2016年9月14日 星期三

Day 19 最後一關(納米比亞東北部)

(Day 19) 2015-9-29
住宿:Popa Falls Resort by Namibia Wildlife Resorts
行程:Kasane(博茨瓦納) —> Katima Mulilo(納米比亞) —> Caprivi Camp Park —> Dlvundu
行車里數:710km

橫渡非洲之旅,終於來到最後一個國家。這行程全是陸路過境,經過一些較少港人使用的關口,未出發前已預計過關會波折重重。數數手指,共要過六關,雖然多了一關,但我仍然用過五關斬六將來形容。現在最後一關,又遇麻煩了⋯


Kasane(博茨瓦納)
於露營車瞓左第一晚,瞓得十分差,因為半夜被蚊轟,可能條門隙飛入嚟⋯
趁早上天氣清涼,收好架車,以免身水身汗。今早港女有少少唔舒服,沖返杯維他命C飲先~  早餐食麵包+烚蛋。看見隔離架露營車嘅遊客正在燒柴來煮食,我突然諗起車後兩罐小型石油氣是否能維持到十日嘅旅程。於是我們也在露地內執拾乾柴、較易透火嘅乾草等,並用兩舊磚來架起水煲,水煲內放雞蛋,煲水之餘又可烚蛋,一舉兩得!
剛才隔離玩露營車的是兩對上了年紀的捷克夫婦。捷克?旅途上較少見到捷克人⋯ 應該係我孤陋寡聞了⋯


食完早餐收拾好行裝,我們是營地最後一架離開嘅露營車。離開時只是0930,看來露營車嘅人都幾早出動噃~ (港女按:城市人難得放假,如非必要,也不會逼自己太早起身趕行程。)
左:車停的太陽能發電板
右:車頂有個位可以裝柴枝

咁樣收個頂,雖然有油壓,但都要費點氣力


露地路口有這些標誌


再往超市補給物資,當然仲要解決車上插頭用唔到嘅問題,便買了個三腳大圓插蘇,終於有得叉電了。補給了大量物資,一買就買了$300-Pula($260-HKD)。


離開Kasane,便向納米比亞國境進發。一路向西走,必須穿越Chobe國家公園嘅北部。起初一段路,是我們上次參加Safari曾經經過,聲稱最大嘅包包樹,今次落車慢慢拍拍照。
之後沿著Chobe國家公園北部嘅路程,不時看到野生動物。曾經見到一隻斑馬喺遠方路旁,我已經好警惕、將車速較慢。當我駛近時隻斑馬時竟然想跑出嚟,想過馬路,被我架車嚇到即時掉頭,都不知是佢嚇我定我嚇佢,真係個心離一離呀!

再遇這棵包包樹,可惜陽光係頂部,影到黑忟忟

出發! 漫長嘅旅程開始!

呢個品種嘅雞好似第一次見

小心真正嘅Zebra crossing!!!


Ngoma關口(納米比亞)
揸了個半小時車程,到達進入納米比亞國境嘅Ngoma關口。順利離開津巴布,於大樓旁又有另一棵包包樹。這關口位於高地,望下去是一望無際嘅大平原,還有芝麻般大小的野生動物。
離境十分順利,可惜當入境納米比亞時就⋯ 又要寫過關血淚史⋯




