2016年6月16日 星期四

Day 14 接機(贊比亞Livingstone)

(Day 14) 2015-09-24
住宿:OLGA's the Italian Corner
行程:Livingstone 


尋晚因為房間裡無蚊帳,被蚊不停轟醒,唔想被蚊轟就要蓋過頭,但又會熱得濟,所以瞓得唔好。斜對面床個女仔都話有晚上蚊騷擾。之後見個女仔大模斯樣、背著我就係張床上換衫,不過有流浪開就應該見怪不怪了~

晨早再次肚痾,明明尋日已回復正常,為何呢?呀!應該係尋晚黃昏Safari的「到會」係涼涼地,我又慌死唔蝕底狂食,真係禍從口入囉...
於房間內用微弱嘅Wifi online,看到港女尋晚係我剛瞓覺時send了張已登機嘅照片過嚟。佢已換上清新短髮Look,看來現在應該進入南半球、接近非洲大陸了~
見又開始肚痾,早餐清清地食即沖麥皮,這些獨立包裝麥皮每次旅行都食唔晒,不知跟我去過多少個國家了。


食完早餐收到港女嘅whatsapp,原來已經到達南非等候轉機,好期待呢~ 由於我尋晚唔見左條褲,想再問職員,但我英文又垃圾級別,連褲嘅英文都唔識,真羞家… 用Whatsapp問港女「褲」嘅英文,佢用語音回覆,真係方便~(港女按:話說現今科技發達,點解唔問google translate呢,哈哈)
問過職員話無發現,但話會跟進,咁我都講聲後日星期六再返嚟入住嘅。
之後再同港女whatsapp,佢原來係機場嘆緊咖啡,同埋食緊豐富早餐。因為我話過俾佢聽約翰內斯堡機場嘅餐廳唔錯,價錢也合理。傾到佢差不多boarding 就無回覆,可能佢機場嘅free wifi夠鐘了… 都係上一篇咁講,呢一段靠whatsapp來回憶返嘅記憶,真係幾甜蜜架~ (港女按:搭了十幾個鐘飛機,好在係走廊位,鄰坐女乘客又正常,斷斷續續都瞓到少少。落機補充體力,食了一大碟牛油果車厘茄雞胸加非洲小米沙律,配以無限免費添飲即磨咖啡,侍應一見我飲完就拎去refill,結果睇睇雜誌上上網就飲了三杯,埋單 $9-USD,認真正正子。其實各款蛋糕都好吸引,等回程同銀仔再食吧。)

約翰內斯堡機場滿足了港女口舌之慾


港女上機,就係我要搬住宿嘅時候啦。沿尋日事先行過一次嘅路,步行約十分鐘就到港女預先book定嘅住宿 OLGA's the Italian Corner $51-USD。步行期間看見有張類似選舉嘅宣傳單張貼喺燈柱,見背面係白紙,便忽發奇想,不如又寫張接機紙牌去接港女機啦,於是乎就整張撕走~
到達住宿check in 入房後感覺好正,又乾淨企理,依家有點後悔book咗晚Jollyboys 添… 不過風格唔同,帶港女入住一下我所講嘅無敵Hostel都好嘅~ 
安頓下來又痾左一次,之後就準備接機嘅紙牌,寫乜好呢。。。呵呵~




住宿餐廳位置及花園中的壁畫


於是叫reception幫我約的士往來機場。照舊非洲風格,的士司機先來酒店同我Deal,講好價先成交。我當然一早又做足準備啦,先用google map check清楚去機場有幾多公里,先夠牙力用佢講價嘛~ 佢開價$15-USD,我講清楚話單程往機場只需6km,還價$8-USD,最後$10-USD成交!


