Day 33 人狗情未了(秘魯Aguas Calientes)

(Day 33) 2011-03-10
住宿 ： Hostal EL Solan $50-Sol ($150-HKD)
行程 ：Aguas Calientes —> Hydroelectrica —>

Santa Maria —> Cuzco

最高高度 :海拔4550米

起床食埋酒店提供”貴夾唔飽”既早餐後，係早上9點鐘裝滿水壺就出發Lu~

今次離開，一樣唔比觀光列車賺我地錢，一樣係步行離開。不過今次唔走回頭路，一於試吓Lonely Planet所講，而且係討論區無香港人提及過既路線先~ 呢條路線就正正係當日入村時既另一面。於是我後面背著大背囊，前面背著手拉背囊，同斜孭相機袋出發!

今天既天氣係… 又回復返烏雲蓋頂，毛毛細雨啦! 呢度天氣真得意，又會隔日天晴,隔日落雨既!

於是沿荒廢既路軌前行，今日比前日步行入村時精神百陪呀! 一來剛瞓醒養足精神，二來有左經驗嘛~ 再者唔使同其他人一齊行趕頭趕命，所以感覺步履輕盈，自由自在，體驗健行樂趣~

不過行左無耐雨勢越落越大，係香港帶來既黑色垃圾膠袋

終於大派用場啦! 用來包住前後既兩個背囊~

 

我本人

 再行多一陣去到一個類似火車維修站，由於有個兩條路，問清楚一個工人證實無誤就繼續前行。此時有一隻狗仔搖頭擺尾迎面前來，嗅一嗅我們後就與我們同行。起初都不以為然，以為是居住在維修站既流浪狗，諗住佢跟跟吓就會唔跟，點知就一直跟，好似多左個同伴咁，於是命名為Dolly~

 離開左維修站後，開始見到有不少既背包客迎面而來，佢地應該都係去馬丘比丘既小鎮。睇黎呢條Route都幾熱門噃~ 但我唔係好明點解係香港既討論區，搵唔到呢條路線既任何資料? 可能D人同我一樣唔太鍾意喺D討論區分享呱。呢條Route除左Lonely Planet有記載，同埋係早前Ollantaytambo既旅客中心得知的!

步行期間不時見有一條繩索駁過對岸，我估係村民用來過河的。烏魯巴河好似大洪水一樣，嘩! 咪好危險!

 

 

 

Dolly起初見兩個背包客逗吓佢玩後，跟左佢地行返轉頭… 睇黎都係養唔熟。諗住唔理Dolly啦… 點知又跟住晒! 之後仲前行引路Tim~

行行吓回頭望唔見左Dolly既!!! 大嗌都無反應… 諗諗吓唔通十幾秒前，行過由山上流過既急流，Dolly因路軌太闊而跌左落激流被水沖去???

於是即時行返轉頭望一望路軌，9成9肯定被山上滾落既激流，沖落有如洪水猛獸既烏魯巴河喇! 呆呆望著有如虎嘯龍吟既烏魯巴河，十分傷感，心諗就算識游水都死啦! 咁就斷送了一條性命了…

於是再叫多幾聲Dolly Dolly Dolly… 忽然發現激流旁既草叢”喳喳聲”，Dolly全身濕晒掙扎爬出草叢，我即時笑逐顏開去攬住佢呀! 仲同佢抹身Tim~

出事現場

 

 Dolly死過翻生，好似乜都無發生過咁，繼續好開心咁做領航員，只不過打了幾個噴嚏。

究竟佢知唔知差D無命?

究竟佢又知唔知我有幾擔心佢?

原來只係相識左個幾鐘既畜生，不知不覺已建立左深厚既感情了~ 休息食麵包補充體力時，搣D麵包比Dolly食，但佢竟然揀飲擇食唔領情喎! 而飛機派既花生佢都係食左一粒咋…

 

 

 於是一直行，行到後來經一個當地人指示，係一條小路落山，就見到一條小村落。行到小村落既盡頭就見到一架小巴等緊客，一問之下原來呢度叫Hydroelectrica，呢架小巴係去Santa Maria，車程一個小時，果度有車返Cuzco架!

