2016年7月23日 星期六

Day 15 (下) 獅子的盛宴(博茨瓦納Chobe國家公園)

(Day 15) (下)2015-9-25
住宿:Chobe國家公園營地
行程:Livingstone(贊比亞) —> Chobe國家公園(博茨瓦納)


食飽飽後再出發,用陸路嘅方式來Safari。今次登上一架吉普車,可容納大約十人。車上只有一條圍欄及頂蓬,如遇猛獸襲擊不知如何是好⋯




吉普車先到國家公園出入口處,這裡展示了很多動物骨頭。導遊於辦事處辦理好手續便正式入內啦~


陸上這方式跟河上Safari看到嘅嘅又唔同噃。係船上通常只能夠見到於河上或河邊棲息嘅動物,不能太接近。坐吉普車則可深入陸地,由熟悉地形嘅導遊兼司機揸車四處尋找,來過超近距離接觸,我認為係一個「握手位」,有時甚至可用驚嚇來形容。


下午陸上Safari行程,除了大象一樣經常可見外,其他陸上動物我們見到不同種類嘅鹿、羚羊、水牛、鳥類、長頸鹿等等。這些鹿或羚羊通常比較膽小,見有車來通常彈開老遠,我部長炮傻瓜機發揮作用。水牛則啋你都傻,大象就通常會過來驅趕。路經一處有一大群大象在樹蔭,導遊停下來給我們介紹。此時有幾隻大象向我們行過嚟,不停揮動佢強而有力嘅象鼻,不停大聲叫喊來威嚇我們。導遊話我們停下來大象是不會施襲,但大象真的與我們超近,觸手可及咁滯,都咪話唔驚!


孤獨河馬

飛象過河


來張近點吧~


太近了吧!





繼續探索,導遊指向一個矮樹叢話有一隻獅子,我們每人都金精火眼才能從樹葉之間看見。一時間大家都興奮起來,畢竟大家都不是野生動物或攝影狂熱愛好者,半日嘅safari其實要睇嘅風景與野生動物都差不多,再想看D獨居動物真係要看緣份。這些一日起兩日止嘅行程啱我了,所以突然看到這獅子全車都精神一振,相信每一個來Safari嘅遊客,對見到萬獸之王都抱有一定嘅期望的。導遊再將車子駕駛近一點,停了引擎,大家都屏息靜氣拿起相機拍照,可惜佢始終躲在樹叢內被樹枝阻隔,未能拍張滿意嘅照片。





物競天擇

好兇呀!

這不是生態攝影團,主力聚焦體型大嘅野生動物,要"打雀"真係要手快有手慢無啦

捕捉精彩一刻

換個角度,無咁特別

親子活動



接近黃昏時份,導遊帶我們去到一個水源旁,好似一個水氹,終於無遮無掩下看到獅子群了!這族群無獅子王,不知是否閃埋係第二度瞓覺,當中只有一隻毛都未長齊嘅年輕雄獅,幾隻雌性嘅及數隻小獅。只見大人們個個懶洋洋,而小朋友則精力旺盛,你追我趕,不時撩休息中嘅大人玩。成人們通常都以反擊來嚇走煩擾嘅小朋友,不過通常都不得要領,被小朋友繼續煩擾。咁似年青時嘅銀仔同佢嘅死鬼老友豬扒嘅~



睇真D有一隻原來有GPS監察


年青版萬獸之王

這些常見跑得快又好難影到嘅叫珍珠雞Numididae


期間導遊將吉普車越駛越近,觀察了好一段長時間後,大家是時候要離開了。突然間右邊車身嘅車轆被鬆軟嘅沙地食住了,司機調節波檔、油門用了不同力度,想盡辦法,可惜車轆越食越深,唯有用對講機求救。



先有一架公園職員嘅車路過,交談一會便離去,唔通唔救我地?見太陽慢慢從車後面下山,日落後更將整個原野被照射得一片粉紅,此時我竟然仲有心情拍了張美麗照片。後面個團友問導遊,獅子會否嗅到我們驚慌嘅氣味。佢問呢句都有原因的,因為某些動物如狗,是嗅到人喜怒哀樂的。導遊話唔會,話獅子都唔會攻擊車輛,反而一落車就會引起佢地注意。我覺得通常唔會啫,但網上到曾經見過有獅子出於好奇接近車輛⋯ 日落後看見天色開始轉暗,也看看近在咫尺嘅群獅,每人都加添了一分憂愁,後面團友攪鬼咁講出一句,明天我們可能被獅子當做晚餐而上報紙頭條⋯

等待救援,唯有自娛

下圖位團友極無奈咁樣



再等了一會,同公司嘅車及剛才經過嘅公園職員來到協助。公園職員先打算用彈藥嚇跑獅子群,可惜獅子們只伏下作攻擊狀,但無被嚇怕,連發幾炮也如是。無計可施之下,最後由公園職員持槍掩護,導遊才夠膽落車掘車胎嘅沙及將繩繫於前車,我地先可以全身而退。打擾晒獅子們⋯ 導遊話曾經試過咁樣食住架車,而不遠嘅樹上有隻虎視眈眈嘅豹,所以一定要有人保護才可落車。佢亦提到此事因為駛離道路而起,應該會被公司懲處喎。真慘,佢都係想俾我地近D觀察啫⋯ 今日嘅黃昏有獅子們相伴,份外特別。

荷槍實彈嘅公園職員,都係用"走焦"+剪影方法來保持神秘好D...