車程約十多分鐘,是一個新淨嘅小型機場,到境大堂一眼望晒,有電子顯示版但唔work嘅,即無任何航班資訊。於是我拿起紙牌,企埋班一樣係迎接客人嘅職員旁邊,一字排開咁樣等。企我隔離嘅係英國人,佢話係當地買了間旅館來經營。我喺度諗,又遇上這些人,越遇得多,感覺對自己嘅夢想又近一步啦~ 
於是等呀等,呢班機好多遊客,維多利亞瀑布果然是著名景點噃~ 有D遊客見我攞住個古怪紙牌,口噏噏咁讀,有些讀完之後就笑,有些讀完後向我講句Good Luck,也有一個跟我合照添~ 幾攪笑~ 終於見到港女啦,佢好遲先到,即時搵將紙遮住塊面先~ 睇佢搵唔搵到我,呵呵~ (港女按:一入到室內就有wifi,比想像中先進得多。不過得兩三個職員處理入境,有好多歐美遊客搞落地Zam-Zim簽證,即一個簽證適用於贊比亞同津巴布韋兩國,所以等得比較耐。可能機場職員嘅資訊較update,我用特區護照入境完全無問題呀。)


出下樣先~


一出機場,港女即時感受到非洲中午嘅炎熱,但係都較香港乾爽得多。等佢脫下外套,我地就坐回剛才嘅的士回程。的士司機繼續好友善咁盡情跟我們傾談,我也向港女提及這裡黑人幾咁友善。例如先前跟這司機講價講到寸土不讓,但成交後就好友善咁對待,也唔會諗其他辦法再詐騙其他費用。之前去過某些地方,包車好似咁樣等候,雖然協議好,但點都想屈你多D錢嘅。


到達由港女Book好嘅住宿,佢參觀後極為滿意,尤其是個廁所夠晒乾淨。之後商量後決定爭取時間、報名玩Micoflight,呢間住宿都有個小型簡陋報名中心,貴就貴啦!$170-USD / 15min,黃昏時份玩。(港女按:其實眼瞓到黐線,不過一來為盡快適應時差,二來想玩多D周邊活動,唯有拖住疲憊不堪嘅軀殻死頂啦。)
報完活動帶港女走圍行吓,行去我未去過嘅中心區域。也沿途講述這半個月非洲嘅所見所聞,係非洲有幾咁Happy,非洲黑人幾咁友善,我到過嘅地方幾咁安全等等,令其放心。行了一會後,港女就放鬆下來了~


中心區域有銀行郵局等,也有餐廳食肆。港女去郵局買定郵票準備寄postcard,原來郵局有得代市民買日本製汽車喎!行到市集位置,介紹到非洲好多廣告都係靠自己劃,所以可能有好多畫家喺身邊經過都唔知架~ 午餐行返住宿附近嘅餐廳食,碟飯好大碟呀!食左好耐有享用吓wifi。(港女按:於街角見到7-11標誌,以為「梗有一間喺左近」真係咁無遠弗屆,點知行近睇,原來係間冒名酒吧,速閃。沿路好多人擺賣,舊款手機、書簿等等,但無乜hard sell。銀仔去買生果食,附近有人仲講笑叫我地請佢食。)

市中心有這些建築,不知是否殖民地風格呢?


有渣打,但無見匯豐。唔怪之渣打近年蝕咁多錢啦⋯

郵局

竟然有咁多野賣!

仲有得買車添!

市集

上:假7仔,都係自己畫架~
下:做生意想賣廣告,就要靠自己支畫筆啦~

再次因想當地人嘅畫功,幾咁立體!



跟住返回住宿準備玩Microflight,等待接送時港女突然醒起我地踢住對人字拖,架微型飛機雙腳會吊吊揈,應該唔得吧!返房換返對鞋先~

出鏡率極低嘅Model


來接我嘅又係尋日架貨Van,係同一個司機William,再次見返大家都好開心~ 去到活動中心,這裡有microflight及直升機可以玩。可惜職員告知因為大風關係,microflight唔飛得,只得直升機可以玩⋯ 我地對直升機無興趣唔轉了,唯有改期。不過join了聽日開始前往博茨瓦納的Safari,要離開贊比亞兩日。因為係呢一區有太多活動,諗清楚邊日得閒先⋯ 唯有改三日後,但說明於津巴布韋邊境接送。就係咁,令到我地之後又要趕路程⋯ (港女按:媽呀,我捱到金睛火眼竟然無得玩。)


