Day 6 黃金圈(冰島Gold Circle)

(Day 6) 2012-09-26
住宿：Hotel Hekla
行程：冰島雷克雅未克 --> (Thingvellir , Geysir, Gullfoss) --> Selfoss

係民宿食完早餐,租車公司職員晨早就攞齊文件,及揸埋我地租既車來到民宿攪手續; 一共用$155000-ISK租左落地兩個月既Suzuki 4驅車, 約每日$1000-HKD仲已包埋GPS tim!!! 除返每人約$250-HKD揸新車真係正到爆呀! 不過油費就•••


民宿好樂於助人既老闆娘!


民宿早餐,下面既係呢個行程經常食到既魚仔~


揸新車~

先去山丘上全冰島最著名既雷克雅未克教大教堂先~ (Hallgrimskirkja)

教堂設計新穎,突顯北歐既風格! 教堂內部有一個好大既管風琴; 適逢有人練琴,教堂內既管風琴聲音十分洪量!

朝早落完雨好多烏雲,但參觀完教堂出來後竟有藍天喎! 影相當堂靚晒~

左圖係巨型既管風琴,好鬼響亮

事不宜遲,去銀行換完錢,就set 好GPS就去最近既地質公園進發! @1430

駛離市中心,初到郊外,心情十分愉快,仲隨即見到幾隻冰島野馬Tim!

未到地質公園前,先途經一個荒郊教堂參觀; 及後路經之地,全是岩漿已凝固黑黝黝既岩石,岩石上全是苔蘚類植物。

 

行吓停吓,約兩小時既車程到達地質公園,地質公園處於兩個斷層間、(即美洲板塊及歐亞板塊) 的7 公里寬的地塹帶，目前仍以平均每年 2 公分的速度張裂; 呢個地質公園係我既簡稱,維基上咁描述的:

議會舊址國家公園（Thingvellir），位於冰島西南部，首都東部50公里處，公元930年冰島早期移民在此處舉行第一次全國「人民代表大會」，成立了世界上最早的由民主方式選舉出來的議會和第一部冰島憲法。這兒風景優美，以歐亞和美洲兩大板塊的斷裂谷地和純淨幽深的議會湖而著名世界。此公園也是世界文化和自然遺產風景勝地。

行過裂谷,

睇過歐亞及美洲板塊,係時候食自備午餐勒! 選擇一處風景幽美,早前行過有梯級既地方坐下食三文治及熟蛋; 其間一團操普通話既團路過影相,好似嫌我地左住佢影相咁,咁我地迷坐開D讓佢地影囉! 其間團中一個男人與我們交談,原來佢地全是來自美國既華人,之後仲語帶輕蔑既既語氣問我地香港人原來興咁樣食野架咩! 當時tim嫂不以為然答左佢因為風景靚同我地肚餓... 佢呢句說話直到佢地離開左我地先發現係言語中有骨... 想反駁都駁唔到Lu...

呸!!! 乜Q野旅居外國就自以為好見識廣博,佢可能都只係識瑟縮於華人社區啫! 乜係歐美唔係大把人係公園草地野餐曬太陽瞓覺睇書架咩!?

之後揸車去附近既間歇泉Geysir; 先去一個好大既紀念品店借廁所順便行吓, 裡面有隻北極熊標本,原來就係早前盪失路去左冰島既北極熊黎架!

步行前往經過無數熱氣或熱水既氣孔,噴出漫天白煙,這情景似足之前係玻利維亞果一堆既間歇泉,但兩者有好大分別,冰島長滿植物,而玻利維亞既寸草不生既荒漠,一個個洞噴出白煙,仿佛去左其他星球一樣呀!

去到最大既間歇泉,係冰島最出名既景點,噴出來沸騰既水柱有成十層樓咁高! 大約十多分鐘就噴一噴~

我首先影完瀑布,好Perfect! 再幫Tim哥tim嫂影; 可惜到我同瀑布合照時,我set機set得唔好,影左兩次都唔係影得太好,一係就泉水只噴小小... 見Tim哥好似已好無聊有D想走,因仲有一個景點要去及太晏要搵住宿,所以不得已要離開... 其實我仲想影到好為止,不過始終唔係自己一個人去... 一直為影唔到呢張相而耿耿於懷,所以我發覺真係好鍾意一個人去旅行架...

之後一氣呵成去埋最後一個景點Gullfoss瀑布,Gullfoss好似件cake一樣三角形呀! Gullfoss有個紀念品商店,我同港女各買左一件冷衫! 出發前執行李除左帶大褸,特登唔帶厚衫,就係為左買呢件冰島style手織既厚羊毛冷衫咋!!! 這裡價錢較平一點,價錢約$2200-HKD; 由於係手職,不能盡信個size,一定要穿上身試吓!




遇正秋天一片金黃~

由於地質公園,間歇泉及瀑布三個著名景點都距離首都好近,遊客如無乜時間既通常只係玩呢三個景點,所以由首都向呢三個景點兜一圈,就有所謂黃金圈既稱號!

於是摸黑搵住宿,先信錯GPS帶我地去一個方圓十里都無人既荒山野領,之後再沿路慢慢搵,路經一個好大既溫室,後來返香港電視係咁播有關冰島既節目,才知呢個溫室好大,D蔬菜能夠供應本地,唔使依賴入口! 所以我係超市見到既蔬果都無預期既貴。

最後搵左一間半間後,係2030先搵到啱既住宿咋! 呢間係應該有幾十間房既大酒店,但就唔覺有人住! 詢問一吓仲有無野食,老闆娘話個廚師已收工,但就可以叫佢返黎整比我地食喎! 咁又唔使,最後佢借出個大廚房比我地整長通粉食~


溫室

部份既冰島人篤信精靈既存在