Day 10 到此一遊(俄羅斯莫斯科)

(Day 10) 2012-03-18
住宿 ：Pyjamas Hostel $900-RB = $200-HKD

行程 ：俄羅斯莫斯科

會合左女友後,我既遊遊方式亦都截然不同,我奉行get lost主義,旅途中撞吓板,miss左班車,甚至搵唔到住宿等等...
都覺得係一個有趣既經歷,但係佢就成日話自己係處女座性格,要plan好晒每一樣既野,一D出錯都唔想喎! 所以既然佢plan好,就一切由佢話事,我就當中加點意見或者質疑吓佢~ 而我亦都十年不變,當有人plan好,或有人一齊去時,我就變得毫無主見,特別係完全唔睇,唔記所有資料,航班,時間等等等! 所以我都無乜資料記下來~

今日行程好簡單,先去 Felt Market買紀念品,並且路經幾個有地下皇宮之稱既地鐵站,晚上黎個夜遊紅牆~

早餐食香港帶來既即食麥片+薯蓉,並將連日來既污糟衣物交給Hostel既洗衣服務,連埋乾衣都只係約$30-HKD,都算合理! 諗住天寒地凍D衣物會比大熱天時乾淨D啦,內衣就當然啦! 不過條褲就... 因為雪地上,或溶雪既污水沾滿了褲腳呀! 旅途上既洗衣服務都係第一次咋! 通常我都係自己即日用手洗的~

Flea Market位於"遊擊隊站"(Izmailovskaya) ,要轉幾次車,好彩佢搵好晒資料,如果唔係地鐵淨係得俄文,都幾頭痕~ 其中一程地鐵既車箱比較先進,有電子報站燈,等你唔使估估吓自己係邊一個站~

遊擊隊站都幾有遊擊隊色彩噃

~

係地鐵上到地面,Flea market就在不遠處,入場費$10-RB($2.5-HKD)

Flea Market 門口賣既係衫褲鞋襪等日常用品,入到裡面有林林總總既紀念品賣,軍用物品,共產年代物品,俄羅斯娃娃,洋蔥頭東正教堂模型等! 當然熱門既紀念品我都有買下啦~

逛左市集兩個鐘，消費兩人$2800-RB($700-HKD) 滿載而歸~

呢檔既老闆娘仲話上過雜誌Tim~ 我買左佢身後好多個洋蔥頭呀~

係市集內逛到尾聲時,我於一檔小販既地方等候,突然一盆冷水照頭淋!!! 原來簷篷上既雪已溶為水,不勝負荷就倒了下來,呢盆冷水好彩淋得唔正,只淋到我後尾枕,及背部... 令到髮尾同條頸濕晒! 還好穿有多件既衣物及大褸,但都有少量既雪水流左落背脊,好凍呀!!!
午餐搭一個站,去書上推介既餐廳,當然食呢part由為食女友安排啦! 呢間餐廳既模式同早前食既”MyMy”差不多, 但就感覺高級一點點~ 午餐兩人$570-RB($145-HKD) 臨走前,飲係俄國經常飲既黑茶; 據講,依家D港女好鍾意去IFC果間TWG用成舊水飲呢D黑茶,不過茶既牌子就用Twinings,不過Twinings都唔係貴丫! 成舊水仲話無得加水tim!!! 依家D人都唔知係迷真係咁高尚,佢講得比我聽就緊係有飲過啦! 我要話比佢聽,你咁鍾意飲就比你飲過夠,點解唔留番D錢,去到外國享受更價廉物美或者更地道既事物呢? 佢都覺得很有道理,開始慢慢被我感染~ 畢竟用親身去體驗,更勝係香港盲目崇洋丫!

係餐廳臨走前,有個當地人用普通話問我地布有無野需要幫忙喎!!! 原來他正學緊普通話,仲話來過香港旅行tim~ 嘿! 冷漠既俄國人都有熱情既一面~

食完午餐,多得餐廳既乾燥暖氣,令到被雪水淋濕既大褸乾左大半啦~

食完飯再逛多幾個地鐵站,莫斯科地鐵站就像一座大型既藝術館,牆身,天花既雕刻,共產時代既人像,標誌,吊燈等等,真的有如一個地下皇宮呀! 參觀完地鐵站就返Hostel放低D戰利品,再去紅牆等名勝~

Komsomolskaya憤青團站... 唔係,係共青團站至啱~
右下:Prospekt Mira站

我好鍾意呢張相~
由於Hostel 距離紅牆等名勝不太遠,決定步行沿河畔區前往,由天光行到天黑; 於是就選擇左河道上的一條橋,等待紅牆開燈,雖然烏雲密佈,但打晒燈既紅牆仍然非常吸引~

之後參觀埋克里姆林宮，巴素利教堂等~




開燈啦~




遇正落旗儀式

天黑影相當然要set腳架影相啦,如果唔係影得唔清楚同唔靚架! 我就由早前比較少人行既河畔區一路set腳架,經紅牆,克里姆林宮,巴素利教堂等等... 都覺得治安唔錯噃,尤其是克里姆林宮既廣場,幾步就有警察站崗,而且途人都個個攞住相機影相,再加上經過幾日係俄國既親身感受,俄國既治安都十分唔錯~ 比較返網上討論區幾年前所講,係紅牆既治安不靖,多吉卜賽人偷竊,今日我就完全見唔到喎~ 雖然普京都算是比較獨裁,但係治安都攪得唔錯,怪不得仍受好多既俄國人愛戴啦~

列寧墓

歷史博物館

金百貨

聖巴素教堂+紅牆鐘樓

今日真係行左好多路,一口氣去晒著名既景點,這亦都係我既旅遊方式,呢D坐落大城市耳熟能詳既景點,到此一遊就夠啦! 物價高之餘也多遊客,亦很商業化! 我不太鍾意,寧願留番多D時間係小鎮!

晚餐諗住返Hostel附近,尋日食過唔錯既"MyMy",一於帶佢去食吓先~ 返到去食晚餐已是1030啦,兩人共食左$658-RB($200-HKD)