2016年8月6日 星期六

Day 17 不同角度來觀賞(維多利亞瀑布津巴布韋)

(Day 17) 2015-9-27
住宿:A’zambezi River Lodge
行程:Livingstone(贊比亞) —> 維多利亞瀑布城(津巴布韋)

今日行程的重點-用不同角度欣賞全球三大瀑布之一嘅維多利亞瀑布。先入津巴布韋的園區近距離觀賞,下午就乘坐微型飛機,驚險地從空中俯瞰。去過伊瓜蘇及維多利亞瀑布,現在剩下最易去嘅尼亞瓜拉瀑布就集郵成功。不過咁先進發達嘅地方,尚未在將來計劃之中。



Livingstone(贊比亞)
由於尋晚9點零就上床瞓,今朝便於0730自然醒,可知道「自然醒」在旅途上是多麼的奢侈嗎?


早餐當然係住宿內一站式嘅餐廳內食all day啦!我食過返尋味,再次選擇素食all day,再飲埋之前留起嘅大大盒果汁。期間向港女介紹這住宿有幾咁正~ 佢一眼就睇中住宿內間spa店,仲話想試添,可惜行程緊湊無時間。


食完早餐收拾行裝,也去收返尋晚晾嘅衫。今次竟然又唔見多件T-shirt,真激氣!好在這件衫著到殘晒,預咗遺棄的。晾衫位置無乜人晾衫,一眼睇晒,看來住宿內有賊!跟接待處反映後,便要離開贊比亞。(港女按:上回銀仔提到唔見咗條褲,原來已有十年歷史,返到香港搵咗好耐先買到條尚算啱心水,好可憐呢!)


Hostel接待處出面塊壁報板,有兩張紙報名乘搭前往邊境嘅穿梭小巴,慳返一程車錢。穿梭小巴到了贊比亞瀑布園區入口,我地便落車。不過我們無入園區,直接過境。喺中午時份、個太陽最猛時步行,都咪話唔甘!這段路人車共用,沿途走過隔著兩國、橫跨贊比亞河嘅橋。這條橋就是分開兩國嘅地標,橋中間位置有一堆人正排隊玩笨豬跳。其實我們出發前已知,並十五十六考慮”to jump or not to jump”⋯ 途中看到一對內地男女好無奈坐係樹蔭底,話簽證已入過了一次,現在再入就被拒,唔知點算⋯ 我們免簽證真方便,最後順利過境,今次咁順暢亦都要讚吓本特區嘅~ 平時鬧得多嘛~ (港女按:呢幾日瘋狂過關,每次都要填表蓋印,喺護照留下兩版滿的過關印章。)
贊比亞那邊的瀑布入口

邊境,右下是排隊玩Bungee


大熱天時港女都好辛苦,但呢種體驗係值得嘅~


維多利亞瀑布城(津巴布韋)
到達津巴布韋,即時有的士司機兜生意,仲一口開價錢$20-USD。我知好近,就大膽還價$5-USD,佢笑笑口話無可能。講價不合,唯有睇Google map繼續行,行左十分鐘斜路到達市中心位置,發現我們嘅住宿應該好遠,仲有約6km,孭住一袋二袋行李、烈日當空,無能為力啦。唯有死死氣返轉頭搭的士,與另一個的士司機討價還價後$6-USD成交,6蚊都合理好多吖。


到達港女喺香港已book好、遠離市中心,位於贊比亞河畔嘅Hotel,叫A’zambezi River Lodge,$1104-HKD。check-in時先送上每人一杯雜果賓治,大熱天時真一樂也。由於太早未上得房,又想去嚟咗咁多日都未到過嘅大瀑布,唯有放低行李係大堂,即時出發。酒店每小時都有穿梭巴士去瀑布,但剛走了一班車,又唔想等,問清楚酒店職員,去瀑布最貴都係$10-USD,諗住叫佢幫我地call車。此時看見有兩公婆同佢仔仔剛預約了一部的士,便厚住面皮去問問可否一齊搭並分擔車資。佢地話可以,真係太好了~(港女按:雖然成日話唔好訂定酒店,不過今次係為咗接收露營車,所以要預早定好地點啦,等agent揸架車俾我地。)



