Day 4 初到南美(阿根廷布宜諾斯艾利斯)

(Day 4) 2011-02-09
住宿 :Hostal Carly $ 90 peso
行程 :阿姆斯特丹巴黎—>布宜諾斯艾里斯

尋晚班機有勁多baby呀! 雖然成晚都有baby不停喊既聲音，但都尚算好瞓~
今次KLM呢班機終於有夜機裝備提供啦~(唔知係迷唔重視我地亞洲航線呢？)
晨咁早起身去廁所見到D乘客，係廁所隔離個儲物間”食自助餐” 我當然都唔執輸啦! 仲有Haagen-Dazs tim~

到達布宜諾斯機場，即時感到一股夏天既氣息
(可能係嚴冬既北半球比較o瓜)

機場內既找換店匯率極差，根據LP講，去左係機場角落一間唔起眼既銀行Banco De La Nacion，匯率合理$1 USD=$4 peso

初到南美洲，有著無比既興奮，當出到機場既一刻，不禁要親吻這片從未踏足既土地呀!!!

換完錢就要搵交通工具去市中心，機場當然有特快直通巴士啦! 而價錢亦都成正比! 行到內陸機Terminal B旁，有一個公共巴士站，雞同鴨講詢問之下原來只收coins，當然又要入銀行換錢啦… 公巴 $2 peso! 價錢相比機場特快巴士便宜十陪!!!

坐平價巴士去市中心需時一小時，巴士上既阿根廷人有強烈既讓座意識，近車頭既門口位一定係女人坐先! 男人？有位先有得坐… 我見到D婆婆上車，當然唔讓都唔得啦…

跟據loney planet係San Talmo區，搵左間Hostal $90 peso(HKD $180)，比書中講既貴… 因為呢本LP係2008年出版，Out晒date lu…

San Talmo區有個出名既街邊市集，買賣二手用品和手工藝品，市集旁有露天茶座，正正就係Hostal斜對面~

事不而遲，即時動身去La Boca! La Boca呢個馬勒當拿成名既貧民窟，去之前當然提高戒備，畢竟係第一次去到被世人渲染成治安惡劣既南美，而且仲要係貧民區既La Boca tim!

其實最La Boca最主要既遊客區，係一條色彩繽紛既大街，係呢條大街大把歐美遊客，拎住貴價相機遊覽，要搶都唔會搶我啦! 突然感到好安全呀! 仲見到唔少講普通話既遊客tim~ 唔知係內地同胞定係台灣人呢???

大街內建築物色彩繽紛，外牆噴滿塗鴉，底衫褲用繩繫於兩間屋之間曬涼，極富貧民區色彩呀~ 而且不時見到有Tango街頭表演~

黃昏時我地就揀左間餐廳据扒，呢間餐廳對正對面有Tango表演既餐廳，可以邊食邊欣賞~
來到阿根廷，我五臟廟既最大心願，就係一餐出名而又價錢合理既阿根廷牛扒勒!

食完牛扒襯天未黑，去參觀吓有流氓球場之稱既小保加主場，雖然無賽事，無得睇波，係外圍參觀吓都好格! 球場外圍係藍黃既主場色彩，十分殘舊，加上座落貧民區，果有強烈既流氓感覺呀!!!

由於球場遍離遊客區，無賽事時真係靜得可憐呀...