2016年5月16日 星期一

Day 9 潛入馬拉維(馬拉維Cape Maclear)

(Day 9) 2015-9-19
住宿:Fat Monkeys
行程:Cape Maclear


可憐嘅我尋晚熱到成晚滿頭大汗,加上坐左成日車舟車勞頓,個肚痛又唔舒服,攪到晨早就醒左,好似成晚都無瞓過咁⋯ 今晚一定要搵間好住宿!

尋晚的簡陋住宿

先行去尋日full晒無得住嘅Fat Monkey食尋日見到嘅豐富all day早餐先~ 順便再問吓有無得住。經過沙灘看到當地人正在湖中洗衫、修補魚網等,小朋友則撐木筏來嬉戲,看來湖水跟當地人生活息息相關。沿途見到幾有非洲特色嘅茅屋住宿,可惜已Full晒⋯ 





呢張我幾鍾意

full 晒嘅住宿


到達Fat Monkey,一問之下原來今晚有Dorm,也有獨立房間,可能規模較大呱。費事肚痛成日霸住個廁所,就住豪D獨立房間$65-USD。一攞房又肚痛,即時為廁所剪綵⋯


光顧廁所後,食個豐富早餐先~ 對住馬拉維湖食all day breakfast(印象中好似$3x-HKD),寧靜中夾雜海浪聲,一陣陣微風吹來,果然好正!此時正同港女whatsapp緊,香港正值晚上,港女正跟她的舊同學飯聚。她的朋友知她會來非洲,怕無得食喎... 我即時send張 all day 豐富早餐過去,並同港女講,有錢點會怕無得食呀。。。


我間房,又兩張大床,嘥晒⋯ 非洲嘅住宿,蚊帳是必備的~

就是這張相,send返香港比港女睇。有無諗過非洲南部食all day呢~


食飽後痴呆左一陣,就回簡陋住宿執拾行李帶過來,順道週圍行吓。沿途都有不少餐廳酒吧及住宿,被一個潛水中心嘅牌吸引,入了一間住宿,心諗「馬拉維湖有得潛水?非洲內陸潛水?」幾新奇噃~ (我之前係埃及潛過)可惜潛水中心無人,不知是否太早呢?之後路經一個係路旁嘅水喉(整個村都不時看見),見尋日有一大班小朋友用水。諗住去洗個面降降溫,不過走去開無水出,看來潔淨嘅食水係當地係幾咁奢侈⋯


這村沿湖邊聚居,呈長形,行左好遠都去唔到中心嘅大空地⋯ 太炎熱了,放棄吧,回簡陋住宿執行李。回去時買了兩樣木製手信,分別是非洲地圖形嘅木牌及一隻木筏,當然要殺價啦!


非洲南部好鍾意種/整D野圍住間屋架~


請珍惜食水


馬拉維湖嘅魚有得賣呀! 咁細條邊夠飽呀⋯


回住宿執拾行李往fat monkey,臨離開時,室友們約我今晚往大空地觀看運動會,也約定我聽日有順風車,可車我往首都,實在太好了~ 
簡陋住宿距離Fat Monkey約十五分鐘,不過炎熱天氣都幾難頂,就係這短短的來回,已隊了罐可樂及支裝水。

尋晚住宿嘅工人。之前無深究過影黑人,回港後張張變晒黑面神⋯


返回Fat monkey放低行李已身水身汗,即時換泳褲,攞埋山狗,飛奔進馬拉維湖中。嘩~ 好涼快呀!湖中不時看到有銀色嘅小魚仔游過~ 咦!山狗拍片及影相質素都唔錯噃~ 雖然Fat Monkey住宿位村莊於最偏遠位置,但因為偏遠所以湖水較潔淨,而較村中心位置嘅沙灘有好多垃圾的。游水浸水曬太陽後,去住宿嘅告示板看看有無潛水活動先。咦!有噃~ 去Reception Book了,1330有人來接我。
@1030

試山狗

沖乾淨涼後,思服晒,即時瞓陣先~ 最後瞓左粒幾鐘。用旅行時間瞓覺,好多人都話我好奢侈,不過這是我嘅風格,哈哈~


瞓醒後,中午1200又係住宿點了三文治作午餐,對住個馬拉維湖,聽住海浪聲寫遊記。由Day 7開始無係IPad打遊記,轉用莫三比克時買嘅記事簿來記下行程點滴。



1315,有一條船早了15分鐘來接我去潛水。手忙腳亂咁入房換泳褲、帶山狗、毛巾、護照及足夠嘅現金等等個人物品就出發。


小船沿湖邊小村打橫行駛,從另一個角度睇Cape Maclear又幾得意噃~ 而用山狗影D相都唔錯。無耐,船駛到一間住宿旁嘅沙灘,裡面有潛水中心。此時船家想收取我Tips,我比個防水袋佢睇,我嘅錢只夠比潛水嘅費用。他當然死纏我想載埋我回程,應承咗佢。