特區護照入境納米比亞是免簽證的,但有一項備註,就係由入境官員決定逗留日數。原來我地都無check清楚,今次book定十日自駕真係搏大霧咋。


我地到達入境櫃枱,填好表格先接觸第一個入境職員,他說我地無Visa不能入境。當然據理力爭啦,出示埋香港入境處網頁print嗰張特衰免簽證名單,張名單係PDF檔,無乜可信記認。他始終話我地係China, HK is China, need Visa! 我地無屈服,堅持賴死,期間準備再搵駐當地中國領事電話。跟住佢入房,叫咗個膊頭有花嘅上司出嚟。雖然佢地用方言交談,但聽到上司係知道香港跟中國護照是不同的,果然是較高級有見識啲!個低級職員做出不屑嘅表情,口裡仍堅持己見。
擾釀左好耐,上司於夾萬內搵了好耐才搵啱個專用印章。佢問我地幾時走,跟住就批咗足夠有餘嘅逗留日數,終於攪掂!臨走時我忍唔住潤一潤個低級職員,問佢係咪第一次見香港人。佢竟然話經常見香港人係呢個關口出入,不過全部都係要Visa嘅,仲死雞撐飯蓋。曾經有香港人喺呢個關口進出唔出奇嘅,但經常見就無乜可能囉。加上關口辦公室內成房職員,佢無試吓問其他人,就一口咬定香港 = 中國護照,堅持唔比我地入境,而且他的表情也十分嫌惡,肯定佢特登留難我地。


護照上蓋了印,還差一步就係自駕入境必須付的買路錢,跟早前進入博茨瓦納一樣。這些買路錢包含路費、保險等等。租車職員話有得碌卡,入境博茨瓦納時成功試過一次,但這關口竟然無得碌⋯ 費用為$242-Pula博茨瓦納貨幣 (約$200-HKD),我身上只得$200-Pula,差$40 又不能收美金。於是行到出大樓外圍,隔住鐵絲網跟舖頭嘅人用極差嘅匯率換了納米比亞貨幣,1-USD = 10-NAD。獨市生意同佢講價都無用,換平啲都唔肯,再講佢直頭叫你入城先換⋯ 於是用$50-USD換了 $500-NAD。用電話app一睇正常匯率係換到$700 的,無計,焗比佢賺⋯
最後用了納米比亞貨幣來俾買路錢,博茨瓦納Pula留返稍後再找換吧!


為了慶祝成功過關斬將,取車時於雪櫃攞支冰凍嘅檸檬茶來慶祝吓先~





Katima Mulilo(納米比亞)
幾經波折入境後,沿唯一嘅公路前進,並看見一個外國男人踏單車拼命前進,不知他是否他用單車橫渡非洲呢?這些行為於外國人眼中一點都不新鮮,只是我地香港人大驚小怪。
沿路前往最近嘅一個城市Katima Mulilo,車程約一小時,這又是另一個鄰近贊比亞的邊境城市。這裡有較具規模嘅醫院、有很多Made in China日常用品的舖頭、還有一個大型市集。市集內可看到當地人嘅生活,相信會合港女後,佢第一次看到地道非洲嘅感覺。起初都諗,我地架露營車咁新淨咁突出,停泊於市集外嘅露天停車場會否被人打主意?取車時發現,還有幾架仲新過我地嘅旅行車停泊,可想而知當地係幾咁流行自駕遊呢~
於市內銀行集中嘅位置搵ATM攞錢,原來唔係間間都有plus攞錢。此時再次撞見單車男,可惜無珍惜這次可以交談嘅機會⋯ 


有錢身痕,諗起跟車個平底鑊污糟到不能再洗,也諗起市內有咁多Made in China嘅日常用品,即時買返個鑊來煮餸先~

上:大型超市
下: 大型醫院

大型市集

市集內食店係燒柴的

市集停車場,大把新嘅農夫車,露營車停泊

我架車嘅公司,但上Avis就完全無任何資料

呢間係當地常見嘅FNB ATM係無Plus的,攞唔到錢


離開市中心,搵到一間餐廳食午餐。我食了燒魚配玉米糊,港女就食漢堡包配沙律(港女按:原本配薯條的,但我喉嚨痛得要死,好在侍應肯應酬我)。燒魚配玉米糊,算是典型非洲餐之一。玉米是非洲南部主要食糧,這些糊狀物毫無味道,口感不太好、似BB糊仔。剛啱我地點這兩道菜的配菜有些又鹹又辣,撈起上來味道幾夾。飲品點了大罐裝可樂,這Size嘅可樂從未見過,而罐裝可樂印有納米比亞獨立25週年。這餐一點都唔平,食了約$160-HKD。食飽後見港女唔太舒服,便於餐廳內悠閒地休息一會。(港女按:傷風感冒頭幾日例牌謝晒皮。)