講開貨幣,津巴布韋現時已無自己嘅貨幣。剛於2015年6月當地政府已廢除好似冥通銀行咁大面額嘅津巴布韋幣,改用美元及南非南特來做法定貨幣,所以於街頭不時遇到有人向你兜售「陰司紙」架~


瀑布入場費$30-USD。入場後例牌先經過一些展館,之後行一段路就見到瀑布了。維多利亞瀑布跟其他兩大瀑布一樣橫跨兩國,我們身處嘅位置係津巴布韋,對面流水出來嘅地方就係贊比亞。這裡水聲不及南美伊瓜蘇瀑布咁澎湃,而且水流很小。據知現在是旱季之餘,也是近年來最乾旱嘅9月。不過又唔可以咁比較嘅,我去南美時雨季,現在來非洲係旱季,這樣會對維多利亞瀑布唔公平。


入園內行一段路就到









維多利亞瀑布唔似伊瓜蘇咁東一忽西一忽,係一條大裂谷咁一條大直路咁比較易行,我地行到魔鬼泳池位置就開始回程。魔鬼泳池位於對岸贊比亞,Wiki有咁嘅介紹。

魔鬼游泳池[編輯]

魔鬼游泳池(Devil's Swimming Pool)位於尚比亞辛巴威之間,維多利亞瀑布利文斯敦島上,是個天然的泳池。
魔鬼游泳池號稱全世界最危險的天然游泳池,位在利文斯敦島的懸崖邊,同時也是瀑布的邊緣,旁邊就是100多公尺的深谷。
乾旱季節,水流相對平緩,也相對的比較安全,但不代表不夠刺激,只有膽子夠大的才敢下水。
前往魔鬼游泳池必須徒步3小時,並且跳過一個個岩石以避開危險的激流,若失足,就會被沖下瀑布。


Zoom埋D先

之後再經過埋發現瀑布嘅英國探險家Livingstone嘅銅像,同埋斟了些食水就離開了。古代嘅探險家才叫勇闖,現今嘅遊客應該唔算。而家資訊、科技發達,呢個世界應該沒有未曾探索嘅國度吧。(港女按:諗起一個睇google map同wiki當去了旅行嘅朋友...)

似嗎?哈哈~


喺園區內見仲有些少時間,於是食埋午餐。餐廳四圍用灑水系統來降溫,可想而知係幾咁熱!點餐後等得太耐了,因為後面長枱十幾二十人比我們早點餐。等就唔緊要,但怕趕唔到玩Micro Flight,唯有叫侍應幫忙跟進吓。好在跟住食物好快就送上,真係唔該晒。漢堡$14
Pasta$13
ice tea $3
Beer $4
價錢一D都唔平,因為係一個世界級景點內嘅餐廳嘛,而食物也很有水準。港女話想試吓津巴布韋啤酒,其實我怕遊覽時有少少醉意,真唔明我父母日光日白可以一罐罐咁當水飲嘅。Ice tea 估唔到有少少糖水,也有點薄荷葉,幾好飲。(港女按:非洲嘅Ice tea比較有誠意,會有一片檸檬或些少糖水,搞到我之前去美國飲咗一杯literally ice   +tea,覺得好出奇,仲俾銀仔笑我大鄉里。諗諗吓,好似之前去歐洲飲ice tea,都唔係齋茶,奇怪奇怪。)



食飽飽又要離開津巴布韋國境,步行到瀑布出入口旁邊嘅離境建築物,辦好手續後就乖乖係閘口後等候接送嘅車輛,接送車遲了差不多半小時才到。(港女按:好在有其他人一齊等,個心都定啲。)

