Day 5 初到貴境(冰島雷克雅未克)

(Day 5) 2012-09-25
住宿：Baldursbra Guesthouse
行程：英國London --> 冰島雷克雅未克



0730起床,呃埋個free早餐食Tim~

集齊4人，出發! Share Taxi 共£20，去到一個搭Easy Bus往機場既地方。明明係一個Easy Bus既總站，但就偏偏無得上客，要你行出路口路邊既巴士站先可以上車，真吹脹!搭Easy Bus 每人£3，車程約45分鐘呀! 計番地鐵都要£2一程，咁Easy Bus又真係好抵喎~
中午到達Gatwick 機場; 1425 Boarding，見到架Iceland Express 好興奮呀! 真係無諗過咁快會去到冰島架~





Iceland Express 係廉航，所以無餐供應，餐牌顯示既價錢合理，是英國一般既價錢。於是食左個卷卷$700-Kr($44-HKD)

冰島名牌

1650到達首都雷克雅未克機場,無諗過特衰咁順利!機場設計得十分新穎,好似朗豪坊! 但就毫無人氣,因為實在太少航班啦...牆上,窗上有好多冰島既文學節錄,據做翻譯工作,研究開文字既港女話,冰島歷來既文字都只係變化得好少,所以好多人都睇得明冰島D古文或文學作品喎!

到境大堂有旅客中心,可以攞到大量資訊,港女不停攞,攪到比我忍唔住鬧佢... 對唔住,語氣重左tim... hehe~ 因為之前就算係我都有咁既情況,好似旅遊展攞左好多資料,但就無睇,變為垃圾又唔環保,所以及後我再去旅遊展基本上都係齋行!

旅客中心旁就係Fly Bus既櫃台, €7.5 per person，可直達市中心! 車上有wifi供應~

起初搵到就在巴士站不遠既民宿,但就full晒... 於是繼續尋找,最後搵到間Baldursbra Guesthouse $15000($950-HKD) 一間大房可住4人,共用平台有個大浴缸,提供冰島最多既溫泉水比你浸過飽! 但我就無時間浸... 而且這裡有Very helpful 既老闆娘,講解點去市中心,同幫我地聽日安排租車既事宜; 點解搵佢安排,迷因為比預先上網睇既價錢平囉!


Guesthouse及共用大廳,任飲既茶包~

住既大房

放低完行李已天黑,於是步行去市中心,由於過了晚上8點,好多食肆已關門,留下比較貴既... 路經一處書中有介紹,話全世界最美味,連美國總統克淫頓都食過既熱狗店,緊係試吓啦~ 兩人食一隻,每隻狗要$320(即$20-HKD)

 

冰島就算已破產,消費仍然好高,晚餐見咁貴大家都唔捨得食;來回行左市中心短短主要食野既街兩轉都決定唔到...(唔知Tim哥佢地係唔係就我呢) 最後晚餐都係超市叮野食$640($40-HKD); 而tim哥佢地就買左方包返住宿食,估唔到Esther 咁有錢都捱麵包喎! 我攞左佢地兩塊麵包,超市裡有個醬料bar枱,任你塗上麵包度食。

@2130