Day 30 專貴列車(秘魯Cuzco)

(Day 30) 2011-03-07

住宿 ：荒郊爛屋

行程 ：Cuzco庫斯科 —> Ollantaytambo

高度 :海拔3700米

7個多小時車程,係晨早0530到達被喻為全南美最古老城市既庫斯科Cuzco，個天啱啱才亮起來~

由於時間所限,必有取捨… Cuzco就諗住是過境性質，要盡快去有天空之城之稱既馬丘比丘(Machu Picchu)

由巴士總站背著大背包，沿著晨光初現無乜人既大馬路往上走； LP書中所講的Cuzco經常有老笠，講到最恐怖既係竟然警察都同毒販同流合污… 係咪咁恐怖呀??? 攪到又提心吊膽Tim…

Cuzco街頭

計劃中諗住先去Machu Picchu既山腳小鎮Aguas Calientes； 

於是係Cuzco步行左大約20分鐘就到達書中所講，專係售票往Machu Picchu既Huanchac火車站。

去到後，只見到一大班人手持車票上巴士，向職員查詢後得知，原來呢班人係去另一個火車站轉火車，目的地就係前往Machu Picchu既山腳小鎮Aguas Calientes!

而係呢個火車站，終於看見貌似本旅途上未見過既香港人喇!

職員報價去Aguas Calients既票價為USD$30； 唔知係溝通是否有問題… 因為本過期Lonely Planet都寫明$6至70美金啦! 何況已過期? 應該會係更貴至啱…

據我所知呢程火車其實係一列觀光列車，行駛速度蟻躝咁慢，方面遊客觀賞風景! 由原本2小時既車程，拖長行駛到4個多小時… 短短既車程就要收$70-USD! 你話係歐洲或阿根廷等國，物價指數高既國家就無得好講，但呢度秘魯坐成晚長途巴士都只係100港紙有找，當地食餐平民餐都只係港幣十元八塊… 

而由Cuzco直達Machu Picchu又無其他交通直達，所以係秘魯政府特登令到呢列觀光列車成為去天空之城既唯一交通，當正遊客係水魚掠得就掠!

我最憎就係無得選擇! 一定要發掘吓有無平民D既方法，接觸當地日常生活，亦係我旅遊當中既體驗之一! 當然… 我絕對無話乘坐觀光火車既朋友方式唔好… 旅行既方式都係豐儉由人架啫~

可以話我慳,但我覺得應使則使… 因應唔同地方,有唔同使法； 好似N年前去馬爾代夫，幾多錢都一定要住水中屋一樣! 就算將來去到夢想既大溪地，都一定要住返幾晚豪野架!

於是搭左幾Sol既的士，去火車站碰吓運氣，睇吓有無share taxi or min bus，的士司機好熱心又同我地兜，又問路人； 最後去到另一個火車站，落車無耐就有個旅行社老闆話附近一帶好危險，好多爬手出沒喎! 仲話叫我去佢不遠處既旅行社，講D資訊比我地聽； 原來佢提供既係package不過我都估到既⋯ 佢推介既package同我planning既一樣，不過淨來回交通費開價就高達$150-USD! 當然啋佢都傻啦! 咁既價錢我唔一早買左觀光列車咩!!! 我就一於試吓用我既方法可以平幾多!

離開旅行社再三問人之下，去到minbus車站，只係用$7-sol既費用就可去到近Machu Picchu既小鎮Ollantaytambo啦!

於是上車前係車站既”茶水檔”食早餐，見D當地人係食飯架! 我都整番碗先~ ”茶水檔”老闆娘知我地班車就黎開，仲不停將我杯熱茶倒來倒去黎降溫tim! 真係體貼呀~差不多食到尾聲，見班車唔等我地已開出⋯ 要即時追到出門口先上到車呀!!!

兩個小時既車程於1000到達Urubamba，再轉另一架小型D既Van仔，最後係1130終於到達Ollantaytambo啦~

回想係Cuzco既熱心的士司機、問過路既路人甲乙丙、體貼既茶水檔既老闆娘等…真的感覺唔到書中講咁恐怖喎~

到達Ollantaytambo，呢度係觀光列車既一個中途站! 望一望地圖，呢個小鎮既位置已經行左3/4路程啦! 只差幾十公里就到Machu Picchu； 由Cuzco來到這裡都只係用$7-Sol($21-HKD)，就行左3/4既路程，比起$70-USD既觀光列車足足平左20多30陪呀! 好開心好滿足~

不過問過晒鎮內巴士等，無任何交通工具去馬丘比丘，始終都係只有觀光列車!

及後問當地人得知話中午1230會有一班比較便宜既列車，於是即刻搭一架三腳雞去到火車站詢問，不過就話呢班車Full晒，就算有位價錢都要$35-USD，只有晚上2315既列車有位，價錢亦一樣… 咁即係一定要搭貴野啦! 我係Cuzco只係用左$21-HKD既價錢就行左3/4行程，依家再用多十陪既價錢，行埋果1/4行程咪好唔抵!!! 條氣真係好唔順! 一定唔會比佢賺!

鎮上印加遺跡

 

係火車站亦見到一啤智利情侶同樣沮喪，大家感覺一樣，唔係價錢貴既問題，而係覺得唔合理啫! 於是大家走去旅客中心，經提議下先搭巴士去Stata Teresa $15-Sol 6 hour 然後再轉minbus去Hidroelectrica $5-Sol/30 min，再步行2km就到 Machu Picchu既山下小鎮啦!

咦! 呢條Route咪好似LP所提及過既!? 雖然兜左個圈，但一份既執著，一於用呢條route啦!

咁辛苦既行程，當然要食餐好架啦! 又係秘魯美味set menu~ 食完再買D乾糧就上路啦! 長征天空之城馬丘比丘，即將起行!