等接送時,經常見嘅

又回贊比亞
回到位於贊比亞嘅小型機場,今次終於有得玩Micro flight啦~ $170-USD / 15min。場內已有多個遊客排隊等候,觀察所得有兩架飛機為遊客服務。等候了好一段時間,忍唔住買枝汽水飲。先是港女玩,我遠距離為佢拍照。十多分鐘後港女降落就輪到我啦。遊客不可帶任何物品上機,因為跌咗就太危險了,如想拍照留念就要幫襯公司買,因為機翼已安裝好一部Gopro為遊客拍照。起飛啦!微型飛機於瀑布上空盤旋好刺激,飽覽整個維多利亞瀑布。不時亦可以見到陸地上芝麻般的動物,由於太高,就算大象都好細粒,要機師指出才睇到。微型飛機好似電單車飛上天一樣,風平浪靜時會好平穩,但當有風嘅時候就會左搖右擺、隨風晃動,都咪話唔驚⋯ 機師係咁叫我放開雙手望鏡頭影相,我真係唔敢,相手握到實一實,握到掌心冒汗!到後期才夠膽打開雙手影相咋~ 臨降落最驚險時又係咁叫我打開相手,猶豫左一陣⋯ 好,就打開啦~ 嘩,真係好鬼死驚呀!!!

Micro flight

咁控制嘅

飛啦! 堅離地呀!

身後嘅係邊境條橋

係河上特別驚⋯

打開左雙手來降落呀!!

港女呢張影到瀑布靚D,你睇港女幾全神貫注!


玩完就係Office買返隻光碟,有我地剛才嘅照片,也在留名冊上留名。看見都幾多內地人來玩噃,不過就好衰咁係國籍果欄寫「大中國」,跟住就係日本人果度寫「小日本」⋯ 


臨離開前見到之前車過我好多次嘅司機William,大家都好開心,自拍後就坐原來嘅小巴返津巴布韋了。這次相信是跟 William最後一次見面,因為我要離開逗留左好耐嘅維多利亞瀑布了。(港女按:William問我地玩得開唔開心,仲叫我地再嚟,非常敬業樂業。)

分別係載我同港女嘅機師


我們從津巴布韋過嚟玩Micro Flight,同行有一名有一隻手傷殘嘅德國籍老人,年約六十多歲,話已經嚟過非洲好多次,以及一名法國年青女子,約二十尾三十頭吧,佢就自己一個四處遊歷。這女子看似玻利維亞人,膚色比較暗啞,身形就幾窈窕。德國老人極度猴擒,不停口花花,過馬路乘機拖人隻手、又約人食飯。人地都推咗佢,仲要死纏話要送人返酒店,攪到個女仔發晒脾四,好堅定話要返住宿。老人見無著落,就話喺市中心落車。落車時個老人仲講咗一兩句,實際唔記得,類似係想攞返個尾彩。跟住我地一齊討論這個老人,法國女仔都好似仲好嬲咁喎,講到反晒白眼,哈哈~ 最後發現個女仔嘅住宿都幾偏僻,俾個阿伯送佢返嚟仲有得剩嘅?都成六十幾歲人,又唔型,成個公園阿伯咁,有D癲蛤蟆想食天鵝肉噃!


維多利亞瀑布城(津巴布韋)
返到酒店,行李已經送了上房。間房好大好企理,唔似身處非洲,但發現電水壺同插卡機都係made in china。晚餐喺酒店食,有非洲音樂live,$50-USD。我們坐室外,可能熱帶地方、又近河邊,地下都幾多巨大圓形小強。今晚個月亮好明亮,之前上網知道今晚是「藍月亮」。食嘢期間打開臉書睇,原來個個都po個月光照,而我就係地球嘅另一端、原始嘅非洲觀賞,都幾得意。






今日不同角度觀賞過世界三大瀑布之一嘅維多利亞瀑布,有些遺憾嘅係無去到贊比亞那邊園區觀賞。不過逗留了這一帶真的太耐了,必須有所取捨⋯


讀萬卷書不如行萬里路之發現維多利亞瀑布:

維多利亞瀑布[編輯]

