Day 4 最愛飲品(巴哈馬群島Nassau)

(Day 4) 2014-11-4

住宿：民宿$400-HKD

行程：Nassau（巴哈馬群島）

出發前講開會去巴哈馬群島註冊，朋友第一時間反應係「吓？巴拿馬？」，只有係澳洲長大既表妹一聽就知道 “wow, Bahamas~~~” 一聲嚮往既回應。

今日用$45-USD一日租阿Shaun 架車一日，駕駛時戰戰兢兢，因聽屋主阿Shaun講Nassau好危險，又老笠又爆車，仲話D人會係馬路整D障礙物來打劫，起初見到D障礙物都特別Alert架!

先去出發去機場攞返兩個背囊 ，一出路口已俾湛藍既海水吸引著我既眼睛，點解加勒比海d水會咁藍架！

攞完行李放低返guesthouse後，即時出外食Brunch。因為阿Shaun話唔好放係車上，會比人扑車喎! 

去到近貨櫃碼頭Arawak Cay附近有一個叫Fish Fry的地方，有好多餐廳。路經海邊時，見到大型垃圾桶，即香港係垃圾房附近有轆果款，裝滿晒巨型海螺既殻，無錯! 就係加勒比海既特產Conch勒! 平時阿媽煲既螺頭湯唔知產地係咪加勒比海呢？

去到Shaun介紹goldie’s 開餐，點了海螺沙律、Snapper魚飯、雞肉長通粉及飲品，呢餐埋單一共$50-USD，初次感受到物價一D都唔親切，一餐三、四百蚊都應該唔少得! 不過又真係好飽肚，飽到食唔晒。

Snapper係今次旅程餐牌上較常見既海鮮，而上網搵資料原來只係一種魚既統稱，再細分有好幾種，圖片所見有一種有點像大眼雞! 

而飲品我地就初次嚐試到一款麥味飲品叫VitaMalt，感覺像啤酒，但就無酒精成份，有好濃烈既麥味，好香，成為這個旅程最愛既飲品! 回港上網搜尋後，得知原來係丹麥品牌，跟啤酒成份大致一樣，只是無進行發酵，也是一款營養飲品，可惜香港無得賣，但台灣人就識貨，係台灣網站摷到好多相關資料。其後係惠康到搵到有9成似既德國黑麥汁，即時瘋狂入貨呀! 真係好正架~

台灣網站這樣介紹的：

VITAMALT®活力黑麥芽汁

生產國：丹麥

主成份：水、糖、大麥麥芽、大麥、忽布花、碳酸水、檸檬酸、維生素(B1、B2、B3、B6、B5)

VITAMALT®活力黑麥芽汁富含對人體有益的維生素及礦物質，味道香醇、營養豐富且不含酒精，更獨特且重要的是--「不含焦糖色素」，適合全家大小、男女老少平日補給及聚會同歡，是一瓶完美出色的機能性飲料。

香港超市搵到既品牌

食完行左陣泊滿貨櫃車既貨櫃碼頭，見到遠處有多艘豪華郵輪停泊，看來係加勒比郵輪必經之地噃! 

阿Shaun淨低半缸油比我，諗住今日會周圍去，所以去油站打爆油缸，結賬時比美金，但一對一咁找回巴哈馬錢比我，好似比人搵笨咁當然唔制啦! 猶疑之際都即時打開電話個匯率app，原來真係同美金一對一喎! 梗係即時say sorry啦~ 

之後揸車上到位於高地既Fort Charlotte炮台，見正有一團遊客，不過見要收入場費又無乜特別唔入去了。於是揸落去市中心行街諗住買D手信，但街上店舖及手信市場，幾十間舖手信全部一式一樣，好行貨嘅熱帶風情，應該從同一間大型工廠批發出來，從未試過咁悶，所以完全無收穫。 反而係一間賣全白色衣服既服裝店用幾百蚊(港紙)買左條三角骨褲，諗住行禮用，而港女都買左條連身裙。其實都有帶條扯布褲嚟，突然諗起白色靚D，不過如果一早諗住買，應該係香港Uniqlo買會抵D既⋯

炮台上可高少少望落去

市中心街景

揸車途經一個大型地盤，差不多完工，從當地人得知，國內集團正興建超大型賭場酒店(現時已開幕)，返到香港”新X期”雜誌有賣，話係全西半球最大型渡假村落成! 看來巴哈馬將會有一輪巨變了。

之後再揸車過埋Paradise Island，橋費忘記了兩或三蚊美金，不過Paradise Island全島都是大型酒店、渡假村範圍，毫無特別，不去也吧!

諗住揸去Nassau既另一面睇日落點之又行錯路，錯過了⋯ 去睇日落又睇唔成，返歸! 返到海傍諗住買個椰青竟要$5-USD一個! 黐線! 自從係羅塔島飲過免費椰青後，係呢D島國垂手可得既椰青，都唔想再花錢買了。

揸左一日車覺得都算安全既，可能主要都係市中心遊客區駕駛呱。

最後去超市入貨，諗住買屋主飲開既啤酒賣，但就無得賣，之前見屋主有餵開生肉比佢D狗食，於是買一盒雞髀俾佢一對愛犬。屋主後來解釋酒精類飲品係要去保安較嚴密既酒舖先買到。

港女原本俾咗張$100-USD俾屋主作租車費($40-USD)，等佢老婆返嚟找錢。當佢用完車車完佢老婆返嚟，佢找錢俾港女時，原來係同一張$100紙，佢話因為我哋入滿架車嘅油缸，而且當係結婚禮物喎! 住民宿真係好多驚喜，阿Shuan同佢老婆真係好人!

由於午餐食滯左，晚上都未有肚餓既感覺，加上今晚要早瞓所以晚餐都慳返，連屋主買的Domingo Pizza都無福消受。臨瞓前作正式道別，因為明天大清早起床離開，應該無機會見到了。

@2030