2015年11月10日 星期二

Day 11 我想住嘅地方(安道爾)

(Day 11) 2015-04-11
住宿 : Hotel Parador de Canòlich
行程 : Bixessarri —> La Massana —> Parc Natural de la Vall de Sorteny —> 安道爾城 —> Bixessarri


「瓦魯阿圖,我想住嘅地方」這句說話早前每日透過電視洗腦嘅移民廣告,令到深入民心。我相信每個熱愛旅行嘅人心目中都有一個瓦魯阿圖,或者如近期潮文「每個男人心裡都有個黃翠如」一樣道理。
安道爾,我想住嘅地方!終於找到了~ 銀仔早前講有個夢,希望將來可實現。可惜安道爾始終是夢想,回港上網一check,這裡樓價比歐洲其他地方貴好多,可能這裡每間房子都有嚴格規管,外型好靚好新淨,暫時未看見有危樓或爛屋,而且國土咁細,要起新樓亦不容易。



因尋晚太夜入住,未能細看風景。喺咁美妙嘅住宿瞓了一晚,打開窗簾,又是一陣讚歎!發現喺群山包圍下入睡,真係好正。
食完住宿包埋嘅簡單早餐後(老闆娘仲多次問我地夠唔夠食,唔夠可以同佢講),叫老闆幫忙我們預約騎馬。男主人替我們詢問期間,我地諗住叫佢問吓騎幾耐、幾錢、幾點有得騎等等⋯ 點知我地都未開聲佢已經幫我地問好晒,真體貼~
約了個多小時後,牧場位於另一個叫La Massana嘅鎮,我地都怕趕唔切。屋主打趣話安道爾好細,揸車一個小時足可橫越國境了,並叫我地放心。



左上、下:不同角度影住宿
右下:掛在牆上的陳年舊照,於門口拍照攝,一家人樂也融融,屋主兩公婆也十分年青~


沿蛇仔路落山,期間見到越野車不沿道路爬山,十分刺激。果然真的如屋主所講半小時車程到達La Massana,並順利找到牧場。

上:蛇仔路
下:揸車落山

牧場內有一班小朋友正在練習,我們便各自挑選合適嘅裝備。等待教練分配每人一匹坐騎後就出發啦,高Ling就最開心,因為佢第一次騎馬咋~
教練帶領我們於小鎮內嘅小徑山路遊覽,一面欣賞安道爾嘅迷人景緻,一面感受小鎮嘅寧靜。
騎馬完畢,比實際時間還要多一點,覺得又賺左啦~



騎馬後唔知去邊好,於是前往小鎮嘅旅客中心諗住攞D推介。不過,小鎮內有很多店舖╴包括遊客中心喺星期六也早早關門大吉,不過並不影響於旅客中心外欣賞美景嘅心情。

左下:有相框給遊客拍照,可惜走焦了⋯
右下:兩個郵箱分別給西班牙文及法文的信件

回車上拿起手上嘅資料,研究餘下半日有乜野好做。既然來到山區小國,就一致決定去行山先~ 選擇了北面接近法國國境嘅Parc Natural de la Vall de Sorteny國家公園。
高Ling玩開毅行者當然無有怕啦! 港女就怨我係香港唔陪佢行山,我就話通常我係外國先行山。唔係詆毀香港,香港風景我都知好靚,但淨係旅行先至有這種興致啫。我之前都講過,旅行時會做好多係香港唔會做嘅事,如一個人係露天茶座睇書,賞月賞日出日落等。


一路向北駕駛,越接近Parc國家公園路況越斜,並於半山找到一間裝潢浮誇,不過價錢都可接受嘅酒店食午餐。我地叫咗兩個餐話share,同埋唔使飲soft drinks,侍應都有少少木口木面,最後一人飲咗一杯咖啡。


右:半生不熟嘅蝦,有點喜出望外


食完繼續沿山路走,但行錯路,去到一個滑雪場。嘩!我地這季節來,無諗過會接觸到雪架,當然落車拍攝一番啦~ 巴賽南法二、三十度,就算山區安道爾都有十多度。如咁計法,即係我地現正身處海拔很高,氣溫低至零下左右,才未至溶雪。 上網得知,這滑雪場外嘅馬路原來係環法單車賽路段,甚至整個安度爾都歸納為環法指定路線。



