續Day 20 Tupiza=食Pizza???(玻利維亞Tupiza)

承接Day 20阿根廷篇

2011-02-25 (續Day 20)
住宿 ：唔記得名既Hostel ($ 100-BS=$ 100-HKD)
行程 :Humahuaca（阿根廷）--＞La Quiaca
   -->Villazon(玻利維亞） --＞Tupiza
高度：海拔2929M

玻利維亞呢面邊境小鎮叫Villazon,沿著大街一直行,兩旁有好多商店同找換店,換左當地錢,諗住行去lonely planet講既火車站,睇吓有無火車搭; 不過火車站好似荒廢左咁,亦都無遊客前往••• 於是行返轉頭,啱啱經過既巴士總站,剛好有一班路經Tupiza既巴士準備開出,即時毫不猶豫買飛上車~

玻利維亞既巴士質素,係暫時係南美見過既最差既! 巴士殘舊之餘,死氣喉既黑煙,係我前所未見既咁勁！行駛時簡直十足十一架蒸氣火車咁呀！



路面既差劣,亦都係一絕,凹凸不平之餘,亦都危機處處,能夠返到香港都算好彩•••好似開車無耐就要過山窿,個山窿開到一忽忽,個頂竟然卡住架巴士!!! 要另外個職員落車睇位左試右試,路旁已是沿崖,駕駛技術差D就會一獲熟喇••• 個山窿起碼攪左半個鐘呀...

三個鐘既車程,好快到達Tupiza,落車時竟然跌左部電話係坐位上都唔知,好彩當地人一D都唔貪心,執返部電話比我呀！ 玻利維亞亦係全南美,最落後，治安最差既國家之一,再一次證明呢D數據可作參考,並不是絕對的!



海拔2929M

落車後係巴士總站附近搵到間Hostel,雙人房$ 100-BS= $100-HKD,為左爭取時間去天空之鏡Uyuni,即時去報團先~係Tupiza呢度有好多旅行社出發去Uyuni,包括我住既酒店都一樣有! 佢地既廚窗都貼有客人寫既感謝信,真係想是但報一間呀！ 但諗諗吓,呢D感謝信都可以自己搵人寫架啫！ 我千里迢迢,千辛萬苦，千方百計先來到... 可能人生只有這一次,所以揀旅行社一定要揀間好既!


Lonely planet介紹既Tupiza Tour,話係Tupiza最好既旅行社架！入到去已經有幾個人辦緊報名手續啦~ 4日3夜行程每人要$ 1200-BS（$ 1200-HKD) 相信比其他旅行社貴幾百蚊••• 如果計返每日都只係$ 300蚊,仲要係包食包住包交通噃！ 個職員話聽日出發只淨兩個位咋! 聽日出發既就正正係報緊名既幾個客人,於是諗都唔諗即時報名啦！ 不過Credit card要收charge 幾貴••• 現金又唔夠•••個職員可以比我地落D訂,聽朝出發前可以去銀行提款呀！

報完團搵左間中國餐館食晚餐,點解食中餐？因為除左想食吓飯之外,行晒整個市中心,所有既餐館都係獨孤一味...Pizza! 唔通就好似呢度既地名讀音一樣,Tupiza 就等於食Pizza???中餐館老細見我地中國人出黎傾幾句,佢話首都拉巴斯中餐館競爭大,Tupiza就只此一家•••我選食大大碟牛排飯,支果汁太甜飲唔晒呀~

食餐飽後返去早D唞,應付高原氣候之餘,聽日要早起身出發啦~


依家仲係正月噃~