我們將要走一段好漫長嘅路,此刻發現應該入滿油會好一點,又揸返去市中心⋯
這裡柴油價錢為$10/L,約$5-HKD。入滿油後全速前進!為何好漫長嘅路?因為地圖顯示,我們進入這關口後,納米比亞東北部國境呈長窄形,夾於安哥拉及博茨瓦納中間。這長窄形區域,地圖只顯示為Game Park,不知是否用作打獵的國家公園。而且看不見有城鎮,所以要一口氣衝過去找落腳點,也追回第一日耽誤了大半日嘅路程。


個半小時車程才到Game park入口,停車檢查一下就放行。此時太陽已開始西下。@1740

進入長長嘅長廊前已日落西山,但為了追返行程仍要冒險前進!


睇呢個路線圖就知個長廊有幾長!

漫漫長路嘅東北長廊,只見太陽沒落於前方,因為我們正向西面進發嘛~ 天已黑齊,非洲跟好多其他先進國家嘅公路一樣係無街燈嘅,香港公路嘅街燈密度應該全球數一數二!沿途見到嘅車十隻手指數得晒。兩個多小時終於走完,看見一個閘口,也有職員檢查,順便問吓前方有否住宿。


Dlvundu
過了閘口就到達一個小鎮Dlvundu,看見有一個營地標誌嘅路牌,便轉入支路尋找。最後,差不多8點才搵到 Camp site。望一望個咪錶,今日總共駕駛了710km,算是我嘅紀錄吧⋯


這裡是集團式經營( https://www.nwr.com.na/),在納米比亞有很多不同檔次的營地,善用國家天然資源來接待遊客。
這裡露營車收費每人$120-NID($60-HKD),這露營區竟然露營車在露宿。由於太夜,我們都盡快打開露營車,並由我制定一些每人要負責的任務。港女的官職是能源部大臣,職責是負責在日間停車時,轉為以太陽能充電、及每日到達營地後接駁濕電。此時諗起,如果有小朋友一齊玩露營車,分配工種給小朋友,絕對係一個不錯的親子活動,所以一家大細旅遊,露營車也是一個好選擇。



晚餐太簡單,都唔記得食左乜,只知我好快成功生火來煮野食。

揸完咁耐車,飲番罐非洲最愛先!

死米尿袋及USB燈發揮作用!

橫渡非洲路線圖,已走了2/3啦~

23 則留言:

  1. 似乎過關係旅程中最更張。

    回覆刪除
    回覆
    1. 係!之前過境馬拉維係擺到明唔比你過,但今次感覺係比你過,不過要特登玩吓你!

      刪除
  2. 睇來非洲好多地方都唔係咁落後。

    回覆刪除
    回覆
    1. EE,係呀!今次真係增廣見聞呀!

      刪除
  3. 真係好佩服你......橫渡非洲對我來說..還是有點不容易呢~
    我勁憎訓訓下俾蚊嘈醒!!!!!!!!!!!!真慘...哥晚一定訓得好差!!!!
    唉....過境哥part又係慘...如果同中國護照係一樣...咁使咩整多本特衰護照je....玩咩...
    最憎哥d咀臉...咩事je...咁真係寫明係免簽架嘛....當人地白撞咁...好彩有個高級d既係度咋!!同埋好彩你有print定野!!
    祝你有一個快樂的中秋節~人月兩團圓~~~

    回覆刪除
    回覆
    1. 拿拿拿!小T你唔可以咁講,以你咁嘅年紀已去左咁多山卡拉嘅地方,我夠佩服先真!
      嗚,蚊患係未懂得關好露營車嘅門之前繼續發生。。。
      唉。。。過關有問題呢d野我真係講遇得太多,已經無最初咁躁了。所以明知無錯必定據理力爭,我依家已經去到天不怕地不怕嘅地步,哈哈~~~
      我相信會有港人係呢d關關口被打回頭!
      中秋節快樂~~~雖然過了~

      刪除
  4. 我暫時個行程同你相反,會係納米比亞向維多利亞瀑布咁行~
    710km真係好誇張!我最多嗰日都係諗住行5XX...

