2012年8月10日 星期五

續Day 30 荒郊爛屋(秘魯Ollentanbo)


(績Day 30) 2011-03-07
住宿 :荒郊爛屋
行程 :Ollentanbo —> 印加路軌Km94
高度 :海拔3700米


食完豐富既秘魯午餐,就去到中央既一個廣場,會合飯前認識既智利情侶,發現佢地再搵多一啤阿根廷情侶加入呀! 都係唔識講英文… 所以只係得智利男識英文咋!



原來智利男諗到新plan,就係每人先搭$10-Sol既的士,去到一個小村莊,跟住就步行去,佢初步估計步行時間為5小時… 就會到達目的地Aguas Calientes啦~

自己盤算,這個plan比先前既更直接,如步行時間真係為5小時既話,仲會更早到達Tim~

於是大家乘坐一架Van仔,車程大約30min去到一個小村莊,司機稱已無路可行了… 根據司機同村民溝通後得知,如要步行往目的地就必須往山上走!



途經見既,之前都見到好幾次,吊住個人既物體,個頭係一個骷髏頭,唔知乜習俗,好恐怖...


於是一行6人,撥草尋路往山走,其間上山又落山,最後被一條大急流所阻隔⋯ 望見對岸山下有一條觀光列車既路軌,所以務必要過對岸!

智利情侶




望返山下既小鎮
由於我背住一個大背包,一個手拖背囊及相機袋,因此崎嶇既山路極為艱辛,而同行南美人全部只背一個小背包,其中一個阿根廷女仔仲兩手空空tim! 佢地梗係輕鬆啦!如此既山路,計過度過都係捱唔住,我一個人都三大袋行崎嶇既山路,點行呀!
依家返轉頭都仲來得徹,於是我們提出退出放棄… 不過智利男極力挽留,仲幫我攞手拖背囊上山tim…


由於係崎嶇既山路上上落落,最終都係被大急流所阻隔,於是係一個懸崖上休息,遙望對岸路軌,真係望到去唔到,個個都垂頭喪氣…
最後經一個小孩帶我地再上山到上游,真係搵命搏先過到對岸呀!



 

雖然呢度比較上游,但水流一樣咁來勢兇猛呀! 兩位小朋友好輕盈就過左對岸,之後帶頭行既係高大威猛既阿根廷男,先運送所有既行李過對岸,然後企係激流既中心,見佢雙腳好似打左椿一樣,扶助我們一個個過去,女士們行完就到我,真係好怯…下面就係萬丈深淵,一失足一定一命嗚呼!!! 真係依家諗都心寒呀…




好不用易終於過到對岸,已經1700啦! 就算雙腳濕晒都要盡快著鞋著襪離開,因為急流旁布有好多飢渴既白紋伊蚊呀! 


再行多半小時,終於到達路軌,起初不斷嘗試,睇有無其他比路軌好行一點既路,不過都係掘頭路,都係死死氣行返路軌把啦!


沿觀光列車既路軌步行,左面既急流係Urubamba河,右面就依山而建,被群山所包圍! 相信山上就係要比錢先可以行既
印加古道啦~



一落路軌已遇到架觀光列車啦~ 車上有好多乘客同我們揮手,感覺好型呀~







行左無耐先見到路軌旁有個牌寫住Km82,即初步預算既起點! 只要行到km120就到啦! 心目中盤算,係有兩條屯門公路既長度,對於行開山既朋友可能濕濕碎,但我就⋯
其間路經好幾個印加遺址,有個係對岸既遺址仲好大tim~




對岸好大既印加遺址



於是不停行,不停係咁行,行來行去都係km80幾,仲未到9字,應該要行到三更半夜先到目的地呀!
佢地仲有少少嫌棄我地行得慢Tim! 佢地可以講話係無行李咁濟! 緊係行得快啦! 雖然平路,但全是碎石既路軌好難行,超負重既我們要盡量踏上路軌上既木來行走,而可怕既係山窿,怕內裡無足夠既空間閃避經過既火車。




入黑前休息一下,食D麵包填吓肚,穿返件禦寒衣物,我諗反正都嫌我地行得慢,迷提議叫唔使等我地囉,不過佢地都堅持一齊。 自己心裡想,一陣唔會趕上去,自己慢慢行! 休息時見佢地其實有晒準備,背嚢內基本得糧食及外套所以好輕,見阿根廷女知要行山仲扎住晒隻腳tim!!! 我地一人一個淨係個大背嚢都十幾公斤重,都未計其他… 再者無諗住行山,只係著普通波鞋
所以我真係好佩服當時既女朋友…



再次起步行多一陣個天都黑齊啦! 我地諗住自己行,所以慢慢行無趕上前; 當行到伸手不見五指,就要靠電話既閃燈作電筒,此時已看不見前面同行者既燈光Lu! 最驚就係有火車駛近閃避不及,左邊係懸崖急流,怕睇唔到有乜位閃避跌落去,而進入火車既山窿,又怕火車既司機睇唔到我地,而山窿裡閃避既位置又好窄…