車上有兩人原來是一日團,由另一車輛接載離開。即我們這團是分別有唔同日數嘅團友噃~


車輛全速駛到營地,看見有十個八個營及兩個職員。分配好每組團友嘅營之後,導遊說出營地守則,話不可行太遠,以不遠處嘅廁所及浴室為界線。因為這裡亦可能有猛獸出沒,所以去廁所最好有人陪伴,以便照應。廁所浴室無期望過會有,而有亦都知唔會好。廁所是化糞形式,而浴室只是用帆布圍住,頭頂有個水袋,即要慳住用了。由於比原定時間遲咗好多先返到,團友們無人沖涼,而我人有三急,唯有忍住臭味慢慢享用這廁所。


安頓下來後,職員們已生了個好大嘅營火,亦預備好晚餐,用錫紙盤載住嘅意粉、米糊等,來個非洲原野簡單自助餐,亦有幾款紙包餐酒給客人選擇,真照顧周到。飯後仲有甜品添!真奢侈的晚餐~



晚餐時又是大家認識嘅好機會。原先已知車後兩男一女來自英國倫敦,男嘅來自倫敦竟然鍾意利物浦,真驚訝,而佢嘅朋友就係熱刺球迷!另外有一對父女就來非洲旅行一年,係一年!真係既羨慕又嫉妒⋯



由於無得沖涼,用些少時間影低露營照,就用濕紙巾抹好面同頸後,就於非洲住了無數野生動物嘅國家公園內入睡了~

著燈嘅就係我地個營


18 則留言:

  1. 我記得當年去南非,自駕遊動物園,行行下唔見其他車輛,兜左好耐先出到去,個心真係越行越驚。
    你哋好在有導遊。

    回覆刪除
    回覆
    1. 係呀! 我都知南非有得自己揸埋入去架,不知非洲仲有無地方可以咁樣?

      刪除
    2. 港女:喺Chobe見到其他露營車自駕,而且稍後租車時,agent都提議我地可以揸入納米比亞嘅國家公園睇動物。

      刪除
  2. 㗎車冇玻璃,啲動物一嘢撲埋嚟咁點算??

    回覆刪除
  3. 無得沖涼=>係熱嘅地方我絕對唔得!
    你就好啦睇到獅子!

    回覆刪除
    回覆
    1. 有呀,睇你沖唔沖啫~ 呵呵~
      係熱,但天氣乾燥,個身無汗,夜晚仲凍添,都可以接受嘅。
      個導遊都好熟咁,睇獅子無問題

      刪除
  4. 華~~~大佬真係好近呀~~~~哥幾隻獅子就係不遠既地方~~好恐怖~~~~~~~
    會唔會好多蚊架?

    回覆刪除
    回覆
    1. 我岩岩有個朋友都去左肯雅....每日都post好多靚相上fb...搞到我有少少心郁郁~~

      刪除
    2. 都米話,當架車被困真係有少少驚架! 可能天氣較乾燥,無蚊喎~
      你都去過南非啦~ 不過肯亞坦桑尼亞有大遷徙睇,其他地方係睇唔到嘅。心動不如行動,肯亞坦桑尼亞香港都熱門左好耐,大把資訊呢~

      刪除
  5. 又真係好驚險喎,好驚啲獅子突然撲過來,到時被迫要開槍殺死啲獅子都唔好....
    長頸鹿飲水原來咁得意,動物園果啲好似係掛高個桶畀佢飲!!
    陸上睇動物又真係近啲,種類又多好多喎
    晚餐咁豐富,其實外圍啲動物聞到唔會唔走埋來食埋一份㗎呢?

    回覆刪除
    回覆
    1. 開槍殺死啲獅子<-- 到時我地又上頭條,又受到全世界千夫所指了⋯
      掛高個桶畀佢飲?咁好似又有D問題⋯
      基爾,好在唔係出發前睇到你留言,如果唔係,真係想食餐安樂茶飯都唔得呀! Wakakaka~~~

      刪除
  6. 壞車嗰幕真係勁驚喎, 近到咁
    有幾張相可以登national geographic, 一個字:pro

    回覆刪除
    回覆
    1. 係呀! 真係超近! D人已經睇到唔想睇啦,哈哈~
      Venus又玩我,呢D相係人去到都影到啦⋯

      刪除
  7. 回覆
    1. 唔驚JJ,鬼鬼咁好肉地應該食左佢地先,哈哈~

      刪除
  8. 原來「獅子盛宴」係指你地自己(差D),哈哈!之前睇到你個標題,我一路唔敢睇埋全文,因為我響肯雅Masai Mara都經常睇到果D血淋淋獅子「盛宴」,而獅子「愛情動作片」亦差不多日日響該處上映。

    回覆刪除
    回覆
    1. 係呀,哈哈~
      嘩! 你睇好多野呀~ 「愛情動作片」我絕對相信同飽暖思淫慾有關,哈哈~ 我就來來去去都只係睇佢地Zzzz...

      刪除