Day 5 昂貴小島(巴哈馬群島Harbour Island)

(Day 5) 2014-11-5

住宿：Tingum Village hotel

行程：Nassau —> Harbour Island

0500大清早起床

由於屋主稱搭的士去碼頭，起碼要$40-USD，但巴士只需每人$1.5-USD，銀仔咁精打細算，當然搭巴士啦！雖然巴士不能直達，但去到市中心再搭的士都唔會咁貴嘛~

於是0615步行去驚濤拍岸既岸邊大路等車，10號巴士，果然如Shaun所講，"焚機"+ 瘋狂駕駛！ 但呢架車只去到市中心，看見有多架巴士向碼頭方向行駛，細心觀察，有一架7a巴士係去我地要到既地方，最後兩人只用了$6-USD就到了。 銀仔勁! 哈哈~ (自我陶醉) 

落車後有好心人帶路，再有熱心local tour司機送我地一程，結識到一個長居美國既香港女人與其美國丈夫，佢join local tour去Harbour Island day trip，仲話想參加我地婚禮Tim! 如果有賓客都唔錯噃，好可惜佢地係join day tour及要返Nassau出席一個棒球好手既紀錄片首影。

0800開船，3個小時船程1100到達Spanish Wells

之後再轉船到North Eleuthera島、島上再搭車途經機場上客、再搭船，直到Harbour Island 已1200了，睇黎搭飛機也不能直達噃! 所見既遊客9成都係join day tour，但要1500回程，整日搭足8小時交通工具! 即係真正既到此一遊，難道真係來食個飯？

係碼頭有人兜我$40-USD一日golf車，佢以為我地係day trip，當知道明天先還車價錢先提高少少話$50-USD 24hrs，咦！咁day trip租果幾個鍾佢咪好好賺？ 唔怪之當我地係水魚啦!

於是係就近遊客中心攞地圖，睇地形得知Harbour Island原來係一個珊瑚礁島黎架！

先到book 好既住宿Tingum Village hotel check in，間房約$1000-HKD一晚，環境都唔錯喎！其實這住宿是家族經營，算是大型民宿，不過wifi要係大堂先有。呢間酒店算是全島最便宜幾間住宿之一了，可想而知島上物價真係極度昂貴! 

安頓後就攞齊文件，前往最後一晚入住，兼舉行婚禮既酒店Valentines Resort辦婚姻手續。到達位於海岸邊既酒店，真係好靚喎，房價貴一倍都合理！ 

前台職員帶左我地入辦公室，由一位經理接待我們，他先將我地既護照、出世紙正本等影印，並於文件上簽字，該文件係邊個與邊個結為夫婦之類。

於是搵諗住搵D平價午餐，去到望落較平民簡陋既海邊小檔，見主菜最平都要$2x-USD以上，嘩！ 咪同剛才靚酒店價錢一樣！使鬼食你咩… 原來呢D小檔專做day tour遊客生意，因為day tour package有餐劵俾遊客，小檔當然賺到盡。

行左多間餐廳，終於搵到間平少少，但人都唔多個既餐廳，食午餐：$15-USD大蝦飯及$7三文治+飲品，味道還好，不過個老闆木無表情，同呢個風光明媚既小島不太搭調。

食完去隔離超市買D飲品，並由港女駕駛，由我指導，但港女第一次揸Golf車真係雞手鴨腳，仲差D撞到學生哥tim!

返到酒店，職員話Valentines Resort 打過電話搵我地。打返去酒店詢問，原來係影漏左我張入境咭。於是我地又再去搵個經理，佢幫我地影印文件時，話有些文件必今日辦妥，就係一份政府文件，寫明我地既住址，婚姻狀況（當然係Single啦）。不過最得意既係，文件上標明我地係來自一個英國既殖民地。因為我地用BNO入境，而出世紙又係大英帝國既龍獅標誌，哈哈～ 係今時今日香港正值雨傘革命，有部份香港人十分懷念英國管治既時候黎講，又幾特別喎！

粉紅沙灘諗住留返日落先去睇，點知日落係另一面喎! 加上去既係粉紅沙灘偏遠位置，十分荒蕪大風，佈滿海草無人打理，也因光線關係毫無粉紅感覺；於是行去另一面睇日落，去到個遊艇碼頭，相信係另一個既resort範圍。係遊艇碼頭睇日落，竟然連wifi都覆蓋到喎，港女又不忘影相上instagram打卡！

睇完日落返酒店小睡片刻，但瞓過龍。

@2045

結果留係酒店內食晚餐，點知一睇餐牌就呆左，最平都要$35-USD，比起我早前係更靚更豪華既Valentines Resort 更貴。由於太昂貴，成千蚊一餐真係唔捨得食，於是兩人只叫一個seafood combo(正常size) $40-USD，一罐可樂$2，連+15%小費，埋單一刻真係肉赤到爆！ 海鮮係小島來講真係無本生利，點解仲要咁貴？ 如每人食一個main course，一頓晚餐就差不多係一晚既房價，有無咁唔合理架？

晚飯後去碼頭睇當地既Junkanoo街頭音樂巡遊，大部分本島村民都來參與，澎湃既加勒比海音樂，村民勁歌熱舞，為寧靜小島帶來一個熱鬧既晚上。