    回覆刪除
    回覆
    1. 呢個路程好長,中途好似唔覺有小鎮,除非你行其他路線,否則要諗清楚係邊度落腳

      刪除
  5. 想問如果啲人怕煩係咪通常都係畀錢即場做簽證就入得境?
    睇地圖先知喱個長廊又真係幾特別,夾在兩國中間沿路係咪乜店舖酒店都沒有?
    銀嫂應該都有帶平安藥旁身吧,好彩啲粗重嘢可交晒畀銀哥搞掂安心靜養^^

    回覆刪除
    回覆
    1. 港女:基爾你好。個低級關員無叫我地俾錢,直頭想打我地回頭咁樣,所以先咬實牙關講數。
      根據GOOGLE MAP,長廊兩端有住宿,但沿路無~ 我都唔係好記得當時係睇路牌轉到入呢個campsite,定係喺GPS撳出嚟。
      有帶公立診所黃丸仔,食完會好眼瞓嗰款。其實捱過頭一兩日混沌狀態,之後都精神好多,係KEEP住包雲吞。點知一返到香港就無事,俾銀仔鄙視,話我吸慣香港廢氣。

      刪除
    2. 多謝銀嫂回覆^^
      咁好彩你地堅持同印定啲文件畀佢睇作證明,如果要被迫打回頭無癮之餘又會浪費咗時間.....
      咁你要同銀哥講,以後更加要抽多啲時間陪你去外遊,咪可以習慣一下外國清新空氣囉hahahaha

      刪除
    3. 係馬拉維時我都好堅定同印定文件啦,可惜。。。
      佢個鼻都係留係香港好d, wakaka

      刪除
    4. 咁果陣可能你肚屙加上沒有銀嫂傍住,所以稍稍影響咗啲堅定決心XXXXD

      刪除
    5. 係啦! 你講到港女好有價值啦,佢開心死!

      刪除
    6. 你夠膽否定銀嫂的價值嗎~~~~~~~~~~~~~~~~~~~

      刪除
    7. 小t,嚟緊我會宣布佢另一樣嘅價值啦~

      刪除
  6. 好鍾意你果招乾柴烈火!車頂果D柴枝咁長,個火咪成層樓咁高都有?單車男橫越非洲唔奇,我聽podcast都聽到有對法國夫婦過去10年踩單車環遊世界。

    回覆刪除
    回覆
    1. 來緊晚晚都乾柴烈火架,哈哈~哦,車頂d柴係我特登露出來影相啫,哈哈~
      個火成層樓高,你估露火晚會咩,哈哈~
      無錯,很多另類旅行方式好多外國人都會做,只不過我們香港人大驚小怪吧

      刪除
  7. 美男廚房 咁辛苦呀!710km,呢日勞動日囉。

    回覆刪除
    回覆
    1. 聽晚先真真美男廚房,今日唔算,哈哈~
      其實我個納米比亞行程太趕,成日都是勞動日。。。

      刪除
  8. 張柴火燒好正, 有埋兩人合照!! 用柴火燒完個煲, 會不會洗C人....

    E....營地用自來水?? 飲用水要不要先用淨水藥丸??
    變了問題亞姐,KAKAKKA....

    回覆刪除
    回覆
    1. 用兩舊磚來架起水煲> 架得咁高唔會燒膿煲.

      刪除
    2. 架高左有時控制唔到個火太大,都會燒膿煲架! 不過唔理啦,車上原本有嘅平底鑊都比上手用到起晒漬,比我換左個新。
      淨水藥丸?我無用。D水煲滾佢咪飲得囉~

      刪除