2016年1月29日 星期五

Day 6 好人好事(莫三比克Cuamba)

(Day 6) 2015-9-16
住宿:不知名住宿
行程:Nampula —> Cuamba


晨早0300起床,與Alex他們同一架的士以分擔車資,前往各自嘅巴士站。他們去嘅係大巴站搭大巴,我就去再前D嘅"Faina" 搭Chapa即小巴 $200-Metical($32-HKD)。去到Faina只係0340,成個站黑麻麻得幾個人。於是食尋日買好嘅麵包及烚蛋,飲埋支果汁做早餐。聽住MP3抬頭望美麗嘅星空等待時間流逝。




一小時後見開始有點人氣,見有架車停於尋日個位,便問吓人。點知佢話呢度無車去Cuamba,要去返Alex嘅大巴站搭big bus。尋日特登過嚟視察過有車,明明有個人話今日0500呢度有車格!唔深究咁多,望一望隻錶0440,得返20min,即時記住車站個葡文飛的返轉頭啦!$200-Metical 


去到車站前往Cuamba嘅巴士正在上客,於是往售票處買票$400-Metical ($64-HKD)。頂!十個八個鐘嘅巴士價錢,竟然係剛才兩程5分鐘的士嘅總和...



車票有劃位的,係最後排嘅窗口位,張座墊係甩嘅,十個鐘點捱呀... 大背囊要靠一個好人幫我才可夾硬塞入頭頂嘅行李架,見佢咁幫手送了他一隻烚蛋。歷來嘅經驗,坐親長途車車尾都好似有問題,如巴拉圭果次就落雨漏水。(後來預感真的又應驗了)


Nampula附近有十分多光禿禿形狀奇特嘅山,從第一日飛機上已看見。現在近看甚為得意,有個像性器官。這些山全部都光禿禿,不知什麼岩,其他國家可能攞晒嚟起樓了。


太陽從地平線升起,看見低地有一層霧籠罩,即時用一座岩山作襯托,拍了一張美麗照片。可惜無得落車慢慢影,由於車速太快,質素麻麻,也有電線入鏡。無辦法,旅途上就是用有限的資源同時間,來盡量影滿意嘅相片吧!

銀仔命名為"陽具山"



每次停車於小村莊都一定有人瘋狂叫賣,也有車上乘客買野,價錢比城市平一大截。於Malema中途站,我買了一舊雞肉 $1-Metical($0.16-HKD)及一支飲品$15-Metical($2.4-HKD)





離開Malema開始行爛路,超崎嶇。突然嘭一聲,成車人凌空拋起成尺高,可憐嘅我坐最後排高了一級,與頭頂行李價只得半尺距離,個頭也嘭一聲撞到頂部,右手撞到窗框擦傷。定一定神後發現條頸好痛,右手輕微擦傷流血。頸就真係可大可小,慢慢左擰擰右擰擰後,痛楚減退,好在啫!全車人都關心我,剛啱前面有個位,有另一個好心人建議我坐返落嚟。之後每次拋起都有人擰轉頭望一望我,當地人同我講笑話這就是Mozambiqueican。後來慢慢習慣了,架巴士一拋時,順勢企係度就無問題啦~


中途去廁所

沿途所見跟早前前往東岸時一樣,由我地中國中鐵及中鐵建興建鐵路中。個國家咁窮,看來是金錢外交吧。這兩隻大名鼎鼎嘅鐵路股,有買開股票實知嘅~


來非洲除了早前講過對視覺嘅衝擊後,嗅覺當然唔少得啦!其實非洲黑人並不是跟體臭劃上等號,他們只是不願花錢買止汗劑啫。如我無塗止汗劑,陣味都好難頂架!


車上遇見令人敬畏嘅莫三比克大媽,她的baby可能暈車浪不停嘔奶。為了唔整污糟車廂,先用自己條毛巾兜住;baby再次嘔,就用埋小朋友件褸來包住嘔吐物!再三嘔,用埋自己非洲女士用嘅圍巾再包,此時Baby嘔吐已停止了... 成日自以為是、高人一等嘅國民係咪應該反思吓呢?雖然當地人都好隨意通街小便,隨時可見黑腸腸,但他們都是靠牆邊,絕不會於路中心解決的。


