2015年11月22日 星期日

Day 13 莫斯科一天遊(俄羅斯莫斯科)

(Day 13) 2015-4-13
住宿:航班上
行程:莫斯科 —> 香港


港女跟我相識後第一次既旅行就係俄羅斯,所以今次刻意安排停留莫斯科一整日。舊地重遊,走在熟悉既街道,搭交通工具,再次食當地美食。
當年是初相識,現在已算是新婚燕爾。重臨舊地,真的點滴在心頭。所以今日會不停重複幾年前又點點點,上次又咁咁咁架~
只是相隔幾年,莫斯科於旅遊方面嘅配套已改進不少。


晨早6點起床,為了爭取時間,由銀仔及港女做領隊嘅莫斯科一日遊。食了即沖食物作早餐,拎埋行李往大堂會合高Ling。在寄存好行李後,我地就出發喇。
寄存行李後,一班前往機場客運大樓嘅Shuttle Bus剛剛離開,要等一段時間先有下一班車。其實一出酒店門口已望到客運大樓,就決定步行前往。
晨早時份怕會好凍,冷帽頸巾著晒上身,不過室外氣溫又唔係太凍喎,行左一陣仲覺得熱添!
去到客運大樓想換點盧布,但已找不到幾年前匯率較好嘅找換機,或者這個Terminal不是國際航線嘅大樓呱。唯有妥協於匯率無咁好嘅找換店換錢,幸好每人只換幾百港元嘅盧布,唔係換十萬九千七,所以匯率差少少對我們影響無咁大。
沿用返我幾年前嘅方法,在客運大樓外搭巴士出市區。再重複講係因為就算搭機場快綫都一樣去唔到市中心,要係地鐵邊陲位置轉車,但價錢就貴不知十幾二十陪。撞正上班事間,巴士迫到爆,可憐嘅高Ling要陪我地癲了⋯



迫爆大半個鐘到達巴士總站,可惜唔係搭我當年嘅817號巴士,而這個邊陲地鐵站我亦無去過嘅。有時舊地重遊都想回憶吓嘛,哈哈~
大家迫完車都肚餓,今日決定去到邊食到邊。我記得於地鐵站附近必定有平民小食店,便想找回當年至愛嘅焗薯。不過搵唔到唯有試其他小食喇,唔⋯ 叫做Blini嘅pancake味道唔錯!



第一站先前往Izmailovo Flea Market,是一個較地道嘅紀念品市集。搭地鐵時發現車廂新了,仲增設Wifi,每人都成了低頭族,跟三年前所見嘅大有不同。我們都嘗試連接,可惜連到用唔到,只是有一次能接收Whatsapp訊息,我地逗留短短一天就唔深究了。



記得Flea Market於星期六日才會好旺,今天是閒日,時間又早,所以較為冷清,十室九空無人營業。收獲無乜,因為上次已買夠了。買了一個洋蔥頭音樂盒給頂替我工作嘅同事,講價後價錢竟然跟三年前一樣,計埋盧布後嘅匯率,即是平過半價。高Ling就買咗條頸巾,同埋幾件小擺設。
行完Flea Market於門外休息,由高Ling替我與港女合照,這刻勾起好多回憶呢~ (港女按:是日天朗氣清,唔似上次灰朦朦滿地積雪。好在喺安道爾已經玩完雪,嚟到莫斯科無晒雪都唔會好失望。)


上:flea market入口



第二站參觀有如地下皇宮嘅地鐵站,都係去路經又比較出名果幾個,D照片都係同之前影嘅差不多。港女就做咗冒牌導遊,向高Ling介紹邊度值得影,同埋少少背景資料。
在其中一個站搭一條長長電梯,高Ling提議計時,發現要成1分39秒呀~



高Ling放膽影靚相。


本行程最後一站係紅牆一帶,今次仍然係外圍遊覽,無入到克里姆林宮同普京打招呼。當時紅牆有部份正在維修,以準備閱兵巡遊。行咗一陣又喺食野嘅時候,竟然比我喺”金百貨"附近搵到間毫不起眼嘅食店。一入去原來就喺我一直最想翻食嘅焗薯呀!識飲識食嘅高Ling都話正,佢話香港喺Super Sandwich都有,不過好味程度都唔夠呢度嘅一半!真係好好味架~ 

當年對30, 買機票時對60, 現在50,等於當年嘅半價

諗起都流口水~


食完美味嘅焗薯同飲埋羅宋湯,就入去睇吓上次無時間去嘅”金百貨”。內裡裝潢好靚,有一個佢話具歷史嘅廁所,不過如要享用就要俾錢,仲要唔算平,所以無幫襯啦。(港女按:超市好多魚子醬,不過銀仔話帶到返香港會變壞,唔俾買。而且佢仲話當年係裏海哈薩克已同第二個女人食過正宗嘅,激死我! 我亦發現超市有數字屋搵得到嘅橄欖油同黑醋,不過就無比較價錢。)




