到尾段可以同瀑布有個親密接觸，就係要失身比伊瓜蘇瀑布勒! 係濕身至真~呢段路你可以選擇行定唔行，唔係必經既!我當然選擇左行啦~ 仲係裡面見到彩虹tim!!! 冒著壞機既危險影左幾張相…

最後坐旅遊巴離開時，仲比一大群狸貓攔路tim~