到達Cuamba只是約1130,即車程6個多小時,比想像中要快。車上識講英文、開頭幫我塞行李入行李架個好人話已到達Cuamba,話這裡近佢屋企先落車,放左行李回家後再帶我去搵住宿。落車後由佢講價每人一架電單車$50-Metical($8-HKD)往好人家裡放下佢嘅行李,然後再搭剛才嘅電單車幫我搵住宿。
去到一個巴士總站,原來是剛才架大巴嘅終站。好人先叫我俾$100-Metical俾兩架電單車費用,佢咁幫忙區區1美金當然無問題啦!個好人先幫我問清楚幾點有車前往邊境關口Mandimba,依家正有一架Chapa等緊客呢~ 其實都心郁郁架,不過嘅然來到咁特別嘅小村(點特別稍後講),就留一晚啦!好人都要問人才到一間門口破爛嘅建築物,內裡有十多間房嘅不知名住宿。好人叫我留係外面,話怕老闆見到我嘅膚色而抬價喎。嘩!又無咁體貼呀!最後有兩間選擇,一間極差$300-Metical;另一間好好多而且有冷氣,有冷氣嘅住宿係莫三比克都係第一次見,就要$500-Metical。計計下只是多$4美金啫,住好D啦,即住一晚$80-HKD。唔好以為住宿真係有咁好,房內有一個爛廁所無水的,如要沖涼就有個共用廁所,不過都係無水嘅,要同職員單聲,佢就會去個井打水... 嘩!超簡陋呀!超級好人臨走前叮囑我明天架Chapa頂多$300-Metical,話怕我膚色比人呃錢喎。我就同佢講我來莫三比克呢幾日,當地人好好,唔會好似其他國家咁屈遊客錢。離開前佢表露身份原來係警察,即時對當地嘅黑警改觀(因為一入境就想呃我錢)。見佢係警察當然捉緊機會問吓聽日過關疑問啦!即警察唔識分辨特衰同中國護照嘅問題,佢話是當然的,因為這裡只有中國人過境從未見過香港人,而且護照個樣又一樣,不過佢話耐心解釋應該ok嘅。如果遇上賄賂才肯放行,佢話覺得大家開心就俾,如有不合理要求絕不能妥協!佢話細佬又係做警察,早前於大陸交流幾個月。如自己有機會交流都想來香港玩,佢咁好人,我實熱情招待啫! 最後自拍完,攞左佢E-mail,得知叫Ezequiec後道別。


安頓好行李時間尚早,趁記憶還在,即時記下當地人D好人好事及巴士遭遇先!


呢個房內恐怖廁所,我唔夠膽用


1400外出搵食,去到巴士站附近食咖哩牛腩飯+可樂$150-Metical($24-HKD),食完買多支大水走人。臨離開洗手時發現這餐廳又無自來水,得一桶水一個水杓用。


Cuamba不是小鎮或小村,LP亦介紹這裡只是一個road junction,所以應該係無自來水的。一眾居民為這個沙塵滾滾的路口帶來生氣。遇上一個16歲女學生跟我用流利英語交流,看見她於屋企有鐵欄圍住的露台內溫習英文,佢話這裡學校於4年前開始教英文了,可能將來更適宜外國人來旅遊呢。


試吓第二個導航功能先~ 好用! 以後旅遊至愛,也唔怕迷路。



沙塵滾滾

去到火車想影相,又俾呢個國家最討厭嘅食蕉從遠處行過來,應該又想屈錢!好在拍了幾張滿意照片扮見唔到佢走人。行緊其間聽到佢係後面叫,當然啋佢都傻,並用相機扮影相當倒後鏡用來𥄫佢,竟然仲跟住尾!最後轉入民居後佢才無追嚟。






這裡市集跟其他城市一樣大部份賣made in china野,但見到塊太陽能發電板只需$70-Metical,即十幾蚊港紙!返香港鴨記睇吓有無得賣先。最後於市集內買了兩個橙及bolo當明日早餐後回巴士總站探索。


這裡人民跟早前莫三比克所遇到嘅差不多,一樣好友善,條街不停有人叫你Amigo及Hola,只要相同回應佢地就好開心。而且見你係遊客,不論大人或細路都不停叫你幫佢地影相,這種純真坦誠真係去邊度搵。好野!我終於可放心盡情影相了。



