2016年8月24日 星期三

Day 18(中) 非洲笨豬跳(維多利亞瀑布城-津巴布韋)

(Day 18) (中) 2015-9-28
行程:維多利亞瀑布城(津巴布韋)

於維多利亞瀑布一帶已逗留接近一星期,係時候要離開了。不過還有一樣重頭戲未做,就係,笨。。。豬。。。跳。。。


bungee jump呢個極限活動,我同港女都未玩過,而且點都無諗過會喺非洲跳。我覺得點都要試一次,而且同一般人諗法一樣,要玩就去紐西蘭或澳洲這類先進國家。不過出發前短短一個月內,西班牙就接連發生兩宗bungee jump墜橋死亡事件,咪話唔嚇人。我們出發前還十五十六,究竟跳唔跳好呢⋯ 

來到後,雖然身處相對落後嘅非洲,但我信賴這是知名景點、也是笨豬界嘅著名跳點。於是上網翻查紀錄,這裡亦曾經發生一次斷索墜河嘅意外,但墜橋者竟然奇蹟生還!於是就決定將生命交俾維多利亞瀑布了。

維多利亞瀑布城(津巴布韋)
先揸露營車去超市買點啤酒汽水,充實吓個雪櫃先~ 之後再到市中心食Lunch,做隻飽鬼,哈哈~ 食晏期間忘記了將部車轉做太陽能充電,出返去啪掣先~ 這餐廳環境唔錯,食物也ok。食完便散散步,因為唔想太飽走去跳,否則半空變了人肉噴泉、污染維多利亞瀑布就無謂啦⋯ 閒逛時發現這中心區規模較小,無贊比亞那邊Livingstone咁多舖頭。雖然這邊規模較小,但就十分商業化,物價昂貴,紀念品同postcard都買唔落手。散步時曾走去旅行社詢問Bungee價錢,同現場報名差不多,有專車接送。我地自己都有車,又唔想將架車泊喺市中心,所以無join tour了。


好多旅行社報活動


散步了一會,見消化得差不多,便揸車出發。見路經郵局,再望吓先,不過post card比贊比亞貴好多,況且喺那邊已寄過,所以無再寄。


殖民地郵筒,十分親切


去完郵局,前往出入過多次嘅邊境,將露營車停泊在邊境嘅停車位,再次辦理離境手續。離境後,我們帶著前所未有咁沉重嘅腳步赴刑場,唔係,係去嗰條分隔兩國嘅鐵橋。



不知是否中午剛食完飯嘅關係,無乜人玩,唔以初次過境看到那種”墟冚”情況。我們先到不遠處嘅Bungee cafe填個人資料、磅重,同埋簽生死狀。職員將體重同先後次序寫在手腕上。Bungee價錢$160-USD,並加多$60-USD,便有Gopro出租、攝影師影相,以及幾個固定鏡頭嘅影片組合。跳Bungee期間是有個攝影師在旁的,跳完買相嘅價錢都好似要十多二十美元(不太記得)。現在加多少少就有這個plan,當然加啦,部山狗可以收埋了~



我跟港女再次到贊比亞河上嘅鐵橋,將身家性命財放晒入跳台前嘅木箱,並由我先踏上「刑台」。這裡有成110公尺咁高,Bungee全是當地黑人負責,替我穿好保護裝備,但雙腳好兒戲咁搵毛巾包實並索緊。我從未玩過,不知安全措施是否標準。攝影師問吓我問題,可能幫我舒緩壓力呱。佢問到我有乜想講,見港女在前毫不考慮咁講”I Love my Wife”



雙腳紥到實一實,由職員陪同慢慢到達跳台,張開雙手,調較好右手握著嘅Gopro。再看看身下贊比亞河嘅滾滾流水,耳聽著遠處維多利亞大瀑布嘅水聲,雙腳不禁發軟。就在此時身後職員開聲倒數,five,four,three,two,one... Bungee,個身不由自主地被推下去⋯ 唔得呀!我而家只要用文字紀錄緊個心都卜卜跳緊呀!


