Day 18 用雙腳來結束流浪 (吉薩金字塔+開羅 )

Day 18 2005-7-18 吉薩+開羅

住 :阿泰屋企



經過八小時既車程 ,係朝早六點終於到步 ,

起初唸住返到開羅先再轉的士去吉薩參觀金字塔

但係準備落車時 ,原來係開羅前仲有一個吉薩 (Giza) 站woo ,

梗係即刻跳落車啦!!!

不過講返轉頭 ,係火車上就有d關於埃及人既不愉快事情...




搭 Sleeping Car 其實每卡都有個侍應招待的

佢地通常都會招呼你一餐晚餐同一餐早餐 ,但一落車就要收貼士

其實都無詳問題 ,之前去阿斯旺果程都比左廿蚊埃磅貼士 ,

個侍應緊係笑到見牙唔見眼啦~

我都覺得比多左 ,因為程車都要六十幾美金 ,仲要收貼士???



事願係尋晚 ,晚餐時因語言問題 ,我想飲可樂而他無攞比我 ,

等左好耐都無咪同佢講唔要Law ,

而佢就以為我唔要 ,唸住算啦 ...

點知佢之後就全程黑面 ,係朝早時仲好唔耐煩咁叫我收起張床tim

我緊係無理佢啦... 我都開始嬲嬲地 ,

最後比貼士時只係比左五蚊埃磅比佢

點知佢黑面同我講 ,隔離d日本人 ,韓國人都比十蚊...

我就好串咁攞左一大疊既埃磅出黎話 ,我係有錢 ,但唔會比你

哈哈~ 激到佢出返去 ,早知連果五蚊都攞返啦!!!



最後落車時唸住唔理佢啦...

點知佢竟然主動同我講Bye Bye woo...  真係怪人!

=========================================



係吉薩落車後 ,由於時間太早 ,只係六點鐘

唸住行去金字塔 ,於是係街度逛左一粒鐘 ,都未見到金字塔既任何蹤影

於是問個打扮得西方化既埃及OL ,佢仲好親切咁帶我去截埋巴士

埃及既巴士勁平 ,只係五亳子咋!!!

去到金字塔 ,我決定同一雙腳鬥氣 ,因為覺得連日來比埃及人欺負

所以唔想再比埃及人賺錢 ,用一雙腳參觀範圍好大既金字塔建築群

最後當然一份既執著 ,放棄左騎駱駝遊金字塔啦...





能夠親身睇到金字塔既宏偉 ,真的不能同書本或照片相比

令我感受到自己好渺小 ,同埋領略到讀萬卷書不如行萬里路既道理



左邊係"古夫金字塔"同右邊靚 D 既"考夫金字塔"

呢個係未加上去 "古夫金字塔 "既塔尖

曼考金字塔 The Pyramid of Menkaure

期間我選擇左歷史最久遠既古夫金字塔 ,

用左一百蚊埃磅 (即HKD $150) 入內參觀

其實係隔離一樣咁大而且靚 D 既"考夫金字塔" 只係$25 埃磅咋!!!

不過古夫歷史最耐嘛~

雖然金字塔內陰涼 ,但由於太斜太窄有時仲要爬tim!!!

所以期間不定流汗 ,都唔知出左幾多公升既汗

呢個金字塔每月都唔知吸收左幾多噸遊客既汗...

我唸到啦!!!

 

唔通金字塔既咀咒就係要入親黎既人脫水而死???

計一計原來係度行左三個幾鐘woo!!!  當然期間有係D陰頂度抖吓啦~



古夫金字塔

入去探險啦!!!

"古夫"個仔"考夫金字塔"

呢張相有D誤導tim...影到中間既"古夫"同最近既"考夫"相差好大...

迷一樣的獅身人面像

終於影到獅身人面像同金字塔既合照啦~

============================================



晏晝食完個豐富既麥當勞餐後 ,就搭的士返開羅既大城堡( Citadel ) 參觀

但就有D失望 ,因為同想像中有D出入

不過我喜歡呢度既寧靜 ,而且可以從高處俯瞰開羅市既風景

烈日當空既情況下 ,係一處陰涼地方休息 ,竟然比 d 風凍到起雞皮

埃及既天氣就係咁得意 ,我覺得埃及40度都舒服過香港廿幾度呀!!!

係大城堡留連左個幾鐘就走lu ~



大城堡

城堡內既"穆罕默德阿里清真寺"

大城堡上遠眺開羅中心

===========================================



離開大城堡後 ,就去流浪既最後一站

有一千一百多年歷史既伊本圖倫清真寺 (Mosque of Ibn Tulun )

由於從書中既地圖顯示 ,該清真寺同大城堡相隔不太遠 ,於是決定行過去

其間有問D差人清真寺既方向 ,佢地話好遠仲叫我搭的士 ,

不過我覺得D差人都係奸既 ,堅持信自己

但係信自己係錯架... 足足行左45分鐘先到呀!!!

伊本圖倫清真寺係一個很細又簡樸既清真寺 ,無其他清真寺咁華麗





不過我黎既真正目真並唔係因為呢間歷史悠久既清真寺

而係佢隔離 "安德生博物館" 

就係因為"MOOK"書中既一張照片

照片中令我感到該博物館 ,有十分有異國風情既裝潢

好可惜既係博物館已經過了開放時間lu...

失望而回既我 ,亦都結束我既流浪之旅



伊本圖倫清真寺 (Mosque of Ibn Tulun )

===========================================



於是搭的士返阿泰既屋企叫 " 嘛 D " 既地方

返到去竟然無人應門 ,唯有坐係門口既石階等佢返黎... 

唸返今日都唔知行左幾多里路呀!!! 感到成個人都散晒...





沖完涼後 ,阿泰帶左我去山頭參觀佢既業務

原來佢係將一舊舊既大雲石 ,砌成一塊塊運返大陸架~

(依家佢既業務已擴充到伊朗啦!!! )

夜晚唔記得左食咩 ,之後返到阿泰屋企 ,感覺就好似返到自己屋企一樣舒服呀 !



阿泰既生意