2016年7月30日 星期六

Day 16 熟悉的地方(贊比亞Livingstone)

(Day 16) 2015-9-26
住宿:Jolly Boys Hostel
行程:Chobe國家公園 —> Kasane(博茨瓦納) —> Livingstone(贊比亞) 


0515起床,走出個營感到寒氣迫人,天色剛開始泛紅。慢慢,陽光照遍整個大地,非洲草原亦再次生機勃勃。(港女按:雖然話露營,但營內有床褥枕頭,又好乾淨。曬完一日,而且仲未適應時差,當然好好瞓啦。)



梳洗後職員已準備好簡單早餐,我們選擇了粟米片。由於我肚子受不了牛奶,唯有落少D奶。



早餐後上車繼續Safari,導遊問我們想睇乜動物。團友當然有提及非洲五霸,而我們還未曾看見嘅犀牛及豹,不過都知佢地神出鬼沒,真係好睇緣份嘅⋯ 最後一位團友話想睇斑馬,這個較為容易,導遊即時前往尋找。係喎,原來我地未睇斑馬喎!


最初再遇獅子,有一隻仲施施然係車頭近距離行過添!之後再繼續探索,無幾耐終於見到斑馬了,可惜跟我想像中千軍萬馬有D出入。牠們都是東一隻、西一隻,可能不是大遷徙,所以唔會集合埋一齊呱。回程時又再次遇上群獅懶洋洋在樹蔭下熟睡,應該是尋晚我地一行人差點成為了牠們晚餐嗰群獅子囉,因為我認得其中一隻頸上有GPS監察器。見咁多次唔知認唔認得我地呢?

好近

又係經常見嘅一種鳥




又另一種羚羊






之後1030回營地食brunch,見到營地各營外嘅水兜被一大群蒼蠅入侵,好恐怖!職員狂噴殺蟲水,其實都係徒勞無功。食晏期間當然有被蒼蠅滋擾啦,要縮埋自己⋯ 此時長炮相機嘅電池已耗盡,如再見到珍禽異獸不能野生捕獲了⋯ 

一群蒼蠅



食飽後休息一會,最後再兜一轉,可惜沿途所見嘅跟之前都係差不多,無乜大發現。我跟港女都覺得,兩日一夜嘅行程對於我地呢D不是攝影及生態嘅愛好者是足夠的,日數太長怕會沉悶,還是保留這種熱情,期待下次再有機會去Safari吧。


由莫三比克已開始見,導遊話不是蟻丘,而是一種昆蟲嘅巢穴


之後再回營地食過High tea (餅乾及茶),兩日一夜嘅Safari圓滿結束。遺憾嘅係見唔到另外非洲二霸,犀牛及豹,和經常被猛獸獵食嘅角馬。
Tea完後見陽光猛烈,見英國男唔浪費用來曬太陽,我都唔執輸曬吓白雪雪嘅心口先~ 後來見英國男沖涼,終於有人用個浴室啦!
@1400



休息完畢,導遊車我地去轉另一部車,離開國家公園,而其他人則繼續餘下一日嘅行程。(港女按:兩父女原本訂咗三日兩夜,都話唔係好舒服想早一日走,最後剩返三個英國人。)
@1500


回到邊境小鎮Kasane,到達最初集合嘅住宿,換上另一部車就照原來嘅路線,搭車又搭船咁樣過境返回贊比亞嘅Livingstone。搭最後一程車期間,跟司機聊天起來,佢話這裡的人熱愛英超,可能跟我們一樣曾是英國殖民地嘅關係呱。我知今日有我愛隊利物浦嘅賽事,佢話唔使擔心市內一定有得睇喎。

司機話係非洲南部最大嘅包包樹喎

再坐洗頭艇過境


司機送到我去Jolly Boys Hostel。這是我臨接港女機之前嗰日book好嘅,是一間獨立茅屋仔,好非洲感覺呢~ $45-USD
放好行李即時急步前往不遠嘅中心區域,因為只剩下十分鐘就完場啦⋯ 眾多餐廳都都播英超賽事,可惜只搵到播曼聯、阿仙奴⋯ 激死人!




趕到扯晒氣去到一間士多買支野飲坐下先,順便諗下今晚食乜。兩日一夜辛苦完想食餐好,大家即時想起之前住過嘅Olga’s,掛住佢嘅焗意粉呀!於是早一點行落去食,早一點休息吧~




食飽就回住宿,沖洗我地沙塵僕僕嘅身軀,並且洗埋D衫。還記得我幾日前係這住宿晾衫時唔見了條行山褲嗎?現在過了幾日後,預了搵唔返嘅心態再問職員,佢都話無發現,無計⋯ 呢兩日太攰,無謂諗咁多,今晚都係早睡早起身體好~(港女按:Hostel個浴室好多蚊,要速戰速決。)

@2130

16 則留言:

  1. 個shower得「D屎咁大」袋水,好彩仲有洗頭艇啦!btw, 間茅屋好正。我對動物都無多大興趣,而且當年部傻瓜機仲差到痹,但係safari 成個禮拜都覺得OK,因為我之前計準嗮時間睇牛羚遷徙,好壯觀,而且好多其它動物跟住佢地,所以大把野睇。

    回覆刪除
    回覆
    1. 係呀,join得露營tour,都預左無得沖,有得沖算bonus了。
      茅屋唔錯,不過價錢再平d會更合理。
      大遷徙其實我來非洲之前都有考慮過,不過我想去個更特別嘅非洲之旅而放棄左。大遷徙有興趣架,將來一定會去睇睇

      刪除
  2. 間屋仔超細...但幾靚~~~~~~
    我依家有個朋友就係肯雅旅行中..佢睇哂big 5加大遷徙..好勁~
    個沖涼房好過癮呀~~~

    回覆刪除
    回覆
    1. 屋間仔再平d會好d囉。。。
      大遷徙應該更加容易睇晒big 5,我估,哈哈~ 當年你係南非睇到晒未?
      沖涼房好過癮但係我無沖

      刪除
  3. 間屋仔好得意
    我都覺得兩日一夜夠晒喇

    回覆刪除
    回覆
    1. 係呀,所以每個人喜好唔同,有d人十多日都嫌唔夠呢~

      刪除
  4. 唔見了條行山褲 ! 你涼褲係邊度o架?

    回覆刪除
    回覆
    1. 住宿範圍內,但無乜人行去嘅洗衫晾衫處囉,激死!

      刪除
  5. 晚餐個甜品似我至愛喎!

    回覆刪除
    回覆
    1. 我無乜記憶體記下甜品,看來港女先知

      刪除
  6. 營外嘅水兜被一大群蒼蠅入侵====>望落又真係幾驚嚇,係咪烏蠅都來飲水?
    近距離睇到獅子都唔錯丫,可能要等大遷徙先比較易睇齊big5
    茅屋仔幾靚,廁所浴室係咪要行出去?

    回覆刪除
    回覆
    1. 咦!依家旱季,可能烏繩揾唔到水源呱~
      Big 5,可能係都唔定,留條線比自己下次再去過,wakaka~
      係呀要共用廁所,所以價錢平d會合理d

      刪除