維基百科,自由的百科全書
維多利亞瀑布
Victoria Falls
Victoriafälle.jpg
維多利亞瀑布
所在地尚比亞利文斯頓
辛巴威維多利亞瀑布城
座標17°55′28″S 25°51′24″E座標17°55′28″S 25°51′24″E
分類瀑布
高度108米(355英尺)(中央)
瀑布數1
水系贊比西河
平均流速1088立方米/秒(38,430立方英尺/秒)
維多利亞瀑布英語:Victoria Falls)或稱莫西奧圖尼亞瀑布尚比亞湯加語Mosi-oa-Tunya[1],位於非洲贊比西河的中游,尚比亞辛巴威之間,是世界三大瀑布之一。它寬約1.7公里,高約128公尺。
1855年蘇格蘭探險家大衛·李文斯頓成為首位見到維多利亞瀑布的歐洲人,並以維多利亞女王的名字為之命名。當地人則稱它為莫西奧圖尼亞Mosi-oa Tunya托卡萊雅湯加語,意為「像雷霆般轟轟作響的煙霧」)。
維多利亞瀑布也是尚比亞的莫西奧圖尼亞國家公園和辛巴威的維多利亞瀑布國家公園的一部分。1989年,聯合國教科文組織將維多利亞瀑布和這兩個國家公園列入世界遺產的名錄。它們是南部非洲最重要的旅遊點之一。
File:Victoria falls.ogg
維多利亞瀑布錄像

歷史[編輯]

最早的已知的住在維多利亞瀑布附近的人是狩獵採集的科伊桑人,後來Tokaleya人在此定居,他們稱維多利亞瀑布為Shongwe,再後來恩德貝勒人在此落腳,並稱維多利亞瀑布為aManza Thunqayo,最後在這裡定居的馬可洛洛族的人則稱之為莫西奧圖尼亞,意思是像雷霆般轟轟作響的煙霧。
1851年蘇格蘭傳教士和探險家戴維·利文斯敦聽說在非洲內陸有一個大瀑布並開始尋找這個瀑布。從1852年到1856年他從贊比西河的上游向下探險一直到達海岸。1855年11月16日他成為第一個看到這個大瀑布的歐洲人。[2] 利文斯敦是從上游接近維多利亞瀑布的,在瀑布上方他越過了一個小島,今天這個島就叫做利文斯敦島。利文斯敦在贊比西河上游就已經被Ngonye瀑布的景象所打動,他覺得維多利亞瀑布比上游的瀑布要壯觀多了:在一團水霧下贊比西河就像是突然從地面上消失了一般。下大雨後這團水霧在數公里外就可看到。人越走近維多利亞瀑布,其轟鳴之聲就越響。這個奇景至今未變。他以維多利亞女王的名字為之命名。他寫道:「在英國沒有這樣美麗的景象,沒有人能夠想像出它的美景。從來就沒有一個歐洲人看到過它,只有天使在飛過這裡時才能看到這麼漂亮的景象。」
1860年利文斯敦與約翰·柯克一起重返維多利亞瀑布並對之進行詳細的研究。利文斯敦本人當時就已經理會到了這個瀑布形成的過程:「……贊比西河從它的左岸向右岸不斷刻入堅硬的花崗岩。」其他早期到達過維多利亞瀑布的歐洲人有葡萄牙探險家塞爾帕·平托和英國畫家托馬斯·貝恩斯,貝恩斯也是最早為維多利亞瀑布畫畫的人。直到1905年鐵路通到維多利亞瀑布,外部很少有人到達這裡。
1934年一個68.6平方公里大的跨國界的地區受到保護,從1972年開始這個地區正式成為莫西奧圖尼亞國家公園。

26 則留言:

  1. 我只去過最易去果個,相信其餘兩個都唔會去,多謝你分享。

    回覆刪除
  2. 年少真好!!兩位好勁呀!!
    我年紀大,心血少,看見都驚驚!!

    回覆刪除
  3. 年少真好!!兩位好勁呀!!
    我年紀大,心血少,看見都驚驚!!

    回覆刪除
  4. 有冇買番張「陰司紙」做紀念品? 咁高睇瀑布好正呀!

    回覆刪除
    回覆
    1. 其實係贊比亞那邊已不停有人兜售架啦,不過都無買,我都唔知點解,哈哈~
      咁高睇瀑布好正,但係好驚囉⋯⋯

      刪除
  5. 銀仔同我睇瀑布嘅次序一樣,我都係覺得睇難嘅先好,最後嗰個70歲都仲可能去~
    齋睇相,覺得伊瓜蘇好似宏偉d!
    Micro Flight幾錢一個人?

