Day 16 珍惜食物(俄羅斯聖彼得堡)

(Day 16) 2012-03-24

住宿 : 航班上
行程 ：俄羅斯聖彼得堡 --> 莫斯科 --> 北京

今日係旅行既最後一日,餘下既行程決定去冬宮博物館及列寧格勒抗戰紀念館。
先係0830起床,早餐食香港帶來既即食麥片,同埋尋晚買既麵包。

冬宮1000開館,十點多入內參觀,$400-RB = $100-HKD影相費用另計,要$200-RB。 先寄存D手提袋,同大褸,(唔使錢) 然後輕裝去參觀~

當由一樓登上金碧輝煌既階梯,雕欄玉砌,真的感到有一點夢幻,果然係沙皇既皇宮喎！ 二樓全層係歐洲展區,有種似曾相識既感覺,因為畫工細緻既天花,一度又一度既門,與梵帝崗博物館好似呀! 除了有回到封建沙皇果種奢華生活外,仲有回到8年前浪遊初期果種空虛既感覺呀!

之後去到無人行既一樓亞洲展區,我想睇既中亞展館,可惜唔知係迷無人睇既關係,竟然無英文旁述! 真失敗•••其實參觀冬宮,都係對裡面既金碧輝煌興趣大D~ 果D文物,間間博物館都係差不多啦~


金碧輝煌既階梯

一度又一度既門,與梵帝崗博物館好似呀!

二樓望出窗外既廣場

最後一站,唔係去D乜野一級名勝,而是選擇去列寧格勒戰爭紀念館,因為我鍾意歷史嘛~

由冬宮沿河步行去戰爭館時,遠眺對岸,發覺有個景點更吸引呀! 望見一座好Sharp醒既清真寺,全座都用藍色既馬賽克,似足係烏茲別克時見過既神學院呀~

 

再行前D就見到一隻戰艦,又係對岸... 原來當年日俄戰爭,俄國艦隊既死剩種就泊係對岸喎! 我讀歷史時好記得呢一課,因為教歷史既老sir講得生動有趣,先係黑板畫出一個世界地圖,講解當年俄國頂頂大名既波羅的海艦隊,怎樣繞過大半過地球,(當時未有蘇彝士運河),繞過歐洲及非洲大陸,經印度東南亞... 千里沼沼來到日本,真係未打都無左半條命呀! 所以日本就企定定等你來,一個以逸待勞就輕易令呢隊頂頂大名既艦艇全軍覆沒啦...

 

 

後來上網資料時,原來有關對對岸既介紹真的很少••• 但我就反而對對岸幾有興趣噃! 不過如果要過埋對岸,真的有點遠同唔夠時間,都係乖乖照原定行程吧! 將來有機會再補返吧~

結晒冰既波羅的海

讀書時鍾意讀歷史既我,係呢個紀念館介紹二次大戰其中一幕最慘烈戰役,當然不容錯過啦! 當年希特勒既德軍足足封鎖了當時叫列寧格勒既聖彼得堡900日,天寒地凍缺水又缺糧••• 今次既參觀令我重新認識呢段歷史。
入場費$200-RB,入到館內有一種憐憫+欣慰既感覺,因為館內既職員,全是滿頭白髮,相信都超過70歲既老婆婆黎架! 佢地全都好熱心,而且好主動咁介紹展品,雖然明知我地聽唔明俄文•••

呢班老婆婆全都好慈祥,有別於一般外表冷酷既俄國人,好似自己親人一樣, 相信呢班婆婆都經歷過呢段慘烈既戰役,真係想與她們來過擁抱呀! 當地政府都唔錯,令佢地臨老都搵到自己興趣既工作!



館內不準拍照! 但我就見好多人都影,咁我唯有尊重返展館,只用手機拍下幾張吧! 館內展出有關該戰役既展品,包括軍服及彈藥,最令我印象深刻,就係當年被封鎖時,每人每日只係分到既麵包,加埋一張戰爭時當地人瘦過埃塞俄比亞皮包骨既相,覺得自己真的很幸福呀!

中國人既陋習係咪要反思呢? (包括埋我有D既親戚)點解要叫到成枱都係又食唔晒呢? 點解要剩咁多廚餘呢? 我記有一次食舊同學既滿月宴,真係食剩太多野啦! 臨走打包盒炒飯(因為我一個人住嘛,第二晚可以唔使煩),就比D舊同學笑,我就即時講笑咁話佢地,[你地個個都有小朋友架,因住折墮呀!]
睇完戰爭館,步出門口既一刻心情也比較沈重•••




每人每日只係分到既麵包

時間無多,返酒店攞埋行李,就路經食埋係俄羅斯既最後一餐,間餐廳好有前蘇聯既特色~ 分別點左兩種唔同既餃子; 食完就搭地鐵再轉巴士去機場,搭巴士時好在問一問,差點上錯國際線客運大樓既巴士呀！好在車程比想象中短,巴士既車程約20分鐘就到機場啦！

港女買既俄羅斯黑茶


回程搭俄航返莫斯科,轉海南航空返北京,香港航空返香港。

波羅的海之旅完結~

大雪來送我地一程

再見冰封國度


莫斯科起飛後影到既,唔知係咪秘密基地? 死啦...會唔會比人追殺架!!!

 

P.S.臨降落北京首都機場前係航機上播放一段入境片段,該片好似幾十年前拍既一樣蒙查查,個女關員好似攪到啱啱改革開放一樣,唔該祖國快D換過呢段”粵語殘片”,以免有損國家形象!