William又車我回OLGA住宿。我地在住宿裡嘅餐廳食晚餐,餐廳位於露天,旁邊有花圃,所以又有蚊患,要回房間攞蚊膚。Pizza+焗Pasta,並啤一啤佢。焗Pasta好美味,個玻璃焗兜令我們不時回味,現在逛Ikea見到都不時問我地係邊度食過。(這模式係我跟港女生活上經常玩嘅,不時都估呢樣,估果樣喺世界邊個角落曾經做過) 並且試了款南非蘋果味啤酒,好好飲。後來回港後係Taste或Citysuper有得賣,又有得回憶,Yeah~ 晚餐$127-HKD,結賬時碌卡順道碌埋房租$395-HKD。

酒店是包早餐的,告知職員明早便要離開食唔到,佢好貼心咁為我們送上每人一份早餐呀,有果汁、鬆餅等。由於聽朝要早起,2100上床瞓了Zzzzzzz


返到住宿已日落,人懶試吓相機嘅特別效果先~ 唔~ 偏紫色嘅我幾鍾意~


左:贊比亞啤

返到香港有得買,不停回憶~ 甜甜地,唔似啤酒咁苦幾好飲架~


12 則留言:

  1. 華~銀仔原來咁事weet架~~~寫哂牌咁去接港女~~~~~
    有你早黎半個月真係好~可以介紹埋風土人情~
    港女份早餐堅抵!!!!!!!!!!
    佢地d廣告畫真係畫得勁靚!!!!!!

    回覆刪除
    回覆
    1. 我都唔知係咪事weet,我淨係知自己去旅行好鍾意做呢D無聊野啫,哈哈~
      我早半個月到,令到港女極速融入非洲呀~
      當地人d畫令到我地睇左好耐,點解會咁立體架!

      刪除
  2. 原本想繼續靠害你嘅, 睇人換衫丫拿, 嘻嘻(奸笑聲)
    但之後見你咁sweet, 真係攞爆分! 銀嫂一定心都甜晒啦 ^.*
    之前嗰篇睇你咁飲法, 都驚你個肚唔知頂唔頂得住, 話晒啱啱先好, 點知..下次唔好喇, 喺外地病好麻煩, 又玩得唔盡興
    個假seven假得幾真, 搞笑

    回覆刪除
    回覆
    1. 你個奸人V吖!
      可能外遊無咁多野諗,先做呢d無聊野啫,哈哈~
      噫!原來你上篇已有預感我個肚又痾。。。

      刪除
  3. 港女見到你寫個牌,一定甜到漏。

    回覆刪除
    回覆
    1. 頂!佢轉個頭又唔見左啦!

      刪除
  4. 小別勝新婚,soooooooo sweet!

    回覆刪除
    回覆
    1. 所以我地成日都小別,呵呵~

      刪除
  5. 銀哥果然係好識攞分喎,要跟你學下嘢kakakakaka......
    銀嫂南非早餐真係好抵食!!
    銀嫂來到可以𥄫住你唔好亂食嘢,應該唔會再屙了吧?!!
    側面真係有D似你,可以入籍贊比亞XXXD

    回覆刪除
    回覆
    1. 我C疿痕揾D做啫,原來有分囉~
      就算唔抵佢都食架啦!
      真係唔知邊個昅邊個,最鍾意食野嘅就係佢。。。
      我思疑當地髮型屋一早上網來抄我張相嚟照畫架!

      刪除
  6. 銀仔, 你真你好勁~~~~
    港女一定 SWEET 到爆燈!!!

    回覆刪除
    回覆
    1. 係香港我唔會架,哈哈~
      人在異鄉太得閒了~

      刪除