撒哈拉之旅(一)

續(Day 5) 2007-10-7

撒哈拉沙漠(一)

去到20 Mar Hotel集合，首先坐五分鐘四驅車去到沙漠既邊緣，穿過一幅阻隔住沙漠既圍牆，就進入撒哈拉世界啦~ 已經有三個既駱駝主人(即導遊)，同我地既交通工具…(即十多隻駱駝)正在等候我們啦~
他們正努力綁緊我們既食糧,食水在駱駝上，我們正等候四驅車接另一批團友，由於烈日當空,無摭無躲真係勁晒呀!!! 於是學D駱駝主人 ，係一舊好似張枱咁細既石頭”呢埋”等候； 等左約十分鐘 ,另一批團友終於到啦~

駱駝主人替我們既行李綁緊係自己既駱駝後，就分三隊人，向撒哈拉沙漠出發! 我終於踏進撒哈拉沙漠啦! 入去啦!!! 終於要入去啦!!! 興奮既心情真的難以形容~

整裝待發既駱駝

十分親切既駱駝主人~

我既愛駒~

最初起步，都見到其他既駱駝隊向不同方向出發，行了一陣，環顧四週就只剩下我們。

沿途所見，盡是萬里黃沙，浩瀚無邊既盡頭，荒蕪之極，一片死寂，寧靜無比，偶然會聽到駱駝主人唱既民歌，起初感覺極興奮，到後來被四周既環境所感染，好多野諗，好似人生路上好多事情需要反思… 像要告訴自己原來是多麼的渺小…

中途休息時，我都玩吓地上既黃沙，沙漠既沙幼細像奶粉一樣，我唸全世界任何既靚沙灘既沙都無得比呀!!!

出發啦~

騎了兩個多小時駱駝，太陽已開始下山了，我們亦已到達營地… 係呢兩個多小時既駱駝旅程裡，令我感受到騎駱駝原來係咁辛苦既!!! 初時都幾過癮既… 駱駝行路時一高一底咁”UP吓UP吓”，雖然有個厚厚既坐墊坐著，但係兩邊個pat骨真係超痛，真係如blog友所講既”忽必烈”啦! 有個法國遊客已經中途忍受唔住要落地行LU!

駱駝旅程其間烈日當空，曬到不得了，好在我係出發前買左條頭巾，起初買果陣都只係貪得意咁學吓D本地人，原來係旅程其間咁好用架，包住個頭包住條頸，可以免受猛烈既陽光曬傷，雖然包到實晒，但薄薄既頭巾一D都唔覺得焗，係沙漠中最好既防晒工具!!! 唔怪得知D中東人咁咁鍾意包頭啦~ 
條頭巾除左可以防曬外，比我發現有另一個功能，就係防範蒼蠅既來襲勒! 兩個多小時既旅程，比十多隻既蒼蠅不停煩擾，到唔知點解沙漠咁荒蕪，到可以飬活到咁多蒼蠅… 唔通佢地只食駱駝屎為生??? 而D駱駝”開大”次數又真係相當驚人，睇住前面隻駱駝，係短短兩個多小時既旅程起碼痾左十幾次! 仲要痾好多粒，同行進間痾tim!!!

HEHE~ 我包到實晒,唔怕陽光也唔怕蒼蠅! 做蒙面超人呀~

黃昏時,終於到達營地啦~