續Day 2 教堂之城(立陶宛紐維爾斯)

續(Day 2) 2012-03-10

住宿 ：Turistu Nakvynes Namai Hostel $60-LT
行程 ：莫斯科 --＞ 立陶宛紐維爾斯

波羅的海寒冷指數:0℃

入境後換左$100-USD,然後係Info centre攞地圖等旅遊資料;個好親切靚女staff英文好流利,我又讚佢英文叻佢又讚我英文勁,大家互免一番後,就聽從佢既資訊搭1號巴士去市中心;十多分鐘既車程就好快到左市中心啦! 係巴士總站斜對面搵到間Hostel,Single room只係$60-LT一晚咋~

(即$180-HKD)於是係酒店Plan吓係立陶宛既行程,初步決定今日既節目係漫遊古城~



搭巴士時同司機買飛,然後張飛就要自己打窿架~


住宿~

失望既係落緊雨而唔係落雪••• 雖然零度不過都唔太凍,地下既冰好滑呀架! 著左防滑底既red wing都差D滑親呀！不過之後深究過,係無一種鞋係防冰果種防滑既,除非係有釘爪果種專行冰川既鞋啦~

於是就輕裝上陣,先經過一個當地人既街市裡,係一間餐廳high tea先~ 不過餐牌得當地文,亂點之下叫左個炸雲吞既物體,配埋芝士同沙律醬好好味呀~ 都只係$6-LT咋~($18-HKD)罐檸茶就$1•5-LT

街市

填一填個肚就跟住就慢遊古城啦~ 個古城好大架！
話就話古城,其實係一個教堂城至真！起初真係覺得好靚,不過由於太多教堂,五步一小間,十步一大間,睇睇吓都有D厭倦••• 幾十間教堂都無深究過叫乜名Lu... 只係間St.Annie印象深刻! 因為外牆與別不同!

St.Annie教堂


全球有9成多既琥珀係產自波羅的海架~ 所以周街都係舖頭~


有創意的立陶宛人

 

另外值得一看既係山丘上既城堡,山丘上能遠眺市中心全景,不過就天氣惡劣灰蒙蒙,只係見到結左冰既河,全日都無張靚相呀••• 唉•••

落山時差D又比結左冰既地面滑親! 行完連天都黑齊Lu...都好攰吓！又係醫肚既時候,係古城內唔覺有平價餐廳,於是求其食一間,諗住食雜扒原來係雜串燒! 頂••• 仲要唔平喎！

天黑步行返住宿時,比一個流浪漢用英文問攞錢,當然係扮唔識英文擺脫左啦~ 見佢跟住就攔住後面既當地女子,嚇到個女仔幾經辛苦先擺脫左行過對面馬路... 入黑既時候,全世界無一個地方係絕對安全既~