Day 1 尋回自我,重新浪遊(俄羅斯莫斯科)

(Day 1) 2012-03-09 

住宿 ：Pyjamas Hostel行程 ：HK --> 北京--> 莫斯科



尋晚臨瞓前作病，最慘莫過於失眠，唔知係因為作病失眠丫，定係緊張得濟呢？都唔係第一次遠行架啦，無理由緊張既~
黎到熟識既地方（機場），又係北面過安檢，上年去南美時，正正就係度被駡到出唔到聲•••



CA118 去北京
0750 boarding
1145到達北京機場
首都機場內既空調，令係香港出發上機前，帶既褸頸巾無用武之地，好在係放係手提有轆既行李內啫~


轉機等候時間為兩小時，可以逛吓北京首都機場；早前係香港機場工作時，一名內地客問有無熱水供應，當然話無啦，如要熱水就叫佢去餐廳或seven攞•••當時佢既語氣都幾睇唔起香港機場，話全國，甚至全球好多機場，都有熱水供應喎••• 我都成日去旅行，緊係唔信啦！所以今次黎到首都機場，就特登去求正吓！原來飲水處真係有冷熱水服務架！香港機場真係cheap... 而我原來亦都孤陋寡聞...
不過首都機場話有free Wifi，要係部機用passport數描
就比個密碼你，不過都開唔到browser既•••唔知係咪我唔識用呢？




CA909 boarding la~ @1345一上機隔離個肥鬼，放低晒D電話，I Pad係座位度，
就行左去前面好耐，真係咁都得？ 所以成日都有人唔見野真係唔抵可憐！最慘好似要我幫佢睇住咁•••
起飛時已瞓到死豬咁，關晒耀眼既窗，直到食飛機餐先至醒，用餐時無意間打開窗一望！嘩！一望無際白蒙蒙一片呀！美極鮮醬油了~ 好似冰河時期咁呀！ 唔知呢道係西伯利亞還是蒙古呢？唔知身在何方，因為搭連續既兩班機，都無獨立電視既！


到達莫斯科SVO機場，順利過境後，係換錢機換左$100-USD既盧布RB，個rate都唔錯，係1對28；換完錢後，就全副武裝，即著晒大褸頸巾冷冒呀！因為outside氣溫只有零下12度咋！





女友未出過遠門騰騰震! 佢一星期後才會合我,係呢一個星期我可以尋找返以前流浪既我! 不過佢係香港時就做晒資料搜集(驚死),我都得益不少,仲勁建議我搭機場快線tim! 話討論區版主都唔建議搭其他交通工具喎... 細心check清楚之吓,原來機場快線都不能直達市中心,同巴士一樣都要係某個地鐵站轉車... 咁使乜搭快線jet? 所以討論區都係參考吓啫~ 何況我出門經驗都唔少,又有自己既一套同風格! 最緊要就係最憎跟風! 而我去到全世界既大機場都幻想同香港一樣,一定有機場快線同平價交通,比較之吓又唔係趕時間,點解唔搭比較平十倍,甚至廿倍既交通呢???

於是一出機場室外就有一排既巴士站，真方便

! 搭817號巴士去到總站,車程約一小時,($28-RB=$6-HKD); 巴士總站就係地鐵7號線既盡頭，係巴士上認識到一個來自四川既留學生，係莫斯科已讀了五年大學啦！佢仲幫我買左兩程既地鐵Tim~




地鐵亦都係每程$28-RB,同香港一樣，每一程只要唔出閘就可以，跟住入果程,佢仲用佢果張任搭既票幫我拍咭Tim~  Yeah! 可以慳返一程~

係莫斯科見到既地鐵,似曾相識,令我回憶返係烏茲別克既時光...



好不容易先搵到係香港book定既Hostel，呢度既Hostel無任何招牌，係普通既民居裡，而民居大門又上左鎖，加上天黑，天氣又嚴寒，隻手又無帶手襪,凍到隻手好痛呀！(因為搭地鐵好鬼熱所以就除左無帶) 摸錯幾次其他住宅及Hostel門釘後，經好心人幫助下終於搵到啦~

Pyjamas hostel，8人房既Dom要$450RB($90-HKD)，係莫斯科價錢算好平啦！有free wifi，呢個價錢只係之前去錯既Hostal一半咋！
好耐都無瞓過Dom啦！對上一次好似06年係克羅地亞，住Dom真係可以同住客好close架~ 大家係大廳度吹吓水~


晚餐去左快餐店subway食，一個包加一杯當地人好鍾意飲既黑茶，要成$200-RB呀！(即$40-HKD)呢度都幾興free wifi，所有餐廳廚窗都有標明~



返到Hostal，同房既兩個俄羅斯住客好熱情，又比麵包我食，又沖野比我飲••• 但係我又唔好意思推，因為想早點瞓，聽日要早起身搭早機呀！