    回覆刪除
    回覆
    1. 係呀趁有心有力,去D艱辛嘅先,你講得啱,最後嗰個70歲都仲可以去,哈哈~
      維多利亞瀑布視野太窄太長,睇唔晒咁,而且可能旱季去呱。
      Micro Flight $170-USD / 15min

      刪除
    2. 毛爸一定唔夠膽坐Micro Flight, 要玩可能又係得我一個玩...

      刪除
  6. 最難去嗰個已經俾銀生你ko咗, 集齊3大瀑布冇難度啦 ^.*
    個micro flight我一定唔玩得, 見到都巧驚驚
    應該要儲吓津巴貨幣喎, 咁大個國家竟然唔要自己嘅貨幣, 世間少有呀

    回覆刪除
    回覆
    1. 都有難度架,呢個世界好多地方都想去,都唔知幾時先排到⋯
      之後我玩嘅仲驚呀! 哈哈~
      其實係贊比亞那邊已不停有人兜售架啦,不過都無買,我都唔知點解。

      刪除
  7. 銀嫂體能都好掂喎@@大熱天孭住大背囊拖住個大袋仲手抽一大樽水,真心要畀讚!!!!
    銀哥個扮相我覺得有點似軍曹XXXD
    飛上天睇瀑布真係超正呀~~~~~不過如果有風真係會勁驚,因為看來好似都無乜嘢可以扶手,唔知可唔可以攬住個機師kakakakaka....

    回覆刪除
    回覆
    1. 樽水飲剩少少咋⋯ 不過都讚嘅,肯同我咁樣玩唔係個個得架~
      係喎,好似軍曹喎,wakaka~~~
      攬住個機師我怕會有生命危險,同歸於盡,哈哈~

      刪除
  8. 你買個隻光碟有幾多張相?貴唔貴?
    全球三大瀑布我一個都未去.

    回覆刪除
    回覆
    1. 咦! 唔記得幾錢添,不過唔太貴,好似百零蚊港紙。
      JJ去一個睇吓啦,介紹尼亞拉瓜瀑布比我睇啦~

      刪除
  9. 華!!!你就好啦!!!!睇左維多利亞瀑布~~~~羨慕!!我連伊瓜蘇都未去....真係話俾人知去過阿根廷都醜醜~~~~
    條褲一定堅好著同埋你堅鐘意!!!著左10年喎!!!!!!

    回覆刪除
    回覆
    1. 又唔係嘅,阿根廷咁大,瀑布都唔係必去嘅~
      哎呀你講錯晒! 多得今次被偷,先十年前嘅行山褲好唔思服架! 依家果D有晒防UV,質地好好多,著住會思服較涼嘅感覺,以前嘅無得比~

      刪除
  10. Micro flight勁正!!!!係上面影哥d相值得買!!!靚!!!

    回覆刪除
  11. 你睇完伊瓜蘇,再睇埋維多利亞,之後就會覺得尼亞拉瓜等如屋企廚房個水龍頭,所以都唔使點去睇喇。「法國年青女子,......看似玻利維亞人,膚色比較暗啞,身形就幾窈窕」,我估佢本身來自北非,法國好多北非裔人(eg 摩洛哥、阿爾及利亞),大多眉清目秀。近年強國人真係以為自己大嗮,佢地呢種心態,響外地言行上甚至網上談吐間都表露無遺。

    回覆刪除
    回覆
    1. 尼亞拉瓜等如屋企廚房個水龍頭?真定假架,哈哈~ 不過今次去到旱季,我就真係覺得似水龍頭D水。
      咦! 有可能係北非都唔定,不過我係北非較少見呢種膚色嘅人。即係似斯里蘭卡、秘魯玻利維亞咁暗啞色咁呢~
      強國人⋯ 有一少部份就破壞晒了⋯

      刪除
  12. 我都想坐係瀑布泳池上拍照留念,我覺得會好型,哈哈!

    回覆刪除
    回覆
    1. Hi 好耐無見~~
      我都想,但呢一帶實在太多活動了,玩唔晒⋯

      刪除