佢想影相,我叫佢揸返個剷神似D~


本人好鍾意呢張嘅感覺


入民居行吓

總站另一面有條好闊好直嘅路,看不見盡頭,直至消失天與地咁,好似通往地球嘅盡頭一樣,唔知係咪通往去馬拉維呢? 只見當地人盡情享用路中心,有人棄置垃圾、有小孩於垃圾堆中尋寶、有人踢緊11人足球賽、有人搬貨,各有各忙,偶爾才一兩架車經過,令到路面塵土飛揚。睇人踢球及望緊這條看不見盡頭嘅路期間,不知不覺被越來越多嘅小孩圍觀,圍觀嘅係我呀!約聚集了十幾二十人,咁有趣嘅畫面當然拍片啦!最後跟他們自拍一張就回住宿。真的是我在橋上看風景,他在橋下看我。






沖涼前勞煩大叔幫我於水缸攞一桶水,去到個極奇簡陋嘅爛廁所沖涼,一杓一杓好珍惜咁用來沖涼,最後有半桶剩用來洗埋衫。

時間太早,返房涼住冷氣打遊記。

由於聽朝要早起搭車,所以今晚都好早瞓。臨瞓前外出住宿附近夜觀星象,可惜膽怯唔夠膽行太遠,而住宿又有一盞超強烏絲燈,只能看到光害下的星空。




23 則留言:

  1. 真可惜其實我見到天空好多星星。

    回覆刪除
  2. 回覆
    1. 係呀! 果期興緊當地人嘅名字喎!

      刪除
  3. 我都幾鍾意你講果張相,很有點生活感
    天氣係咪唔算太熱?有冇三十度?
    坐路軌果張都唔錯喎
    Frozy白色果支飲品係乜味?

    回覆刪除
    回覆
    1. btw,細個時搭大巴返鄉下也經常冇這種叫賣,記憶中有賣茶葉蛋,蕉,柑之類

      刪除
    2. 比較乾燥,日頭約30度,晚上約十多度,溫差好大。
      坐路軌,相幫自己拍一張流浪feel嘅相,哈哈~
      Frozy白色果支飲品唔記得乜味了⋯
      哎呀! 我小時候回鄉探親都唔記得左有無咁嘅情景了⋯
      恭喜發財基爾

      刪除
  4. 在人生路不熟的地方遇見好人,真是格外窩心。巴士「凳」到標血,在這種地方有點擔心傷口受感染吧,還好沒有傷頸。坐後座真的不利是,別說在落後國家,我在袋鼠國坐長途巴士,坐尾排都有壞經驗:被博懵、坐在超臭廁所隔離、安全帶爛了(雖然這裡法例規定乘客要用)等等。對了,我對你的GPS很有興趣,對行山有幫助嗎?

    回覆刪除
    回覆
    1. 傷口感染反而無擔心喎,文中所講只擔心條頸。昨日照完頸椎出現問題,不知是否關這次意外嘅事⋯
      估唔到澳洲都咁喎!
      隻錶正野,有指南針高度溫度等基本功能外,也有GPS定位及導航,行山一流! 你睇我環島遊果篇blog用了健行模式。有多款型號,有導航就只有"Fenix"這型號

      刪除
  5. 多謝分享. 最近出外旅行要小心蚊叮呀.
    祝猴年順景, 身體健康!

    回覆刪除
    回覆
    1. Peter兄多謝提醒~
      恭喜發財,身體健康,寫多D好文比我地睇。

      刪除
  6. 好鐘意你張top圖~~天真既笑容~~~~

    回覆刪除
  7. 祝你們新春大吉!身體健康!萬事如意!環遊世界!

    回覆刪除
    回覆
    1. JJ恭喜你身體健康,去多D旅行。但願世界、香港和平

      刪除
  8. 恭喜發財! 新春大吉!身體健康!

    回覆刪除
    回覆
    1. Bell好掛住你
      恭喜發財,天祐香港

      刪除
  9. 回覆
    1. 多謝Andrew,你嘅遊記也很精彩呢~

      刪除
  10. 相對起我, 你絕對唔細膽呀! 你係好夠膽接受當地人嘅幫忙, 但我諗我哋係會驚對方不懷好意, 或者真係要喺現場, 親身感受到佢哋嘅誠懇先會放低戒心
    真係好精彩, 我係一定唔敢有呢啲經歷, 又覺得銀仔帶我睇緊世界 ^.*

    回覆刪除
    回覆
    1. 你絕對唔細膽呀! <-可能我係男人呱。
      可能係當地留左咁多日,已完全明白到當地人無惡意呱,不過我相信如你親身體驗左咁多日,都一樣感受到架~
      Venus又玩我,應該話大家互帶大家去探索呢個世界至真~

      刪除
  11. 小女孩坐地下嗰張,好可憐...

    回覆刪除