見咁危險,諗住睇有無人家可以借宿一宵,不過行咁耐只見到起初時一處有人家咋⋯


再行一陣,見有好多既螢火蟲引路呀! 行到差不多筋疲力盡之際,看見遠處有一戶人家既強勁射燈,不斷向我們照射,以為是拋離左我地既朋友搵到住宿給我們指示; 去到該座建築物既範圍,是依路軌而建,於是推開圍欄進入,有個好大既庭園,係一間三層大宅,盞射燈係頂樓射出,行近只見最底層全是落地大玻璃,屋內有5,6個人以開緊大餐,當看見我們後,有一名類似工人既人上前,我地都未開口問野佢已經叫我地go out啦! 行慢D都唔Like咁,不停講Out… 雖然不憤,但鬼叫擅闖民居咩⋯


真係好想搵到地方落腳,但行咁耐只見到呢處有人家,都無辦法! 唯有繼續行,再起步又見迎面有火車來,由於真係伸手不見五指,未能確認左手面既懸崖急流有無位作閃避,於是立即向右面盡量貼實山邊,不過真係太少位躲避喇,火車車卡不停括到背包,真係好危險!


無耐搵到處空地休息一下,十分疲倦及沮喪… 休息其間見後面有一點燈光,似有人行緊過黎,等左一陣燈光越來越近,原來是一位大叔帶住一隻狗,當然機不可失將其截停詢問啦! 雞同鴨講下只叫我們跟隨,心諗唔通帶我地去佢屋企住???


行多約十分鐘,見有一排平房沿路軌而建,佢帶我地到其中一間推門而入,電筒一照下原來係荒廢左既荒屋,亦有前人露宿過既痕跡,佢就示意我們係呢間荒屋休息後就離去。
當時既女友毫不猶疑就放下行李,真佩服佢熬得苦既性格!


安頓好就拎D麵包食作晚餐,正想搵掛係背囊隻錶睇吓幾點時,發現唔見左喎! 呢隻錶係為左今個行程特登買架! 有溫度高度等功能,成幾千蚊好貴架!!! 於是平心靜氣諗左一陣,我隻錶就穿過背囊D扣度,肯定係剛才遇到大叔既空地,除開個扣飲水時跌左啦! 見個天都咁黑,隻錶應該唔會比人發現既,而且太黑都怕搵唔到,所以決定聽朝瞓醒先返轉頭搵!


於是發現屋內有一張窄窄既地毯,毯住地下作打地舖瞓覺之用,再手機既電筒功能四圍照下,看屋內有否異樣,只見四面牆壁,空空如也,後門可通往D草好似人咁高既庭園,當然搵個背囊頂住先啦! 有人入黎都知嘛! 再一照看有否蛇蟲鼠蟻,我最怕架!!! 果然屋內有好多蜘蛛網,並係牆角發現一隻有毛既蜈蚣! 嘩! 唔整死佢成晚都唔使瞓呀! 於是搵長支鐵係咁打,真係毛管都凍埋,由於鐵枝太長太重又唔就手,所以打極都打唔中… 最後趕左去門口就算Lu,終於可以安心瞓啦~


瞓著無耐,發覺有人想推門,緊係第一時間頂住啦! 門外既人走左之後,即時用之前趕走蜈蚣既長鐵枝頂住對門啦! 無耐又有人係漆黑下用電筒,係出面周圍照,看見一個人影係窗戶經過,好驚係賊人呀!!!


成晚就久唔久有人行過同推門,就係咁,我地就係荒屋裡,好驚同極度警戒下,瞓吓醒吓咁露宿一宵啦!

依家諗返,如果再揀既話,都係乖乖地坐反觀光列車吧!
















5 則留言:

  1. 閣下真前勇後勇,Inca trail 有導遊都要走兩天,你拿幾個背包便山上走,勇!
    [版主回覆08/21/2012 00:36:04]因為...一份既執著...

    回覆刪除
  2. 阿根廷男好堅喎
    點解佢地可以帶咁少野既?
    [版主回覆08/25/2012 15:42:44]全部都係衫褲鞋襪相機手信...無得掉...
    [山豬回覆08/21/2012 13:53:37]噢!其實你地有無諗過掉左啲野黎行
    [版主回覆08/21/2012 00:27:45]佢地一心黎行山,行李當然寄存係來回都必經之城市Cuzco啦...
    你...好似好耐無浦頭噃~

    回覆刪除
  3. 噢!地利 Oh!tria2012年8月21日 上午5:33

    你地真係勇. 佩服.
    [版主回覆08/25/2012 16:36:03]

    回覆刪除
  4. 真係好勇! 睇嚟我呢世都唔敢試.
    [Peter回覆09/05/2012 18:07:28]兩樣都係
    [版主回覆09/05/2012 13:50:55]你講瀑布定瞓荒屋先?

    回覆刪除
  5. 如果你乖乖坐觀光列車就唔會有e d 經曆啦wor!
    但十分佩服你可以背大背包行這段路……
    [版主回覆09/11/2012 03:19:27]你講得啱...起初打呢篇時都有同感
    不過依家諗返好回味, 去Machu Pichu有個與別不同既獨有經歷~

    回覆刪除