Day 5 相約在香港(莫三比克Nampula)

(Day 5) 2015-9-15

住宿：Ruby Backpacker

行程：Ilha De Mozambique —> Nampula

因為每朝0330有Chapa(小巴)回Nampula，所以半夜三更0300起床。出門落雨，即時著返件防水褸先。同行英國助產士竟然話這個非洲行程無諗過落雨，所以無帶雨褸喎。咁都得!

Chapa準時到達一個廣場，原來這是直達Nampula的，我仲以為好似去程一樣要轉幾程添。可惜0330上車，兜了全島重複又重複唔知有無十次，兜了個半小時才坐滿人離開莫三比克島⋯

@0500

到達其中一個中途站Namialo，與英國助產士分道揚鑣，她轉大巴前往Pamba，繼續體驗潛水樂趣。尋日她表示，人生第一次潛水就係早前於莫三比亞首都Maputo附近，與十多廿條有大巴士一樣咁大嘅鯊魚一同潛水，自此便愛上了，並考取埋潛水牌添。佢將會去嘅Pamba是渡假勝地，亦是我當初考慮嘅起點之一，只是最後選擇了更具歷史意義嘅莫三比克島。在跟助產士分開的中途站，再有同車當地人提醒我小心財物。每次搭chapa 停站總有同車嘅人提醒我，其實當地好人真係好多。來了好幾日，稍為認識當地風土後，發現無想像中咁危險，搭車期間終於第一次塞住隻耳仔聽歌了~ 當然於中途站幾十人圍住架車時我會暫停一下的。

去到一個警察哨站，chapa被截停，警察逐一檢查身分證，只是檢查唔屈錢無問題的。不過這車輛司機不知有什麼問題，連人帶車被帶走，可憐掉低我們乘客於哨站路旁。有個識英文嘅好人全程旁實我，佢仲好勞氣咁同差人理論添！

係公路旁，路經每一架嘅Chapa通常都係坐滿人的，如欲再上乘客真係有點難度。最後係哨站成功夾硬迫上另一架坐滿人嘅Chapa，逼到沙甸魚咁！又嚟歡樂滿東華! 行了大約20分鐘到達一個車站，個好人話我知呢度就係Nampula... 跟我去程時於Nampula火車站登車時有點出入。

係哨站扮打電話偷拍的

Nampula近郊小巴站，看見光禿禿嘅山

剛才果程車係義載歡樂滿東華，大家都唔使俾錢，真好人。此時於車站內又有一大班人圍住警車理論，個好人笑稱莫三比克問題天天都多。

等了一陣好人帶我轉乘另一Chapa往火車站$10-Metical($1.6-HKD)，好人讓了個車頭正位給我，等我唔使係後面逼。搭了多程車，發現這裡明碼實價，唔會因為我係遊客而屈我錢，感覺真好～

開始進入城市

到達火車站，與好人分手，可惜好人話這一帶有危險，不宜自拍... 其實佢想推介我搭巴士，但我都係覺得搭火車有趣D。

聽從之前嘅當地人建議，先返回住宿放低行李，才到火車站買票，佢話身無財物，就能減低風險。從熟悉嘅街道上行走，已無左第一日嘅恐懼，視察過環境安全後，好開心來一張自拍。路經一間多層嘅酒店，似足大陸嘅賓館，姑且問一問價，竟然索價$128-USD！都係回Ruby吧⋯

要成千蚊一晚!

回到Ruby住宿，再次見返初到埗時見過嘅白人女仔，一問之下，原來佢修讀地理，主要研究耕作，而家等緊人call佢做功課。佢話由我幾日前見佢等到依家，都唔知等到幾時。看來來Nampula留得耐嘅人，大部份都是作有關研究工作及環境喎。咁又係，這城市無乜睇頭，旅客通常都只係當作中轉站。以前讀文科嘅我，都幾鍾意讀地理，所以搭到咀話喺非洲成日見人燒農地、輪流耕作。記得讀書時學過這是非洲最常見嘅耕作方法，學名叫「作物輪耕」，可惜會對生態做成極大破壞~（以前課堂時聽老師講呢個中文譯名，同學仔都講笑話「輪姦」）

由於第一日係南非機場已咬親個咀（口腔內近大牙面部位置），呢個位置我一食D卜卜脆嘅野都經常都咬親，變成個大血泡要咬穿佢。。。 可能熱氣，於是沖杯清X酷，飲完休息一陣先出發。