離開滑雪場落山,終於搵到條支路上Parc國家公園,當然又係好斜。到達Parc國家公園外嘅停車場,看見有好多遊客來到滑雪,泊低車輛帶齊裝備。相比之下我們只得港女衣著似番D樣,高Ling牛仔褲便服布鞋,而我更只是著住Redwing皮鞋。入口處嘅資訊中心星期日暫停服務,研究櫥窗嘅地圖後,發現行到最遠景點都只需兩個多小時,望一望隻錶現在4:30pm,大家都無有怕,選定東北方嘅湖景點Estany後出發。


出發

山徑大多佈滿了雪,估唔到我身穿嘅redwing又唔錯噃,皮夠厚唔入水,高筒設計又唔會拗柴,可憐高Ling對布鞋入晒水了⋯
一個小時到達一個分盆口,兩見兩個男人從山上滑雪下來。一問之下欲前往Estany則要偏離山徑往茫茫白雪中上山,即佢地滑雪落嚟嘅方向。他們上下打量我們三人的衣著都擰擰頭覺得不可行,我們這身衣著想行雪山真係笑死人啦,哈哈~ 不能前往山中湖便於三岔口的小溪影相玩吓雪。
於是聽從建議往山徑繼續上山,都會遠距離見到個湖的。再行上少少看見一間類似住宿嘅建築物,不過重門深鎖。見個天開始黑,不知想落雪還是即將入黑,現在6:00pm了,都係回程吧~ 

路牌指住嘅地方,看不見有路

上山不成拍拍照吧


原來只想Zoom埋去局部攝影,會有水墨畫嘅效果喎! 自己摸索到嘅攝影技巧,較參考人家嘅更興奮。

如要前往山上的湖,只能滑雪⋯


這裡高度為2316米,我地由約1700米起步,一小時路程也不算辛苦,可惜天色灰矇矇,影唔到靚相。離開前堆個小型雪人齊齊合照,紀錄了行雪山的美好時光。玩吓玩吓由過了半小時,於6:30pm落山。




回程時快好多,只用了半個小時多D。於是取回車,見天色還未黑齊前往首都安道爾城逛一逛吧。由剛才國境最北來到首都車程也是半小時,這國家真方便。
首都內剛遇上多支歐洲國家嘅Rugby隊員巡遊,不知是誓師大會還是勝利巡遊,氣氛非常熱鬧。體育用品店舖以賣滑雪裝備為主,喜歡滑雪的應該會好開心。於店內看到早前喺香港已看中嘅Oakley太陽眼鏡,這裡竟然平近一千港元喎,諗都唔諗即時買下啦~ 約一千多少少嘅價錢買到新款Oakley太陽眼鏡,真係無諗過。免稅國家,真係乜都平過人。 但之前為何開曼群島又會咁貴嘅? 
於南法時逛超級市場已覺得好平,這裡免稅,超級市場價錢更加平到得人驚,食物、家具用品等於香港半價甚至1/3價錢,我地個個睇到嘩嘩聲,好似開心大發現咁呀。超市內有一袋袋pack好嘅煙酒,標明係可以合法過境嘅免稅品套裝,銷售對象是鄰國水貨客。我地都不約而同咁講,好想住係Pandora呀! (這行程叫Andorra嘅花名) 




晚餐於首都一間餐廳用膳,由於我地都唔係太肚餓,就揀咗啲pintxos食,同埋叫咗塊牛扒。原本想叫吓嘢飲,但我要揸車唔飲得酒,其他汽水、蒸餾水又唔係好抵飲,所以食完嘢,返去停車場攞車時,才開枝剛才喺超市買嘅果汁飲。

(港女按:西班牙的特色食物非Tapas莫屬,而Tapas在巴斯克地區就叫做Pintxos。和中、南部地區放在小塊麵包上的Tapas不同,巴斯克的Pintxos是用牙籤串成串,各種不同口味的Pintxos擺放在大盤子裏供顧客任意選擇,有點像自助餐。如果願意,完全可以每天用不同的Pintxos代替三餐。或者也可以學當地人的樣子,端著一杯白葡萄酒或啤酒在各個酒吧之間流轉,品嘗各家不同風味的Pintxos。

價格:Pintxos一般是用牙籤串好了放在盤子裏,每串1-2歐元,吃完數牙籤付賬。)


返回住宿都比較夜了,不過於蛇仔路上山其間看到天上繁星照耀,即時諗不如影星星。於是回住宿沖好涼再出發,今次沿蛇仔路再上高一點。由於這地方未曾採索過,半夜三更又行蛇仔路,又越上越高,大家都有一點怯架⋯ 由於被群山阻擋仍找不到好景觀,而且地圖發現這條山路是直通西班牙的,都係唔好揸咁高。於是於一個較闊嘅平地拍攝,從apps顯示銀河被群山阻隔,便求其拍了一張極不滿意嘅星空。這時已過了零時十分,仲話明早起床睇日出,都係及早回歸吧!