@1245

個牌有前人用筆寫" Aguas Calientes "字樣提醒入天空之城既遊客

終點小村落

望一望隻錶，差不多行了4個小時，而且全是平路好輕鬆。架車等緊客見仲有時間，咪睇吓搵唔搵到D野比Dolly食囉!

呢條村見有好多食野既舖仔，於是反轉頭睇吓有無野食。咁啱有人食完一碗飯，問準老闆娘之下，將D廚餘及枱上既雞骨倒在地下比Dolly食，看見Dolly食得津津有味~ 其間仲有個當地小朋友逗Dolly玩，我當然唔放過呢個機會指手劃腳，雞同鴨講咁叫佢收養啦… 唔知佢聽唔聽得明呢?

襯佢底頭食野既時候，靜靜咁慢慢行上車。不過Dolly食完架車都未等齊客，Dolly仲識行過黎搵我tim! 車上一個女職員見我地咁難捨難離，仲話可以比佢上埋車一齊走tim! 不過…又可以同佢行得幾遠丫! 始終又咪要分開… 之後司機仲嚇到佢縮入草叢… 最後，有兩個背包客上車，車就坐滿開車Lu…

 

就係咁…Dolly就一直陪我地行左4個小時，來到呢個陌生國度，睇住Dolly經歷過生死，又係要分手既時候啦… 擰頭望見Dolly追住架車，好快就被車尾揚起既沙塵淹沒於視線中Lu…

@1315

路上崎嶇不平，沿著兇猛既烏魯巴河旁既懸崖山路行，其間係懸崖旁要駛過山洪暴發既流水。之後塞車封晒路，原來遇正山泥傾瀉。相信係無幾耐前發生，因為只係一兩個車位前發生咋!!! 嘩! 其實都幾危險，架車行快D都有機會被山泥沖落河既危險! 於是無耐就見到修路工人，駕駛使挖土機來修路，即時用挖土機維修後才可繼續前行…

 

一個小時後，到達Santa Maria。一落車就有小巴兜我地去Cuzco，每人只收$25-Sol($75-HKD)。由於未開車

係鎮上食返個秘魯式套餐先～

食野時見馬路有一架大巴士埋站，巴士離開後見有個時間表係站頭，原來呢架巴士都係返Cuzco架~

@1500

Santa Maria

 

 

由Santa Maria去Cuzco，是必須翻山越嶺的。架車爬到一坐山既最高點，根據我隻錶顯示為海4550米! 由二千幾米既低地突然爬升到4500米；當係3800米時高山反應特別明顯，好似唞唔到氣咁呀! 唔怪得司機係山腳已係間舖仔度

買定D Coka tea葉係口中不停咀嚼啦! 全是山路行駛左差不多6小時，終於天都黑晒時到達Cuzco。

@2100

山嶺民居

中途仲運D單車上山

司機係一個廣場放低我地，入夜既Cuzco街頭都人來人往架! 好快就係廣場搵到間住宿$50-Sol($150-HKD)

安頓好即時外出食晚餐，去左間烤雞店食烤雞。不過食完飯返來諗住沖涼瞓覺，點之無熱水… 原來2200後無熱水供應喎! 唯有係寒冷既天氣下(約十幾度)，咬緊牙關沖凍水涼啦…

今日行程概要:

Aguas Calientes —> (沿荒廢路軌行4-5個鐘) —> Hydroelectrica(小巴$ 15 sol/ 1 hours) —> Santa Maria (小巴 $25 sol /6 hours) —> Cuzco

全程$40-Sol=$120-HKD

比起觀光列車$70-USD平好幾陪呀~