Day 3 行李Delay(巴哈馬群島Nassau)

(Day 3) 2014-11-3

住宿：民宿$400-HKD

行程：墨西哥城 —> 邁阿密 —> Nassau(巴哈馬群島)

晨早起床，原本打算去尋日去過既街市食早餐，點知成個街市都無咁早開，於是在街市外圍食了一舊甜既Elote(用荷葉包住D糯米，內有甜餡料)

網上圖片

之後就行番剛才路過既地道餐館，食墨西哥傳統平民早餐。老細仲好好人，俾條圍裙我扮大廚拍照留念，可惜又係傻瓜機... 唔識食乜唯有亂咁點，最後跟其他店內既人食了牛雜、tortilla等等，野食來到唔識食個大嬸職員教我地食，碗湯要用手磨碎D葉放落去架！ 墨西哥食物普遍都係偏辣，但又幾過癮。 結賬時發現都唔平喎，咁地道既食店竟然貴過香港，要$100-peso($55-HKD)。臨走仲派咭片Tim，連開間小店都有咭片～

諗住搭地鐵去機場點知計錯時間，無奈要搭的士去機場，原來跟咪錶跳都只需$52-peso($30-HKD)，跟早前係機場的士櫃台看到既$3xx Peso平了五倍！不過回想返當時既的士靚D新D，可能係專營機場既貴價的士。

去巴哈馬群島仍然坐American Airlines，要經邁阿密轉機先到，全程3個多小時大昏迷!

到達美國領土當然又係無分你是否轉機啦！一樣又係打兩次蛇餅，輪到我地時個關員同我地係咁吹水(唔怪得條隊咁慢啦)，仲唔識分我本BNO，以為係英國護照，好奇為何有美國簽證，話用電子簽證ESTA就得。

美國轉機我覺得起碼預三小時，其實班機已早左半小時到，即有共兩小時轉機，但都只係僅僅夠時間，當到達閘口時已剛開始登機了，由於兩程短程機都無飛機餐提供，唔想餓死唯有趁空檔買個麵包食！($14-USD)

機上無餐派只有飲品，此時拎出個麵包自製飛機餐～

一個小時機程，到巴哈馬群島首都Nassau(拿蘇)，1730落機時已經開始日落，行李delay終於第一次發生係我身上了! 應該係接駁時間太趕，D行李運送唔切，因為有好幾個人一樣都係攞唔到行李，一問之下都係剛才從邁阿密轉機過來既旅客，於是又一同係航空公司櫃檯做登記。

屋主Shaun及其老婆揸車來接機，真係唔好意思要佢久等。上車後佢問我地要唔要去補給，並且致電航空公司好努力幫我地爭取將delay行李送到府上，但不得要領，回覆規定只送往酒店，因為方便安檢喎⋯ Shaun話可以提供沖涼用品，所以都無需要購物了，直接回民宿吧！不過就無乾淨內衣褲著了⋯

好靚既兩層guesthouse，好好人既屋主，放行李上房發現除了有基本既毛巾外，仲好貼心咁有一支全新既太陽油同一包kitkat朱古力。屋主知我地未食飯仲請我地一齊食墨西哥taco，由Shaun泡製左一窩紅酒燜牛肉，當然我都有幫手、順便學下野啦!  幫手切吓牛油果之類配菜，我覺得其實好簡單，配菜自由發揮，有D生果、有芝士、洋蔥，海鮮醬、仲有Shaun太太的秘製辣辣沙律等⋯ 你鍾意乜配菜就自己放落Taco上卷住食啦~ 傾談間兩公婆都是美國人，來自新墨西哥州，女既係大學教文學，佢地話係當美國搵到呢份工時，商量緊要搬過黎巴哈馬住，一句“why not”，就索性變賣晒所有財產，只帶4個喼同兩隻大狗搬來巴哈馬，這大宅月租只需$1600-USD。晚飯期間我地交流教狗心得，飯後仲唔比我地幫手執野，話假期應該乜都唔做既，哈哈～ 

而佢呢句“Why not” 又給我啟示了! 

以上均取自Airbnb圖片，上兩張係大廳，最下既係我既房間~

飯後大家一起再交流，Shaun好好奇問我地香港人是否入人屋企都會除鞋(因為我入屋有問)。我就話睇情況而定，如間屋好似屋主間屋地版立立令當然會除啦，都唔想整污糟嘛，不過佢話美國人唔會咁做喎! 呵呵，原來有文化差異~ 另外講開來巴哈馬旅行問題，佢覺得這裡住宿太貴，所以佢呢間民宿特別平，比其他民宿平百零蚊，而佢呢間只需$450-HKD，遇上咁好人屋主真係太好了~ 最後講到治安問題佢話好危險，放袋係車內停泊會比人扑車偷野，行街又話會比人搶劫⋯ 嘩! 真係咁危險？ 佢話都係睇領事館既新聞得知喎! 諗住係渡假勝地會好安全tim⋯

（今日又唔見晒D相）