2016年9月27日 星期二

Day 20(下) 大地任我行之-美男廚房(納米比亞Outjo)

(Day 20)(下) 2015-9-30
住宿:Buschfeld Rest Camp
行程:Dlvundu —> Rundu —> Otavi
 —> Outjo

行車里數:730km


Otavi
駛到近Etosha National Park,網上中文叫埃托沙國家公園。租車公司職員極力推薦我地開車進入該國家公園,可能我們早前已經參加了Safari,動物也看夠,而且要追行程,所以過門不入,希望把握時間探索其他名不經傳嘅地方吧。
這國家公園嘅東部路經不少城鎮,去到一個叫Otavi 小鎮,感覺幾荒涼,並將車停底看看地圖。為何有車上有GPS唔睇要睇真正地圖?我這旅程的主題為橫渡非洲,所以目的地是西岸的大西洋。不過我於GPS set求其一個西岸地點叫Henties Bay時,聰明的GPS就教我行國家中間的大公路。B8公路經過Otavi小鎮後,便會轉向南、直達首都,跟住要兜好遠路才能到達。於是仔細看地圖,發現還有一條C39支線繼續向西。喺呢個時候,竟然由港女先提議,行這條支線繼續旅程。喺小鎮搵了好耐,問人後發現一條極度荒蕪、沙塵滾滾嘅碎石路。再三問港女會不會後悔後,便「有好路唔行行爛路」繼續行程。由於駕駛的正是一輛四驅車,我也毫不擔心。由呢一刻開始,不相信GPS,不理會什麼路,想行就行,真正天大地大任我行!車上播放著陳奕迅首《任我行》,揸車都十分暢快~
我也無諗過,港女竟然會毫不猶豫作出這冒險的決定。因為咁荒蕪崎嶇嘅路況存在好多不明朗的因素,唔通佢已經跟我一段時間,被同化了?


日落西山,下午5:40才正式進入這條C線道路行駛,起初路旁兩邊圍了圍欄,內裡一望無際、十分荒涼,看似是牧場。開了一段後,車上的GPS才顯示呢條路。後來開了車成大半小時,都未見有任何車輛駛過,個心都有一點點慌架。不過另一方面想,眼前身處嘅地方,只得我跟港女,彷彿「這個世界只得我倆」一樣呀!
沿碎石路行駛期間,車尾揚起大量沙塵,好似玩緊越野賽車咁。操控方面就好似喺雪地駕駛,容易滑軚甩尾,尤其是轉彎時,所以要加倍小心。
於納米比亞嘅碎石路上開車,就算是一條不見盡頭的大直路,都不知點解會高低起伏、一個又一個嘅小山丘咁。如開得太快會四個轆堅離地,車就會boom一聲落地。以我個人經驗嚟講,都係小心駕駛為上。如小山丘後轉彎,便有機會滑軚而炒車;另於山路上行走更加不敢設想,隨時因山丘後彎位跌落山崖而一命嗚呼。奉勸大家,小心駕駛,安全到埗!


沿這條荒涼嘅C39公路開車開到日落西山,不時看到非洲珍珠雞、羚羊,可惜羚羊實在閃得太快,駕車其間不能拍下。而好耐都無見過類似蟻丘嘅巨型昆蟲巢穴,亦於這段路兩旁經常出現,現在自駕遊終於可以落車作近距離觀察了。




看看GPS應該差不多到達前方的小鎮。再行駛一會,太陽完全沒落在大地裡。此時天已剛剛黑齊,天上壯麗嘅銀河出現,而遠方已看到小鎮的些微燈火。我地將露營車泊在路邊,但不關車燈,怕有車將我們撞到。跟住拿出相機腳架,拍攝壯麗銀河,想用架車來做襯托,不過與銀河方位不太配合,而車尾燈也影響了張照片。。。 算吧,影了幾張便用肉眼來欣賞。其實拍攝期間,有一個當地人於漆黑中推著單車前進,當時四野無人呼天不應,我們亦有所防範,不知是否歹人(港女按:其實有無人知道呢句嘅出處,係取自銀仔最愛嘅名著)。這人跟我之前所遇嘅當地人一樣,只是say Hi便繼續前行。我們心想他不知還要走多久才能到達。


拍攝完銀河,朝燈光方向前方的Outjo進發,黑麻麻都咪話唔驚! 最後總共開了2.5小時車,終於走完這條碎石路。期間遇過嘅車,五隻手指數得晒,見得最多嘅係非洲珍珠雞。有時都無理會是否超速,如喺咁荒蕪嘅都有警察工作,捉到我都心甘情願啦!
沿這條C線行駛,於一些不顯眼的路口,也看到地圖所講的D線,看來當地用英文字母區分公路的等級。我整個自駕旅程只行過B及C嘅公路咋。(港女按:地圖顯示D級路面路況比較差,而且唔擔保途中會唔會被地主或其他原因截斷,所以唔清楚就不宜亂入。)



Outjo
到達Outjo,沿道路尋找住宿。於路旁看見了有住宿路牌,便決定入住。這裡叫Buschfeld Rest Camp的住宿,看似家庭經營,招待我地嘅係一個白人老伯,仲有佢隻狗。露營車的營地內早已有幾部車停泊,隔離車位是兩個年約六、七十歲的伯伯,他們正在燒烤,並飲得醉醺醺。看看吧,又有老人家玩露營車啦!