呀呀呀!!!!!!!

被推落懸崖果刻,個腦一片空白,離心力嘅驚嚇令到我只懂得一個反應-奪命狂呼! 當到達最底時再次反彈多幾次,心諗究竟彈完未呀,真係來回地獄又折返人間⋯ 彈得幾次都唔驚了,半天吊時亦不忘對住部Gopro旁述,或欣賞一吓風景。無耐就有一位職員游繩來「救」我,將我變返頭上腳下,同埋帶我返上去橋嘅下層。我覺得人生跳一次bungee便足夠了,而且非洲嘅著名景點維多利亞瀑布就在不遠處,這地點跳Bungee應該無懈可擊吧~


於是我就在橋下望上準備跳嘅港女,當然也緊張埋一份啦!不禁要講聲「我愛你」嘅指定動作吧。原來係橋上面睇人跳又另一番風味,只聽到港女嘅慘叫聲被兩旁嘅峽谷傳返上嚟,也夾雜了流水嘅聲響。

到港女啦! 嘩嘩嘩嘩嘩!!!!!!

呢張攝影C如影埋下面個係港女而唔係工作人員就"very吉"喇!


當等到港女上來後,便同佢一齊於橋嘅下層,小心翼翼地步行。因為橋下層嘅闊度只夠一人通過,腳踏嘅係鐵網,可望到贊比亞河嘅急流,用行山扣扣住欄杆行,但另一邊係無欄桿的,我地唔想再跳多次落去呀⋯ (港女按:跳bungee最驚一定係跳之前向下望,所以職員都有叫我抬高頭向前望。跳完仲彈緊時就好驚條繩會斷,呢啲經歷真係一次就夠。夜晚瞓覺時發現好似chok親半邊身,不過無乜大礙,過幾日就好返。)


上去解除裝備及攞返D財物,財物咁存放都無問題,未嚟過嘅朋友看來不必太過擔心吧~ 之後再回Bungee cafe休息,同埋攞光碟及證書。未攞光碟前,喺部電視先睹為快,睇返剛才真係好驚心動魄呀!我地都睇晒先走~ 我問港女買唔買汽水飲,佢話忍一下,車嘅雪櫃大把有得飲,哈哈~

下面有片睇,由我銀仔來出鏡吧! 一分鐘後我就出鏡啦...




30 則留言:

  1. 你未跳之前個樣好緊張呀的。
    彈咁多下先上番去,係我一定已經嚇死左。

    回覆刪除
    回覆
    1. 係,我睇番E係棚牙合唔埋咁⋯
      我都差D嚇死左呀!

      刪除
  2. 看你個樣緊張到呢~~~~
    Bungee 看你條片我都腳軟@@

    回覆刪除
    回覆
    1. 未跳之前真係好緊張架⋯
      我再睇返都會腳軟架⋯

      刪除
  3. 非洲跳真係需要無比勇氣!

    回覆刪除
    回覆
    1. 我都唔知何來有呢個勇氣,哈哈~

      刪除
  4. 好勇呀!!!!!!
    我諗銀生講乜冧爆說話喺呢刻都冇乜作用, 因為銀嫂未跳, 心情應該忐忑緊, 跳後應該補講多次^^
    對笨豬冇乜興趣, 唯一想試係sky diving, 想感受吓天空嘅高度

    回覆刪除
    回覆
    1. 勇一次咁多啦!
      事後直頭擁抱啦~ 不過嗰個橋下層咁危險,不而太大動作,哈哈~
      sky diving我都想試吓,應該無咁驚,因為有個人同你一齊跳嘛~

