2016年9月4日 星期日

Day 18(下)有乜好過去真Camping(Kasane-博茨瓦納)

(Day 18)(下) 2015-9-28
住宿:Kwalape Safari Lodge
行程:維多利亞瀑布城(津巴布韋) —> Kasane(博茨瓦納)

玩完非洲露營車後,都幾鍾意這種旅遊方式。所以對早前大台播出嘅"有乜好過去Camping"真係好有興趣,可惜⋯
頭幾集都仲未去Camp,當講到去Camp時就拍攝搭吓營、煮返餐食就算,跟住衫都無換就話瞓,轉眼間又話瞓醒第二朝,套衫仲要一樣嘅,究竟有無Camping架⋯ 頭兩集住係酒店都影佢地係室外攞住杯熱飲吹吹水吖,Camping生活竟然一點鏡頭都無拍,唉⋯大台質素係咁上下了。回想係當年收費台嘅”一個地球”,黃翠如同江湖術士係非洲旅行,攝製隊突擊叫醒黃翠如,見佢當時頭髮凌亂、睡眼惺忪個樣都好攪笑。嗰一刻,是我第一次認知黃翠如呢個人。呢D節目先叫有質素嘛!


維多利亞瀑布城(津巴布韋)
跳完笨豬再入返津巴布韋境內,今次真的跟這個邊境道別了。連日來不停進出,都唔知累積了幾多個蓋章。取回停泊於邊境嘅露營車,即時攞雪櫃嘅汽水來慶祝跳完bungee先~ 此時望一望鐵絲網外嘅小販檔,回想尋日過關時幫襯過用$1-USD買過嘅可樂,現在我係超市買嘅平好多呀,而且仲入咗大量存貨喺雪櫃添,呵呵~ 

剛才交收時又無檢查清楚,玩bungee前才發現車身有花痕,便決定再回肥佬職員住所,通知一聲,順便入滿水缸。


回到肥佬住所,佢話車身花痕是小問題,並叫工人來入滿車身水缸70L嘅水。寒暄了幾句,講返頭先跳Bungee嘅經歷,跟住就全速前進。因為預算今早取車後就要離開這一帶,但現在已經係下午。可想而知,維多利亞瀑布一帶是那麼吸引吧~


開著GPS,set好今日嘅目的地,就係早前參加Safari時,去過位於博茨瓦納嘅Kasane。不過開頭GPS老點,又回到剛才嘅關口,剛才先話應該最後一次見這關口,而家又再來,哈哈⋯ 因為GPS覺得經贊比亞再去博茨瓦納會快D,但就無考慮到過關嘅繁複。
於是信自己,行反方向,穿越位於Zambezi國家公園嘅公路。這段路幾漫長,間中也見到野生動物。個多小時嘅車程,到達位於四國(贊比亞、博茨瓦納、納米比亞及現時身處嘅津巴布韋)交匯嘅關口Kazungula。


過關時出示租車公司提供嘅文件,另外要俾手續費,跟肥租車職員所講一樣,可以用信用卡付款。這費用包括三保+路費,$130當地錢,約$ 100-HKD,好快就順利進入博茨瓦納。順利過關後又係雪櫃攞枝冰凍汽水飲啖先~ 欣賞吓一望無際大平原嘅景色,不遠處有一棵包包樹襯托著。

過關時已開始日落了


Kasane(博茨瓦納)
進入博茨瓦納後,直奔Kasane市中心嘅超市補給物資。看見了ATM便想起無當地錢,由於這個國家是過境性質,便於電話app睇睇匯率換算,從ATM取了少量嘅當地錢$500-BWP,約$400-HKD,當地叫作Pula。



於超市買了意粉、免治牛肉、蕃茄,仲買埋煮食油、鹽、洗潔精等,因為要住成十日嘛~ 最後用左$112 Pula/ $90-HKD


之後返轉頭沿路慢慢搵campsite,不過好多都full晒。最後要搵到Kasane近郊,去返邊境附近才搵到營地 $85 pula / $47-HKD一個人。


這campsite都幾大,有餐廳、室內住宿,不過Wifi要係Reception才可連接,而且極不穩定。停泊露營車範圍好大,有一個公眾浴室。浴室燈光昏暗,印象較差。趁個身污糟,幫架車駁電同打開個營,跟住開枱開櫈開燈煮晚餐。今日是中秋節追月,點著由香港帶來的傳統燈籠,懸掛於車上,即時添上中秋節氣氛呀!由港女煮意粉,簡簡單單地完成露營第一餐,好Enjoy呢~ 之後再食由香港帶來的月餅,飲啤酒,欣賞中秋的大月光,用這方式來過中秋十分特別呢~ 從來無諗過露營可以咁正架!
回想過去自己旅行經常撞正中秋,不知為何總會帶備月餅。記得十年前一個人身處克羅地亞,阿媽於出發前俾我嘅;有一次係冰島,當時除了外母俾嘅月餅仲帶埋燈籠,真令人懷念呢~ 不過中秋是阿媽生日嘅大日子,真不孝⋯

打開晒

廚具一應俱全


開始有點糧食



開埋張枱添~


非洲過中秋~

製成品!