安道爾這國家,不但風光如畫,而且十分便利。既可以有隱居生活感覺,又可以半個小時車程內到達購物中心。再者這裡運動盛行,單車、跑步、滑雪、行山等等。就算較為文靜,於美景下散散步或看看書也是寫意之極。而且這裡天氣比我感覺也很不錯,相信是地中海氣候加上山區關係,需然我們只是短短逗了留兩日三夜,於春季仍是經常放晴,就算陰天也沒有冰島的十級強風。
安道爾,我想住嘅地方,現已紀錄在案! (如中六合彩嘅話)

本日行程


讀萬卷書不如行萬里路之認識安道爾:(取自Wiki)
安道爾公國,袖珍國家之一,國土面積468平方公里。是西南歐的內陸親王國,位於庇里牛斯山脈東南部,毗鄰法國和西班牙。首都老安道爾。官方語言為加泰羅尼亞語,通用語言為西班牙語和法語。國內居民多信奉天主教。 安道爾高山峽谷遍布全境,全國平均海拔1100多米,是歐洲地勢最高的國家。


22 則留言:

  1. 雖然睇唔到雪中湖景,但可以感受一陣踏雪行山樂趣也不錯呢!!
    Pintxos一般是用牙籤串好了放在盤子裏===>唔知點解一睇就令我想起腸仔菠蘿串,唔知係咪源自Pintxos又或者簡化版的Pintxos^^
    食物、家具用品都平過香港,咁對附近住果D歐洲人來說是購物天堂了

    回覆刪除
    回覆
    1. 咦!基爾你咁講都可能係噃,到會一定有果D嘛,哈哈~
      這行程無諗過見雪,無諗過行山,就算睇唔到山中湖都幾開心架~
      物價唔係平咁簡單,而是半價甚至只係1/3價錢

      刪除
  2. 風景真係超靚,但我唔識駕車,都係住市鎮近郊算啦。

    回覆刪除
    回覆
    1. 銀仔,快d開工寫遊記啦!哈。

      刪除
    2. 你可以選擇當行山行上去,或的士應該都得,哈哈~
      返左嚟有少少懶左,但主要係港女。你唔覺得近來D文筆靚仔左咩?港女睇唔過眼,話我文筆不通,又成日寫錯字,話要同我執過先準po呀,但執佢就話忙,但又唔比人po⋯

      刪除
  3. wow~~~你好過好多地方~~我要向你好好學習先得~~~~
    我要去拜讀下你既南美之旅先~~

    回覆刪除
    回覆
    1. 唔好玩我啦~
      南美?係喎你倒數緊喎! 希望幫到你,不過我係幾年前去outdate晒Lu...

      刪除
  4. 嚇下你先 ;p
    我要提下銀嫂問銀仔心裡面個黃翠如係邊個先, 嘻嘻嘻嘻(奸笑) 邊有人咁捉蟲架, 呢d野唔講得架!
    嚇完就讚下先, 幅水墨風景真係好掂! 怪唔得開班授徒啦 ^.*

    回覆刪除
    回覆
    1. 我心裡面個黃翠如咪黃翠如囉,呵呵~
      你又玩我,我笨不是開班授課徒,係阿sir想休息吓,9唔9做佢代課老師啫~

      刪除
  5. 回覆
    1. 你上次嚟唔覺咩?呢度好啱你架!

      刪除
    2. 我未去呀,只係睇咗滑雪團想去,不過最後揀咗去芬蘭~
      咁你係咪留間房俾我架...XDDD

      刪除
    3. 我買唔起,你有米D買留間比我吖。 毛毛你一定要去,誠意推介! D遊客好多都唔去滑雪場,總之有山嘅地方就天大地大周圍滑

      刪除
    4. 我都玩晒d錢囉,仲邊有錢買屋!
      我一定要去雪場架,無lift坐我會c架...XDDD

      刪除
    5. 原來係大洗毛毛wakaka~
      咁我等你嘅安道爾遊記啦~~~

      刪除
  6. Silver,現在去旅行行超市發覺很多都平過香港,香港的物價實在太貴了.

    回覆刪除
  7. 請問在安道爾點上網?是否用西班牙sim卡已可收到?

    回覆刪除
  8. 回覆
    1. 對不起我解答唔到你,因為我外遊是不買sim卡的,只連到wifi才上網。

      刪除