2015年6月7日 星期日

Day 16 魔鬼魚之城(開曼群島)

(Day 16) 2014-11-16
住宿:不知名民宿
行程:開曼群島



Captain Marvins 魔鬼魚3站tour每人$45-USD-3小時,終於搵到樣最抵玩既節目,關島睇海豚都要$50-USD啦!今次仲有得落水一齊游噃!原來民宿主人都係幫襯開呢間,都好評喎。

先揸車去附近七哩灘其中一間大型酒店既活動中心集合,無車既就坐旅遊巴士,好似我地自駕既就跟隨車尾。


去到海邊登上遊艇,直接出發到海中心。 浮潛點叫Stingray City,名副其實就係一種叫Stingray既魔鬼魚,係主島外圍既一個珊瑚礁。到達時已看見另一團人係水中同魔鬼魚玩緊,真係好多,起碼有20多條巨大既魔鬼魚呀!我地都落水,水不太深,雙腳可以掂地,但港女較矮則比較困難,要我抱住前行。剛落水時好驚,不停有大過人既魔鬼魚係你腳邊游過,仲擦過你雙腳tim! 好驚踩親佢地而被攻擊,你知佢條尾可以另人一命嗚呼架嘛! 還記得鱷魚先生嘛? 我地戰戰兢兢行到職員位置,職員正在把玩緊一條魔鬼魚替同船既團友影相,而我們都當然排隊與魔鬼魚來一個親密接觸啦!見條魚真係任舞唔嬲,又kiss又抱又攬!


最後隻腳被馬踢既傷口開始痛,看來防水膠布開始頂唔住D鹹水了,於是上返遊艇欣賞,看見D魔鬼魚好似隻小狗咁黐住人唔放,仲識撒嬌擺尾,有D仲撲上人背脊Tim! 好可愛呀!令我對魔鬼魚既誤解完全改觀了~ 可惜只有半小時既相處…


呢張係遊艇尾部落水前一刻影,咁多條點落水呀! 踩親佢咪大獲!


之後去多兩個潛點就走了,我就因腳傷唔再落水,而不諳泳術既港女著住船上既救生衣自己落,無我係身邊就即時出事!俾大浪沖離遊艇,要職員緊急落水拖返黎,真丟臉!哈哈~



回程期間職員用手提電腦整理剛才替我們與魔鬼魚既合照。當然可以購買啦,$52-USD可以買返有自己樣既相。竟然貴過一個人既團費,佢地都預計賺大錢,所以安排即時碌卡付款,之後用dropbox比你下載。 返到住宿已經收到照片,算係高效率,可惜差不多全部對錯焦⋯ 枉佢仲用頂級既全片幅相機!

再次證明,相係人影出來的,比部頂級相機你都無用


上岸後即時揸車回住宿沖涼,之後食美國連鎖Pizza店Papa John's $17.99-CI,貴過關島一倍呀!店員問我地轉唔轉COMBO,我地都唔捨得了。
外賣返民宿食飽後沖涼瞓晏覺,唔知點解遊船河後永遠係咁疲倦呢?


午睡後遊車河,去到小首都George Town是一個死城。今天是星期日,商舖超市通通關門大吉,可能無郵輪泊岸,連遊客都唔見有,只不過是1800剛日落咋,又唔係太晚,即時諗起香港真方便是多麼的幸福啊!

個Pizza太飽未肚餓,將車停係海邊係車上打遊記。




最後一晚豪D選擇食壽司Yoshi Sushi,位於今早集合處既酒店既附近,店內一邊食野一邊酒吧;幾部既電視播放著日本陳年舊戲、卡通(應該是高橋留美子既動漫吧) 我點了壽司刺身,身處島國刺身當然新鮮美味啦,$48-USD算合理價錢,服務也相當不錯,還記得經理相當親切,仲推介我地飲開曼群島既啤酒。有趣既係,坐我地隔離有PAIR外國人,來日本餐廳食炒肉絲麵之類既熱食,另外仲有對情侶叫左一大盤壽司,食左少少就埋單走人,罪過罪過。
食完晚飯,就揸車返民宿早D抖,因為聽日又要飛喇。於呢個百物騰騰騰貴既國度,留多一日會令荷包流血不止。