今日天色好靚,藍天白雲咁樣樣。去到St Basil’s洋蔥頭教堂,上次係夜遊,而呢一刻就日光日白,感覺當然唔同啦~ 不過我一樣覺得好難影到靚相,可能道行未夠呱⋯


之後去埋河邊條天橋,去到曾經同港女影相嘅地方再影合照。橋上有好多鮮花,係悼念兩個月前被暗殺嘅反對派領袖涅姆佐夫,暗殺地點正正就是河邊不遠處嘅其中一道橋。

臨離開前港女回金百貨話要食雪糕,但比較之下,始終忘不了南法嗰檔自製雪糕。


復活節當然有復活蛋啦~





郵局

回程搭地鐵,再細心留意下站內改進了好多。除了早前提過車廂嘅free wifi外,車票已由"籌碼"改為感應功能嘅車票,即我上次保留嘅籌碼已成歷史。另外站內地板多了英文指示,以後只要認清自己係第幾條線,同埋向邊個方向,就唔使做盲頭烏蠅喇~ (不過就唔知係咪只得市中心車站才有)

左上:八達通用途嘅車票
右上:指示清晰
下:地鐵車廂內嘅路線圖盡頭,清晰指出需轉巴士往機場


今次最後一程地鐵終於搭到幾年前,經常往來機場嘅路線。去到地鐵總站7號線盡頭,穿過熟悉嘅商場並由這裡轉乘巴士。現在不是上車一刻才買票,而是係商場內一個售票處購買,搭熟悉嘅817號巴士前往機場。走這路線心情好得意,因為幾年前就係於這路線穿梭了好幾次,其中一次就係接港女機。當年佢初次衝出亞洲,從此跟著我感受這世界喇~


莫斯科一天遊完,銀仔帶隊浮華自駕之旅亦圓滿結束。


俄航經濟客位都有拖鞋

16 則留言:

  1. 哈哈, 睇頭段尾段都覺得銀生有一顆浪漫的心, 你地好sweet sweet ^^ 已經好多年冇再去莫斯科, 超過十年, 覺得呢個地方幾靚, 建築好有特色

    回覆刪除
    回覆
    1. Venus,其實我打Blog主要打我D旅遊點滴,感情都打埋出嚟你當然覺浪漫啦。但以前我單身時亦有紀下我嘅空虛,都好似幾慘架⋯

      刪除
  2. 有次睇過德國一個節目介紹莫斯科焗薯快餐店,唔知係咪呢間呢.

    回覆刪除
    回覆
    1. 當地有好多間架~ 如係你國土有都去試吓啦~

      刪除
  3. 佢哋D電梯唔止長, 速度仲好快, 當年坐都幾驚...
    好彩你早去咋, 而家坐俄羅斯航空就真係驚啦!

    回覆刪除
    回覆
    1. 快? 唔太覺⋯ 唔通依家較慢左?
      依家俄羅B,真係唔使諗住,除非遠東這邊。

      刪除
  4. 舊地重遊一定有好多回憶^^
    下次再同過銀嫂去裏海食正宗魚子醬啦

    回覆刪除
  5. Silver,莫斯科地鐵站真係好似皇宮咁靚.我上次都有行金百貨古色古香.

    回覆刪除
    回覆
    1. 相信你影得更靚,去爬返你D舊文先~

      刪除
  6. 我都係去過一次俄羅斯咁大把~仲要係跟團~
    第一次去旅行係俄羅斯~~~我覺得幾特別~~~~
    經濟客位仲有拖鞋真係好耐未見過!!!!

    回覆刪除
    回覆
    1. 咦小T你都去過,但你遊記目錄無呢~
      第一次你講港女? 我係話佢識我後第一次呢,不是佢人生第一次,哈哈~
      經濟位有襪套都有時見,而有拖鞋我直頭未見過⋯

      刪除
  7. haha,我上年去俄羅斯搭地鐵個時,我仲記得有個俄羅斯人係噤了我地傾計!!
    我當時就係住係flea market隔離間酒店到,仲係flea market到買左好多野~!!

    回覆刪除
    回覆
    1. 你個情況我都遇過,係巴士上,但真係好少見。尤其是地鐵裡,每人都木口木口,之前去過俄羅斯,或前蘇聯解體嘅國家,感覺有點恐怖。
      我第一次來都係瘋狂購物架~ Flea market? 我印象係咪好大間嘅酒店呀?

      刪除
  8. 我都想重遊莫斯科喎,哎呀!衣家又咁情形咁亂!

    回覆刪除
    回覆
    1. 係囉,年年俄航機票咁平,點到你唔心動喎⋯

      刪除