銀仔回歸x新居

銀仔&港女回歸，但回來後都要忙一陣子，加插這篇有關銀仔，及真銀仔嘅近況先~

半年前安頓好新居，最近有時間終於接返闊別多年嘅「真・銀仔」來頤養天年。由於我早幾年四處漂泊、居無定所，所以銀仔交由我個妹照顧。現在成家立室，搬入新居一段時間，係接返銀仔返嚟住嘅好時候。闊別多年，雖然我都不時探銀仔，但可惜始終無一同相處時觀察得咁多。銀仔已經年老力衰，毫無動力了⋯ 現在17歲，實在不能跟我帶回來一歲蹦蹦跳時相比。我知道我唔係一個盡責的主人，對不起，銀仔⋯

好在銀仔只用了一日時間便適應新居，一如以往咁嗲到爆，你去到邊佢跟到邊，好似依家打blog咁，佢就係我前面啦~ 喵~ （港女按：銀仔一入屋就表現出極度驚慌嘅狀態，將自己縮入櫃底，好可憐。好在佢好鍾意親近人，強行抱起佢都無反抗，最後呵吓梳吓毛已放鬆不少。用了兩日時間就無再周圍匿、回復基本飲食同正常「便便」，相信佢咁強嘅適應力係來自主人。）

同佢影返輯沙龍先~

give me five~

新居已住了差不多半年，屋內擺設跟我擺酒時一樣，用上旅遊做主題。當時做相展幅地圖佈景無扔掉，現在掛於家中，仲加咗其他地方嘅相。另外有買了個水松板，用來放同港女嘅合照。有部份之前無合適位置擺放嘅旅行手信，而家亦重見天日。由於我資金有限無錢裝修，上手化妝盤全屋油了白色，我便於餐桌位置，自己動手油了我較喜歡、有西班牙殖民地色彩嘅芒果色，穿了條窗簾通，作為主題牆，也加了一塊層架放擺設。第一個主題當然是瑪雅文明啦~ 掛上嘅好大好大好有色彩嘅布，係由墨西哥帶回來，要摺左幾摺先啱size。

北美今次旅行完返嚟終於有相啦~ 澳洲有相，可惜當年無張靚相，費事曬出嚟。

玻璃櫃頂層歐洲區

第二層海洋

第三層係神祕國度

第四層係雜物室

另外普通櫃個頂有呢D，玻利維亞鹽做嘅草泥馬，因為潮濕天氣會出水及溶化，長期ICU

唔知點解銀仔都成日好鍾意睇~ 這玻璃櫃跟我搬過三次屋，我仍然好鍾意~

有Mood時就換上適當主題來享受，如想飲係牙買加帶回來、過晒期嘅藍山咖啡，就換上牙買加手信作擺設，播住Bob Marley嘅懶洋洋雷鬼歌曲。上次與西班牙團友飯聚就換上西班牙擺設。塊布暫時未換過，我仲有塊好大塊嘅清真寺未敢用，係烏茲別克時買的，怕隔離屋見到我報警叫反恐特擊隊爆門入屋咪大鑊！

開心嘅係有朋友到訪，一入屋就話好鍾意，話好似去左Cafe咁。我聽到真係開心死，最重要係我無使錢裝修，都有咁嘅效果嘛~

新居第一次招呼嘅個朋友竟然係外國人，係我係橫渡非洲、莫三比克時認識嘅德國情侶Alex and Kristina。他們變賣家財環遊世界，認識時已說明香港是其中一站，當時已約定了。清明時節，他們來到香港，由港女接機。來到我家，第一句就講Paradise添! 我地做了一兩天導遊，去了山頂，入馬場等。Alex好喜歡賽馬，後來他都有係日本賭馬，不過次次都輸，哈哈~ 而他們也好有心思咁一早搵定Soho區一間德國餐廳來請我們吃正宗德國餐添~ 估唔到外國人都興請客喎! 就是這樣，跟他們相處了一星期，他們亦都當自己屋企一樣，好喜歡係我家中Hea~ 

離開後我們仍在Whatsapp群組內不時聯絡。最近得知他們環遊世界完畢，已經返回德國了，仲send了張照片，Kristina無名指已戴上了介子，並邀請我們出席Party添，不過日期未定。真係恭喜晒，看來我們將要出席一個外國人嘅婚禮啦~