Day 23 仍是貪錢...(哈薩克Karkara Village)

(Day 23) 2009-7-14
住宿 :哈薩克真正民宿
行程 :Karkara

早餐後，見D人係屋內搬左好多喼野同傢俱出黎，聽講話一個家庭成家立室後3至6年就要分家... 剛巧就係招呼我地入屋既婦女家庭分家呀! 我就做埋佢地既一份子一齊幫手搬屋，搬了整個上午~

新屋位於河畔，風景幽美，個女人仲叫我地住呢面，佢話果邊無人識國語woo...

(我個人比較負面, 佢呢個舉動令我諗D衰野)

搬完屋食完晏後，就慢步Karkara，呢個小村莊風景真係好靚，位處天山山腳，被雪山包圍，又有一望無際既大草原，不時可見有人放牧

牛,羊,馬,等動物隨處可見~

紀念前蘇聯係二次大戰時既墓園

最後沿著河流行到上游既草地休息一下，但突然間烏雲蓋頂，行雷閃電，於是即時急步返屋企，不過都淋到濕晒勁凍呀...

係Karkara既天氣就係咁，有太陽既時候就有30幾度，但當無太陽既時候就得返10度8度... 一日裡可以感受到四季，依家7月炎夏已經係咁凍，冬天既嚴寒可想而知呢...

晚上開飯時D雨已經停了，於是看看雪山，發覺D雪多左好多呀!!! 原來頭先果陣雨吹到雪山上，就變為雪啦~

係山頂多左好多雪呀!!!

晚餐都幾豐富(可能係新居入伙)，舊屋既人都過晒黎食飯，今晚既主菜係羊湯飯，可能D當地人覺得Nan先係主菜...

以我住左係度兩日觀察所得，哈薩克族人好傳統，男主外女主內，如有客人作客就必須由主人家既女人，煮飯倒茶洗碗一腳踢…

食完飯就一齊睇電視同傾計，其間我想用佢地個大陸萬能差電機，幫部用左兩年既舊手機差電，屋主見到後話我部手機好好，仲話同我交換tim! 起初以為佢講笑，之後愛不釋手咁研究... 原來黎真架!!! 於是緊係份傻啦...

呢一餐真係好好味~

臨瞓前,舊屋D人走晒後，日頭諗既衰野應驗啦... 而且超越左我想像!

當個女人搬完屋後叫我搬埋過黎住，我已經諗到佢貪我地既房租，驚我地比左舊果家人；

但依家佢地兩公婆竟然坐地起價! 由原先既$ 5000T 加到要$ 8000T (約HKD$ 400)

最初招呼我地住個女人話，起初無諗過價錢既問題就應承左，經同老公相量後話我地食足咁多餐，仲話酒店都唔包食woo... 所以收我地$ 8000T，仲講晒唔好意思...

佢地要等到舊屋D人走晒先開聲，可能舊屋既人，完全唔知我地留宿要比錢既一回事呀...唉...其實一早講清楚都無問題，不過佢last呢刻先同我計即係貪錢啦! 為免影響係哈薩克難得既好心情，唯有比佢啦...

其實都令我諗起好多野唔係好妥...

1) 我第一晚住係舊屋，由另一個家庭比地方我住，同煮飯我食，佢地可能一個仙都分唔到，咁咪對第一個家庭好唔公平!

2) 如果佢地同我計到咁足，即係純交易啦，我又除草又搬屋咪好唔抵! 雖然除草係為體驗，但搬屋既態度就有D’老馮”既感覺，我出去行吓唔好!

 

仲諗住係哈薩克搵到唯一既樂土，點知一樣攪到唔開心...