      刪除
  5. 我係唔會跳笨豬~~~~~~~我就係驚chok親呀~~~
    我覺得笨豬跳係恐怖過跳傘~~~~我寧願跳多次傘都唔笨豬~~~
    不過維多利亞瀑布真係好靚~~~~~~~可限3大瀑布我一條都未睇過~~~~~~~
    港女有出鏡呀~~~~~好開心~~~~~~
    我覺得簽生死狀哥刻真係心情真係好沉重~~

    回覆刪除
    回覆
    1. 我就無chok到喎⋯
      雖然我未玩過跳傘,但我同你都有同感,因為跳傘有個人同你一齊跳,所以無咁恐怖嘛。
      瀑布?遲D去返條睇吓啦,再唔係過嚟新娘潭止吓咳先,呵呵~
      通常你睇到港女背影,今次比你捕到佢一秒鐘上鏡添~
      生死狀,我當時都唔知係乜,簽晒佢就算,wakaka~~~

      刪除
    2. 我驚條腰囉~~~~我呢..其實呢...上次係香港迪士尼玩SPACE MOUNTAIN時...就...扭親腰...痛左成個禮拜...(好老)
      係呀~~~~我就係覺得因為跳傘有個人一齊跳加上唔係我跳我會無咁驚~~~~不過澳門哥d係唔會推你出去架...我講笨豬跳..係你自己跳出去~但你跳先港女bb咪好驚囉..我寧願我跳先~~~~~~~~~~~
      wakakaka~~~~睇住冰島哥d止渴先~~~~~
      係呀~~~好榮幸終於見到港女bb喇~~~~~yeah~~~~~~見到佢甜笑樣~~~~
      哥時跳傘仲有張野問他有無咩咩咩病...勁多病.....好彩張野有中文...英文我點識呀d病名......

      刪除
    3. 咦!迪迪尼嘅過山車都整親,睇嚟你真係老過我噃,wakakaka~~~
      係喎,唔知點解我當時話跳先嘅?澳門?電視見過d藝員係塔上死都唔跳咁,咁後面嘅咪有排等?
      你話見到港女個樣係"很樣",佢睇左唔知乜反應呢?呵呵~

      刪除
  6. 我都係怕跳笨豬容易整嚫,你哋真係勇!
    我會想玩sky diving多D^^

    回覆刪除
    回覆
    1. 係咪真係咁容易整親呢?我都唔太清楚。
      不過我都想試玩吓跳傘。

      刪除
  7. 綁住跳,我唔敢玩囉.你好勇呀..嘗試重力加速度.

    回覆刪除
    回覆
    1. 重力加速度?我思考了一陣⋯ 咦! 咁肥人咪好驚!!!

      刪除
    2. 同重量冇關,浮力都有少少關係o既。

      刪除
    3. 嘩!好深奧呀。。。

      刪除
  8. 真係要大大力畀個讚銀哥,唔係因為你夠勇,而係因為你果句愛的宣言.........雖然我估銀嫂都聽過十萬八千次㗎啦!!XXXD
    銀嫂都要畀個讚,實在好堅好勇^^
    不過點解唔玩返個you jump i jump攬住一齊跳呢wakakakaka....!!

    回覆刪除
    回覆
    1. 我都唔知點解嗰一刻即時諗到呢句,可能我倆身在異鄉呱。
      其實港女想跳嘅慾望大過我架,佢真係堅!
      不過你講開,呢度跳真係有好多花款,除了兩人跳,早前仲見有人騎住部單車一齊跳添!

      刪除
  9. 笨豬跳,我形住倒竪蔥fing fing下好辛苦。銀嫂咁有明星相,應該多D出正面丫。

    回覆刪除
    回覆
    1. 咦,又無辛苦,只有驚咋!可能驚嚇程度蓋過一切,哈哈~
      我地係大明星,無咁容易出鏡嘅,哈哈~

      刪除
  10. 我睇你落去個刻我都驚!
    終於見到港女,笑得好甜!

    回覆刪除
    回覆
    1. 港女:哈哈,多謝。呢啲經驗一次就夠~

      刪除