Day 2 品味英倫(英國利物浦)

2012-09-22(Day 2)
住宿：無名B&B
行程：多哈 --> 倫敦--> Liverpool


晨早0730終於到達倫敦希斯路機場，呢程機最易過，因為基本上全程瞓足，雖然不太”冧”，但真的多謝一位老友令我既空間咁舒適呀~ 長途機尤其重要!

過關時雖然人好多打晒蛇餅，個牌仲話要45分鐘tim••• 不愧為全球最繁忙既機場呀！ 但係D關員效率好快，十多分鐘就到啦！特區護照只係問左幾句就蓋印，可能我答得夠詳細呱！當我答個關員話將會去Greenland時，佢即時流露出驚訝既表情••• 拿！唔好只係話我淨係識唱衰本特區護照，好都照講••• 一次啦！因為順利過關係應該既！我一直都講，有直航機既機場，特區護照都不太大問題，考驗就遲D睇吓啦！


終於踏足曾經係我地香港既宗主國啦！ 心情有點複雜••• 於是即時去Underground, 用人地借既Oyster咭去便利店增值，Oyster咭即係等於香港既八達通咁用。
由於要馬不停蹄去利物浦，一早係網上book定既Vigin公司既火車，因為一早book定平成半架！而坐利物浦既火車就需要係地鐵Euston站既火車站搭。所以轉幾程地鐵，要去到Paddington既售票機用credit取票...

當去到車站既售票機時，前面個人一挪就要挪十幾張飛，起碼攪左十多分鐘，而我排隔離個部機又壞機! 浪費左好多時間去取車票••• 眼見book定既火車未必趕得到，不過都要盡最大努力,跑上跑落搵月台再轉車，去到Euston車站又要”一抽二能”跑去火車站，最後都係趕唔到1315開出既火車••• 好在票務處staff免費幫我地改一小時後開出既火車咋~
自到達英國開始，沿途有同不少人交流，他們全都十分nice,同我係香港認識既大部份既英國人一樣，仲好鍾意講笑Tim~ 就好似先前要改火車票個職員一樣，我地遲到要改車票，怕佢要收charge緊係先講出原因啦，當講出先前所遇到既原因時，佢竟然話你應該用機關槍去數射部機喎••• 哈哈〜 我終於體驗到陶傑所講英國人既幽默啦~



兩個零鐘既車程，沿途風景很美，有馬有羊，有一卷卷既禾桿草，不過我真的太眼瞓了，Zzz•••


1415準時到達利物浦，好容易行幾條街就搵到預約好既民宿。民宿係兩個馬來西亞女留學生租既，有兩房既單位，佢地就住同一間房瞓錄架床，另一間就租比遊客。 放低完行李，著到靚靚就出發去食Afternoon tea啦!

食既地方係Hilton酒店，講明要著smart casual... 而我亦都知英國好人靠衣裝既,著得衰D有錢都無得入! 因為出發前特登睇返陶傑既細說名城來了解多一點英國，陶傑主持得風趣又生鬼••• 所以我就帶左件裇衫等斯文服飾，同我稍後既行程格格不入•••亦都令到我既行李，史無前例咁多咁重呀! 於是換噃套靚仔衫就出發啦！ 我亦都係旅遊中史無前例咁靚仔架~
一般港女對Afternoon tea 趨之若鶩，同行既港女亦都一樣啦！ 所以呢個節目係特登為佢而設既！
堂堂酒店Afternoon Tea 都唔係好貴， 都只係£13一個人••• 香港普通既Afternoon Tea都唔得啦！ 仲要係英國玄門正宗喎！ 不過見到D人原來牛記笠記都食得喎！仲要有枱西人女人講野鬼死咁大聲Tim...其實我以前背住個背包一定唔會食呢D感覺貴價既野，不過自從同港女後又改觀喎！ 如果一餐合理既價錢，又可以了解到當地既文化又真係唔錯，值得嘗試噃~ (雖然用百幾蚊食三文治同cake我唔識太懂欣賞)
食呢個afternoon tea,我不禁又話隔離個港女：拿！使乜係香港成日諗住扮上等人用二百幾蚊食afternoon tea，去旅行食玄門正宗既野啦！ 仲平過香港，仲要係酒店喎！

早前係 IFC商場見過人食,係商場既open area一枱枱坐晒係度,價錢貴之餘又無格調!

The Beatles博物館要£13，就算唔係fans都好值得睇。我就特登出發前，做定晒功課，聽左好多Beatles既歌架~

Yellow Submarine~

離博物館不太遠，見個日落咁靚，即時叫杯啤酒欣賞美麗既日落 £3•5; 之後就索性係度食埋，來英國必試既Fish & Chips £8.5。 由於D Afternoon Tea 都未消化晒，所以兩個人食一蝶••• 真係好美味呀！ Fish係成條架！ 咁既價錢香港都唔得啦！ 我發覺，英國既物價比香港還要抵呀~

食完fish & Chip 返B&B途中路經投注站,為聽日入場睇波落左注來刺激吓先~