輪流沖乾淨涼、洗好衫同碗碟,喺車旁坐一陣頭髮就乾得七七八八。非洲晚上感覺涼快,車斗內就算開晒簾通風都有少少熱,不過還可以接受。臨瞓前檢查好,以免被蚊飛入嚟,可惜還未研究到點樣閂實個出入口,仲有些少空隙⋯


略略介紹返我在非洲住過嘅露營車營地,通常係劃分好一個個車位,有供電裝置接駁露營車,有照明設備,大部分都有燒烤爐,途中仲住過於每一個車位設有獨立廁所浴室嘅營地。我到過嘅營地大多管理完善,十分舒適,職員同老闆亦好友善。


路線圖

27 則留言:

  1. 我第一去次歐洲跟巴士團,所以住過好多個不同營地,原來非洲都可以咁玩。

    回覆刪除
    回覆
    1. 歐洲我未試過,我之後去過美國。暫時來講,感覺非洲好過美國好多。

      刪除
  2. 非洲過中秋真係特別。

    回覆刪除
    回覆
    1. 係呀! 我仲試過係不同國家過中秋架~

      刪除
  3. 架車打開晒又真係幾盞鬼,有點似賣嘢食果啲餐車熱狗車美食車之類
    係咪瞓車頂果個床位?
    帶埋月餅和燈籠真有氣氛
    回家就同銀媽食個大餐補祝返囉^^

    回覆刪除
    回覆
    1. 哎呀! 如你早點提我可以搵吓外快嘛!
      車頂係上層都可以瞓兩人,不過我瞓下層,上層擺雜物。
      我試過第三次係外地過中秋了~

      刪除
    2. 今朝聽咗謝茜嘉個節目

      刪除
    3. 係呀! 港女有聽話比我知,佢話行程,租嘅車,甚至連遭遇(車轆被陷沙地)都一樣,真係有無咁一模一樣呀。。。哈哈~

      刪除
    4. 所以我最初還以為係你地,不過後來知道佢地係有6個人一齊去,同埋租了兩架露營車

      刪除
    5. 我邊有咁堅吖,上電台噃~

      刪除
  4. 夜晚瞓覺可唔可以開車嘅冷氣架?我唔熱得架喎,熱我會屎架...

    回覆刪除
    回覆
    1. 咁你揸到去D凍嘅地方先露營迷得囉,這區住有瓦遮頭吧。

      刪除
  5. 兜penne好似幾得咁播,不過self-catering最煩係煮果幾餐飯都要買齊米油鹽。諗落我都有幾次嚮外地過中秋:2000年巴黎;2006年(好似係)肯雅;2008年印度(恆河);2013年又係印度(喜馬拉雅山)。原因無他,9/10月旅遊shoulder season,天氣OK機票價錢亦OK,又唔會太逼人!

    回覆刪除
    回覆
    1. 你講開penne,港女話意大利細分好多種叫法架,我一世都唔會懂⋯⋯
      買齊米油鹽<--一次過買晒整個行程都ok嘅~
      你講中個原因,呢個時候絕對係有假期、又愛旅遊嘅熱門出發日期,所以有好多愛旅遊嘅人,都可能同我地一樣,成日係外國過中秋。

      刪除
  6. 咁係非洲玩露營車都唔錯喎~~~~~~好完善!!
    你帶燈籠去掛起勁有氣氛!!你舊年係非洲過中秋~我係冰島過中秋~舊年係超級月亮呢!!!
    港女兜意粉望落都知好食啦!!!!廚藝很好呢~

    回覆刪除
    回覆
    1. 值頭係我都無諗過咁完善呀!
      樓上講得啱,所以我地愛旅遊嘅人,成日都係外國過中秋,哈哈~
      下次等我出場啦! 美男廚房~

      刪除
    2. 咁點解突然會興起會想係非洲玩露營車既~~~
      如果有多d假連埋落國慶玩仲正~~~~我都覺得9..10去旅行好開心~~另一原因可能係因為我生日~~~生日又特別想去旅行~
      wow~~~~~~期待期待~~~~~

      刪除
    3. 係喎!咁啱嘅⋯ 不過多D人認識非洲都係好事。
      係外地過生日當然難忘啦~ 睇嚟你好快又係外國過生日啦~ 生日快樂!

      刪除
    4. 話實在...其實我今年生日...係無旅行去...............
      而且...還要在上班中渡過....................................好傷心呀~~
      只怪我今年年頭已經去左南美d假用得咁盡~~~~~

      刪除
  7. 有美男廚房呀!個個都想睇啦!哈!

    回覆刪除
  8. 咦, 15年中秋我喺longyearbyen, 咁快又一年
    銀生, 不如搵次中秋同你媽咪一齊去旅行順便慶生, 咁咪唔洗心掛掛囉
    呢架車好掂, 好似好好玩 ^^

    回覆刪除
    回覆
    1. 極地過中秋,正!
      呢篇每個blog友都講述自己往年中秋係邊個國家過節,好特別呀~~~
      媽咪⋯ 看來遲D再攪多次考順仔之旅先~
      呢架車我到依家都好懷念~

      刪除
  9. 架露營車都唔錯!!! 設備齊全, 正!!
    9/10月旅遊時間>>我係無得去旅行~~~~~

    回覆刪除
    回覆
    1. 幾時美男廚房出場??? 好期待~~~~~~~

      刪除
    2. 9/10月旅遊時間,點解你無得去呀?

      刪除