日本餐廳既網上圖片

17 則留言:

  1. That's an amazing experience! So the Stingray won't attack people at all? They look very tamed!

    回覆刪除
    回覆
    1. 可能佢地多年來習慣與人共存,見到人類即係見到食物,所以咁友善~
      咦! 你都好耐無見啦~

      刪除
  2. 我成日對錯焦嫁,哈哈。。。。。
    Sushi 刺身,生的食品我不敢多吃(三文只吃一點, 其他可免則免),怕拉肚子。

    回覆刪除
    回覆
    1. 無理由噃! 你係咪懶交俾相機用果D幾多點對焦呀?
      哦,原來你肚子唔係太受得生冷野既。 我都係睇當地是否係清澈海水既島國或先進地方先夠膽食咋!

      刪除
  3. 作者已經移除這則留言。

    回覆刪除
  4. 做Greenland Research時撞左入黎!
    你地去D地方真係好正!!!!!
    Cayman Island原來咁多野玩!

    P.S. 買個防水袋黎裝傻瓜機/電話浮潛時影相都好正~唔洗比人斬到一頸血~~~!

    回覆刪除
    回覆
    1. 小紀,希望幫到你有D idea,因為本blog資料欠奉,純粹紀錄我既遊歷咋!
      你都可以,想去就去啦~ Cayman係多野玩,但就小了點特色囉!

      就算買個防水袋都無用架,因為你係唔夠膽隨手捉隻魔鬼魚來玩弄的。

      刪除
  5. 影相要50幾USD,咁相比起那餐日本壽司刺身又幾抵喎
    個海又清又藍,超正呢
    喱個品種的魔鬼魚係咪無毒刺?可以又攬又錫又幾好玩.....^^
    畀大浪沖走====>咁銀嫂有冇鬧你護花不力先?!!kakakaka....

    回覆刪除
    回覆
    1. 貴都無計,珍貴經驗,自己係唔夠膽隨手捉隻魔鬼魚來玩弄的。
      應該都有毒刺呱,但佢唔會無拿拿攻擊人啫。 捉住佢又怕整痛佢拮我,好攪笑~
      好在佢自責無用無鬧我喎呵呵~

      刪除
  6. 通常我都不買那些旅遊相,又貴又影得不好,真係樣樣嘢都好貴喎.

    回覆刪除
    回覆
    1. 我通常都唔會,但今次自己係影唔到呢D相,攬住魔鬼魚又珍貴經驗,無職員在場係唔夠膽隨手捉隻魔鬼魚來玩弄的。
      Cayman咁貴又無特色,所以只留三日兩夜。

      刪除
  7. d水色好靚^^
    你太太好勇呀, 唔識游水都敢落水, 淨係有膽量已經要俾個like
    銀仔, 宜家你隻腳完全好番晒未? 係皮外傷定點?

    回覆刪除
    回覆
    1. 成個加勒比海D水都咁靚架! 快去!
      所以我有比like佢,但佢應該下次唔敢了,哈哈~
      好番啦多謝Venus關心,只是皮外傷啫,都唔夠上次少電單車咁大獲⋯

      刪除
  8. 俾大浪沖離遊艇我都試過,因為掛住睇水底D魚,唔知自己俾D水沖到咁遠,有職員揸架艇嚟救我,不過我見個距離OK,無上艇,自己游返去,好在有蛙鞋,唔係都游唔到返去...XDDD

    回覆刪除
    回覆
    1. 游唔到咪好似港女咁要人救囉,呵呵~

      刪除
    2. 我唔要呀...咁多人睇住,死都要自己游返去扮無事,嗰晚攰到C咗咁呀!

      刪除
    3. 所以港女咪瘀爆囉! 哈哈~ 職員好似奧運咁標準跳水,然後自由式飛過去,拖住港女件救生衣返黎,笑死我wakaka~

      刪除