山狗出動
上:穿著中文T shirt嘅船家


到潛水中心見到教練,還有兩個女學員。他說兩個女仔都潛兩轉,想問清楚我潛幾多次,不過我堅持了一次。心諗佢又係衰人?不過後來證實佢都唔係貪錢嘅。我總是覺得係外國開潛水中心的人,為的是自己興趣,我未遇過想屈錢嘅潛水中心。
填好表格,出示了open water潛水牌,便揀了自己size嘅潛水衣。往廁所換好之際突然肚痾,係水果隻。仲痾了兩次添! 踎左係廁所好耐,求神拜佛痾清佢⋯ 


等候出發時跟兩女聊起來,分別來自澳洲及以色列。她們都是來旅遊,之前從未潛過水,但就係非洲嘅馬拉維學潛水攞牌。咁得意嘅,跟我係莫三比克時遇到嘅助產士一模一樣。不過這就是鬼鬼嘅風格,我咁隨心所欲嘅旅遊風格真係拍馬都追唔上呀!


攞齊裝備上船出發,全程有剛才嘅主教練及另一位潛水教練。先於船上Briefing,我英文有限公司,唯有盡聽,好在早年honeymoon前已考取潛水牌,有記得D嘅... 不過個教練以為我有牌會好熟,主力細心講解比學潛水嘅同學,哈哈~

澳洲朋友及主教練

往湖中航行了十多二十分鐘,船已遠離Cape Maclaer的一個潛點來潛水。隻Germin手錶set好戶外"游水"模式,不知會否可用都GPS紀下軌跡。噗通一聲,潛入馬拉維湖。


潛了一節,看到湖中有很多很細條、色彩繽紛嘅小魚,好靚。後來有養開淡水魚嘅朋友係臉書留言,話這是馬湖魚,都好出名喎。教練不時帶我們穿梭湖中的岩山,唔知係咪我地呢個Level呢?越潛越凍,不知是否痾左幾次嘅關係。潛到後來開始肚痛,大鑊!好在無幾耐已潛完了。

潛入馬拉維湖~

穿梭湖底岩山



穿越水底嘅岩山,就回到潛水嘅起點。接近湖面,水溫都暖D。上船前除蛙鞋時攪到手指公輕微反甲,十指痛歸心... 都不知是否痾到個人虛,連指甲都弱D。上船後牙關打震,即時找個太陽照射到嘅船尾曬太陽先。之後船駛到去一個細小嘅荒島旁拋錨,第二節潛水課程就在這裡。以色列女仔話身體唔舒服唔潛呢節,兩個教練及澳洲女仔潛晒落湖中。我與以色列女仔登上荒島的石頭上,曬到熱晒嘅大石表面,啱晒我來取暖。此時以色列女仔要求我幫忙,幫佢拉開佢背部拉鍊除左佢件潛水衣,由頸部拉鍊拉到落pat pat,只剩下三點式。咦!孤男寡女流落荒島!不過個肚痛面都青,就爆發咁款,無心胡思亂想了。唔得,忍唔到返去,就瀨啦。。。 即時扮野行入小荒島探索吓。。。



由於赤腳,剛才攪到腳板底好鬼痛,痾左咁多次個人都謝晒⋯ 浸了一陣水返回大石頭上曬太陽,傾談才知以色列女仔與潛水中嘅澳洲女仔都係一個女仔來非洲南部,一來就來幾個月,並入住潛水中心所在嘅住宿。旅途所見,非洲南部都幾多外國女仔一個人來流浪噃~


當第二節潛完後就回航了,回程時澳洲女仔都話剛才好凍,吹左好耐水,話無諗過會學潛水喎。


返到潛水中心,每人都幫手搬返D裝備。此時接我來嘅船家見到我,好似見到水魚咁想接我走,收我來程時講好嘅tips。我同佢講未搬好野又未換衫,仲想係這裡小休一會,叫佢遲d再搵我,真係好煩。


Debriefing時,同學仔攞出本潛水手冊來記錄底這次潛水資料,仲好興奮咁由教練於手冊上蓋印。嘩!好想要呀!非洲內陸潛水個印好值得紀念呀!旅行從來無諗過帶潛水手冊,即時借張廢紙比教練蓋印,返到香港才剪貼返落去。