由於天色已晚,急不及待打開露營車,並由我主持烹飪節目【美男廚房】。
今晚我親自下廚,用我最拿手的煮法「炒」,可能炒餸唔需要太花巧~ 港女一直都好鍾意食我炒嘅餸架~ 新買嘅平底鑊今晚終於用得著! 今晚為大家介紹嘅係一味「野外甜椒炒牛肉」。買材料時,外國超市通常只有免治牛肉及牛排,唯有選擇牛排。先將牛排切片,由於材料所限,只用油鹽醃一會,並將甜椒切成條狀。準備好食材,便用蒜頭爆香個鑊。燒紅個鑊落牛肉,大火兜幾下便取出,再落甜椒炒。炒到差不多熟,就將剛才牛肉回鑊,攪掂!由切菜開始,只用了十多分鐘就煮好,好有滿足感呀。真係「男人識煮飯,女人有排嘆」~ 港女煲水煮玉米糊,加少少鹽調味,就成了今晚的晚餐~ 
回想我第一次下廚,就係喺玻利維亞的的喀喀湖,當時只是批薯仔都批左成個鐘啦⋯ 之後媽媽迫我自立,便死死氣自學煮飯。累積多年經驗後,已可弄些簡單小菜,今次露營車更大派用場!

切切切~~~

炒炒炒~~~

嘩~~~

晚間氣溫實在太凍,稍為清潔碗碟,就去共用浴室沖涼,好在都有熱水。沖涼時帶備晒禦寒衣物,一沖完就著晒上身。跟住匿入露營車,等頭髮乾埋就瞓覺lu。

今日又創紀錄,行駛了730km,看來已追回耽誤了的路程。



經過這兩日瘋狂駕駛後,目標就快完成啦!!!




15 則留言:

  1. 銀河真係好靚,在營地果邊睇唔睇到?
    唔駛要識煮九大簋,但基本識煮幾味都幾重要,要畀個讚給銀哥....
    好快行程進入最後階段,完成這壯舉實在開心難忘

    回覆刪除
    回覆
    1. 營地位置睇到,但較為多樹範圍又窄,構圖唔好無影到。
      多謝基爾,我只識煮基本野咋! 尤其是炒餸,太易了。
      拿拿拿,我這旅程並不是什麼壯舉架,比D旅遊前輩實笑到面黃。

      刪除
  2. 美男廚房> 咁暗我睇唔清係咪美男喎.哈哈.

    回覆刪除
  3. 連續兩日揸咁長途車你真係勁呀!
    個晚餐就幾好味咁,不過好似少咗d,夠唔夠飽架?美男廚房起碼要兩餸一湯啦...XDDD

    回覆刪除
    回覆
    1. 其實都等於D人單車遊,由朝踩到晚一樣啫,不過當然佢地更加辛苦啦~
      兩餸一湯,煮到聽朝。。。

      刪除
  4. 炒餸工序少,一出錯就無得救,所以更難整得好,反而好多製作複雜既菜色,照住食譜做就大約可以保證質素,無須個人技巧同天份。近年要 impress我既男士,都喜歡炫耀自己既廚藝(仲要係煮齋!),呢個年代,識整幾味既男人的確好煞食,好在銀嫂一早mark住你咋!唯一一個問題,點解牛肉咁淺色?(呀,其實仲有一個問題:批左成個鐘,咁究竟批左幾多個薯仔?)

    回覆刪除
    回覆
    1. 炒餸工序少,一出錯就無得救<-- 可能係香港煮得多,從錯誤中學習,現在捕捉到D時間,熟能生巧,變得容易了~
      impress你既男士,有無煮法國齋餐呀? 我只識煮幾味咋三度板斧咋,港女mark住我都無乜著數,哈哈~
      牛肉淺色原因係白平衡問題,燈光昏暗,打了白光燈,而環境問題也無瑕慢慢拍。
      當年應該只批左3個小型薯仔,你話死唔死!

      刪除
  5. 其實你地呢個真係好勁!!!!!!!!!!!!!同埋港女一定係俾你傳染左囉!!!!!!大膽哂呀~~~~~~~~~
    你要多謝你媽媽呀~~~唔係你做美男廚房點娶到港女做你老婆仔呢~~~~~~~~
    周圍無燈.....星空當時一定勁靚!!!好羨慕呀!!!!!!!!!!!!!!!!!

    回覆刪除
    回覆
    1. 勁乜吖,我一直嘅風格都係隨心所欲去遊歷。唔會話一定窮遊,又話死都要去,又話潮興裸辭。像我這旅程,呢一刻我想窮遊,下一刻又想體驗非洲的發展一樣。
      真係要多謝佢唔比我黐餐,哈哈~
      我晚晚都係銀河下入睡架~

      刪除
  6. 星光銀河晚餐, SWEET 到漏....好靚!! 好靚!!
    分工合作, 美男廚房, 甜椒色彩已經滿分!!

    回覆刪除
    回覆
    1. 多謝Bell你讚美,這些簡單炒菜,見笑了。

      刪除