2012年7月16日 星期一

Day 28 嗅名遠播的關口(秘魯Puno)

(Day 28) 2011-03-05
住宿 :Hostal ArcaIris
行程 :Sol Island —> Cabacabana —> Puno(秘魯)
高度 :海拔3660M

一早起床就趕落山,搭1030回Cabacabana既船;落山其間再一次見識到當地人既神乎其技啦!
D當地女人個個都背住一大袋既野,有D背著半個人既行李,有D背著Baby,有D背著枱、櫈、柴枝等等… 他們於山野間表演深厚既輕功凌波微步! 爬完我們頭後,轉眼間消失得無影無蹤,早已被山下既林木所遮蓋…

這些當地女人,大部份都已經五,六十歲,身型大多略為肥胖,而且還穿皮鞋Tim!!!
係海拔三千多米既高度,背著咁多行李行得咁快真係佩服! 仲唔係武俠小說裡既最強輕功??? 原來世外高人就活在的的喀喀湖啦~





 
 

1230回到Cabacabana,落船無耐經過一間街頭找換店換定D秘魯幣先~ 秘魯幣叫Sol,當時既匯率係$1-Sol = $3-HKD,因為即將要過境去秘魯啦~


見間找換店好似小販檔咁,即時攞部電話出黎,打開個外幣App睇吓個匯率,見個匯率差不多即時換一點吧! 就算無得即時上網,但相差幾日既舊匯率,不完全準確亦不遠矣~ 況且我又唔係換十萬九千七,無需要為嗰一毫幾仙咁執著! 
所以話科技係進步的,去旅行亦變得越來越方便,今時今日唔好再講乜野勇闖呢度勇闖果度,只需買一張機票就可以喇~


Cabacabana街頭
 



換完錢再去返幾日前食過既餐廳食午餐先~途經見有豪華巴士直達秘魯既Puno,不過我就選擇更接近當地人生活既Share Taxi前往邊境口岸Kasani。每人$3-Bs





約十分鐘既車程就到達Kasani,落車不遠處就見到有類似出入境既建築物,我相信出境同入境都用同一大廳,因為當我地一進入大廳,就有個關員即時上前截停我們,面露不悅咁要我地出示護照,於是向佢出示BNO,佢第一時間揭開個人資料果頁,用好熟練既手勢,指出出生地同我地講Hong Kong,China 想留難唔比我入境… 此時我亦即時出示早前既入境印,表示我地已經玩完你們國家啦~ 今次係離境~ 呵呵~ 你攪我唔倒~於是即時蓋印後就比我地走! 呢個關口相信留難唔少既港人吧!
呢個關口,就正正係我出發前於討論區上爬文,有九成九港人所選擇既關口,專係留難唔比香港人入境… 不過我又真係唔明,既然咁想入玻利維亞,點解咁多個關口又一定揀呢個冒險呢?難道得一個關口?點解又唔可以唔跟別人自創行程呢?
就正如我相隔左一段時間先打呢篇遊記,依家睇返d南美討論區,D人已經一窩峰係阿根廷入玻國啦!!! 因為我當時都曾經post過成功例子... 但我絕對唔可以話係創先河,認叻!(因為再之前都一定有成功例子) 但我覺得既然咁想去就一定要去冷門既關口,不過我相信不久將來,呢個阿根廷關口都會有好多失敗例子lu...希望將來玻利維亞唔好唔鍾意中國人,能夠多D朋友實現願望啦~



玻利維亞Kasani入境處

辦完離境手續後穿過一度拱門時,路旁的小販婆婆指著地下,一個唔顯眼的標記叫我留意… 原來係一個邊界既標記黎架~







 



辦完離境手續後穿過一度拱門時,路旁的小販婆婆指著地下,一個唔顯眼的標記叫我留意… 原來係一個邊界既標記黎架~


過境去到秘魯,隨即感受到當地人既狡滑! 係關口乘Share taxi,上車前問一個乘客稱每人$1-Sol,車程五分鐘到達Yunguyo,個司機見我地外國人就即時話收$2-Sol,都無得同佢爭辯…


之後比左$5-Sol佢仲扮晒野唔找錢,識穿後先找錢… 呢D蠱惑野係南美行程未遇過架!唉…睇黎又要同當地人鬥智鬥力Lu… 希望只係個別事件啦! 因為我始終覺得南美人係純樸唔貪錢既~
去到小巴站坐再小巴前往Puno 每人$7-Sol



一個小時既車程到達Puno既小巴總站,落車後行多兩條街就去到不遠處既長途巴士站,諗住買定聽晚去Cruzo既車票一入到巴士站,即時有個熱心男人協助(後知係車站裡其中一間Agent既老闆)
用$30-Sol=$90-HKD住一晚有Wifi既住宿,並買埋聽晚2200去Cruzo既巴士票$30-Sol,見佢咁好人用$20-Sol幫襯佢聽日既半日Unos島Tour勒! 返正我都想去~


係酒店放下行李後,就行吓中心區域,主要大街既兩旁全是手信店舖、銀行、找換店同餐廳。 感覺也較玻利維亞先進得多! 晚餐係一間餐廳食,通常要叫佢先肯攞出黎比較平D既Tourist Menu,食Set dinner每人$18-Sol ($54-HKD)唔錯唔錯~~~

 








 
 

 



3 則留言:

  1. Buenos dias, 去了個多月南美,一定學了三、五、七句西班牙話吧。
    有沒有去看 Nazca lines,很神秘。在 Peru 會否有高山反應?Peru 是六斤最想去的一個地方。
    [版主回覆07/17/2012 17:48:26]嘿~ 係早晨嘛~ 我只係學懂數字,招呼語及一些單字咋...畢竟我無語言天份...
    傳說天外來客既地方無去呀...
    高山反應係玻利維亞那面就有~ 來到秘魯這裡已適應Lu~

    回覆刪除
  2. 噢!地利 Oh!tria2012年7月18日 上午4:09

    真係唔明做乜唔俾中國人入境.
    [版主回覆07/19/2012 16:32:32]個別人士既偏見... 不過有時真係自己國民唔爭氣...

    回覆刪除
  3. 我諗d人都係貪順路,玩完秘魯再入玻利維呀,我初初都係想咁行,不過見咁多失敗個案先改行程,會浪費多好多交通時間,不過想去睇天空之鏡無計啦!
    [毛豬豬回覆07/19/2012 21:48:10]我出年去都好驚架,話晒都仲有成半年時間,真係咩事都會發生,不過諗住唔得就去智利嗰邊再試囉...
    [版主回覆07/19/2012 16:42:32]貪順路...其一啦...我了解大部香港人,如無乜資料或無人走過既路基本上唔會選擇! 你睇d南美討論區, 依家D人一窩峰係阿根廷入玻國...

    你講得無錯,大家都太想去天空之鏡,又真係太多失敗例子,所以先要創新去唔同既關口,比較有保證...我相信不久呢個阿根廷關口都會有好多失敗例子lu...

    回覆刪除