打遊記時才記起,好在搵得返~

又痾左一次後,加上潛完水,又攰又頸渴,買支汽水係這裡搵張舒服嘅藤椅嘆吓先~ 老實講我唔係太熱衷潛水,可能潛水真的太攰了。


欣賞完日落想返去,但周圍行,搵極都唔見個船家。嗱!唔係我唔想比tips呀,係佢自己唔係度咋!晚霞時份,沿沙灘漫步返回Fat Monkey。看到當地人於沙灘刷牙、洗碗,小朋友則在玩耍,也有些人在沙灘上睡覺,看來這些當地人嘅家就係沙灘噃。後來問過住宿職員,他們沒有家,起居飲食全在沙灘上⋯ 我們也真太幸福了⋯


返到Fat monkey再痾,痾到發冷。沖乾淨涼,食完晚餐用了一陣wifi,好貪心咁諗住用兩部機來享用一張wifi卡,可惜不可行之餘,連一直用開嘅電話都再用唔到... 貪心之過,哈哈~ 住宿內賣wifi卡嘅舖仔已關門,無心情之下都係快點上床休息吧。臨瞓前send了個sms比阿Yau,話今晚唔出去睇運動會了。原來這運動會係日以繼夜、夜以繼日,整個週末都有比賽的,可惜痾到傻左,無緣了⋯


18 則留言:

  1. "一來就來幾個月" 要唔使 do 先得 XD

    回覆刪除
    回覆
    1. 教練,外國人好興唔使Do,係係香港先當新聞日日報導啫,哈哈~

      刪除
  2. 係咪食錯嘢呀? 有冇睇睇當地醫生?
    哦......銀仔同bikini靚女共處一島, 你向銀嫂備咗案未架?

    回覆刪除
    回覆
    1. 早幾日過關係邊境已開始輕微痾,應該過境前瀨左野⋯
      無睇醫生呀,諗住痾清佢就無事,可惜一痾就好多日。
      備案?佢執我篇遊記時發現,哈哈~~~

      刪除
  3. 肚痾可飲冇氣七喜,冇藥食?

    回覆刪除
    回覆
    1. 其實唔明有氣同無氣對肚痛有乜影響呢?
      有呀,不過想痾清佢所以無食。

      刪除
  4. 痾到咁係咪之前嘅食錯嘢呢?

    回覆刪除
    回覆
    1. 應該過境前果日食錯野,我第一次痾係過境嘅小強化糞廁所。

      刪除
  5. 又估唔到有咁多女仔單拖去喎@@

    有無研究過到底咩事成日痾呀??有無即時whatsapp銀太拎D保仔丸過黎hahahaha

    回覆刪除
    回覆
    1. 真係好多,我地要去見識吓先知世界咁大,唔係好似係香港咁,辭工去流浪就好似大新聞咁日日賣。
      我思考過應該係過境前一日應該食錯野。我有帶喇叭牌架,不過上網睇痾清佢會好D先無食。

      刪除
  6. 好恐怖呀痾左咁多次!!!有無帶藥去食呀????????
    睇到你話扮去探索..有畫面~~~~~
    食錯左d咩呢可????
    女仔們好叻叻!!一個人在非洲流浪..我一定唔得~
    早餐超正!!

    回覆刪除
    回覆
    1. 我有帶喇叭牌架,不過上網睇痾清佢會好D先無食。
      拿,我話去探索咋,無講過乜架,全是你幻想,wakakaka~~~~~
      唔知係咪過境前食嘅咖啡雞飯呢?定係乾爭爭嘅Bolo呢?
      早餐正呢~

      刪除
  7. 結果喱個屙嘅情況第二日有冇改善?
    好彩唔係坐長途車,否則就麻煩....係咪飲水唔乾淨定係水土不服?
    內陸湖潛水真係好新奇,你反正有潛水牌值得一遊
    個人唔舒服,真係寧願花多少少錢住舒服D,熱成晚無覺好瞓仲慘,喱D錢唔慳得:P

    回覆刪除
    回覆
    1. 係有改善嘅,不過係因為我坐長途車關係隊左幾粒喇叭牌嘅關係啫。
      之後幾日都仲未好返,所以坐長途車咪好麻煩囉⋯ 我思考過應該係過境前一日應該食錯野。
      係,最緊要係非洲嘅內陸湖嘛XP
      係,因為肚痛所以咪用左好多錢囉⋯

      刪除
  8. 銀仔你成日有艷遇嘅,我係港女就以後都唔批你一個人去旅行呀!

    回覆刪除
    回覆
    1. 唔算乜艷遇嘅,旅途上遇見嘅其中一個遊客啫,哈哈~

      刪除
  9. 咁痾法真係咩心情都無哂,你仲要唔食保濟丸務求要痾清,勇氣可嘉!

    回覆刪除
    回覆
    1. 其實我都係即時上網google肚痾,先諗到呢個方法咋~係非洲冒險,都係搏一搏⋯

      刪除