休息一會，出發前往火車站。因為想用一早於香港換好的美金，以免身懷巨款。而來非洲後一直都未換過錢，一直用緊都係ATM攞嘅，現在當地錢又用得七七八八，所以首先要搵銀行換錢。如今次試過張Citi真係咁好用唔收charge嘅話，下次出門就主力ATM喇~

搵了幾間銀行先搵到一間BCI銀行有換錢服務，櫃台職員教你親手填表格，影印埋你本Passport攪一輪後換到錢。用$70-USD換了$3057.6-Metical，睇一睇個匯率app，又抵左喎！(因為美金又強左)

路過漂亮教堂，不過無行近

銀行換錢要親手填

身上有錢去即刻食真正早餐先，因為真係好肚餓！即時諗到係第一晚同法國及馬達加斯加朋友食過，位於馬路中心休憩處嘅平價小店。去到果個小店未開門，職員叫我去隔離嘅小店。如中國人心態，肥水點會流別人田架⋯

去到見有人食緊一個不知名東西，便跟佢要嘅一模一樣啦！原來叫Apa，一層薄餅內有一隻煎蛋、有菜有醬汁，好美味！Apa $25-Metical($4-HKD)真價廉物美呀！唔夠喉及真的太肚餓，要食夠兩份! 加埋芬達，最後賣單$80-Metical($13-HKD) 當地人見到我狼吞虎嚥個樣都好開心、好好奇。

@1015

食完回到火車站，門口職員及另一個好人話前往Cuamba火車今朝剛開了，要等這班車回來星期五先再有車出發。雖然LP極度推介，但我等不到星期五了...

見有時間先去巴士站視察一下，我只知在火車站前方。行左十多分鐘都仲未到嘅... 一問人才知距離好遠，建議我搭Chapa前往，$5-Metical($0.8-HKD)。Chapa都要搭6，7分鐘，好在剛才無堅持步行啫！

到達巴士站，找到開往Cuamba嘅mini bus，原來依家都即時有車去。問好了明早0500有車，就坐Chapa回火車站。期間截唔到車，路人話因為d車唔係去火車站。有個好心年青人見我截唔到便幫我截，點解莫三比克有咁多好人架！現在除了小心偷野外，對人嘅警戒心已降至零了。

市內垃圾桶

返回市中心一帶閒逛，感覺整個都市都是一個大市集，像鴨寮街一樣，賣嘅全是中國平價日用品，有二手提電話、叉電器、萬用刀等等。可惜旅遊相關紀念品通通都搵唔到，手信、postcard無呀⋯ 期間都見有店舖都入內逛逛，搵唔到手信都買點東西吧。

紀事冊$2.4-HKD(在旅途上記事用)

麵包$5-HKD

我朋友同名嘅Fizz當地果汁$1.6-HKD

回到住宿，見返尋晚於莫三比克島住宿見過一面嘅情侶Alex及Christian。第一次見面時無交談，今次傾得十分投契，原來他們都辭掉工作，變賣所有家財，包括車及值錢東西，去長達一年嘅環球之旅。他們由莫斯科玩到土耳其，玩過非洲有北面嘅埃及、西面有摩洛哥及加納、東面肯亞坦桑尼亞，現在來到莫三比克。非洲是以洲來計是第二站，之後會去南美、澳洲紐西蘭，由東南亞玩到香港、中國及日本看櫻花。

成晚不停傾，談天說地，講旅行、說德國、話香港，談夢想。我嘅夢想早前於遊記已講，佢一聽直頭話Crazy。話好似佢咁辭工去旅行就經常見，而我夢想就第一次聽。話歐美人唔鍾意儲蓄，豁出去漫遊後就要死死氣回國搵工作，話我十分有創意，如夢想成真一定要第一個入住添！ 再講一次銀仔唔鍾意隨波逐流，人云亦云嘛～ 

不過我真係無諗過用英文可以講咁耐，暢所欲言，可能講關於旅行呱。最後Christian 煮Pasta煮埋我果份，並且相約稍後在香港再見。

住宿旁不知是否教會，成日一車女人四圍唱歌

返住宿hea，本藍簿仔就係剛才買，紀低今次行程嘅紀事冊啦~

德國朋友都一齊Hea~