2016年8月15日 星期一

Day 18 (上) 無敵露營車(維多利亞瀑布城-津巴布韋)

(Day 18) (上) 2015-9-28
住宿:Kwalape Safari Lodge
行程:維多利亞瀑布城(津巴布韋) —> Kasane(博茨瓦納)

橫渡非洲之旅由今日開始,將會用露營車嘅方式,走埋最後一段。自駕遊方式都幾得我歡心,亦喺不少國家試過。雖然曾於非洲埃及自駕,但喺原始嘅非洲南部自駕,感覺十分特別。至於露營,咁大個人只係十幾年前歷奇課程玩過一晚咁大把。要同港女兩個人喺荒涼嘅非洲原野露營,真係諗起都刺激呀!



港女係出發前一早已用電郵聯絡好今日0800於酒店交收露營車。等到過晒鐘,唯有叫reception幫忙打電話,打到0900才有人接聽。職員話要再打俾個司機相約交收地點,因為司機唔知我地住邊喎⋯ 頂!咁最初又叫我地交個住宿地點,又話0800交收⋯ 期間不時停車場及接待處兩邊走,見到露營車又話呢架係、嗰架係,都幾攪笑。最後確認架車在途中,我們便回房間執行李。等候期間,向專門安排周邊活動嘅櫃台詢問bungee jump詳情,職員一味叫我地預早訂比較好,但我地都唔知幾時先攞到架車,所以決定去到先算啦。
左:房間露台,無時間享用
右上:係酒店草地慢步,看到了野豬也慢步
右下:小心有鱷魚!


成十點幾落去酒店正門嘅停車場,終於見到我地嘅露營車啦!係一架由Ford Ranger農夫車改裝成露營車,十分前衛。一名白人肥職員向我們介紹這車嘅運作,駕駛操作方面我就無問題呀,反而其他有關露營嘅功能都十分多,真不能一下子記得晒。唯有不停拍照同寫筆記,同埋旨意職員留俾我地一大疊FAQ。這露營車主打快速開合,話五分鐘就可以還原。
介紹少少這露營車吧。這是四驅車,無一般豪華露營車笨重嘅感覺,可以應付大部份路況,絕對適合非洲自駕遊。當然,我還是想試吓豪華露營車嘅,希望將來有機會體驗吓~ 這露營車打開後分上下兩層,共可瞓四人。有一枱四櫈、廚房方面有石油氣煮食爐、各款煮食工具刀叉碗碟、不同嘅杯,還有一個特大雪櫃,相信齊全過好多人屋企嘅廚房。車尾有兩罐石油氣,一罐供煮食爐用,另一罐就用來作熱水淋浴,不過要係室外落簾,仲有個盤俾人洗衫。這車可以注入70公升水,我們最後只係用嚟洗吓手、水果、碗碟。日常雪櫃供電係靠車嘅電源,但當日間長期停泊時就可撥去用太陽能叉電,因為車頂有太陽能發電板~ 車內嘅插頭係南非獨有,稍後要去超市買⋯
這露營車嘅尾部未打開時看似普通,當打開時真係大開眼界,所有設施都收納得好完美,可以用無敵來形容。真的麻雀雖小,五臟俱全。


未打開前

打開下層側邊

打開後就可以打橫瞓,我成6尺高都仲有好多位(還未佈床鋪)

打開頂部仲可以開多層,再可以容納多兩人

打開另一面,就是廚房,齊到呢~ 杯都幾種,真有趣~

超巨型雪櫃

右上角按鈕係用來調教到太陽能

這個位收納了一張長方形大枱

另架車又收藏左4張摺櫈

拿,沖涼就要這樣打開,再加浴簾。不過從未試過,因為營地有浴室~ 左上白色正方形位置收了一個花灑。

煮食爐,熱水沐浴就靠晒佢

車尾又有個水龍頭

去到Camp site用來取電的


職員好快咁講解完一次,只有3-4成入腦,看來要慢慢摸索了。之後入去酒店借張枱來簽埋D文件,及講解一些過境文件及程序。他稱公司是位於南非,所以這露營車係南非出發,穿越一、兩個國家,走過數千公里才交到我們手上架!真係辛苦晒~ 從中就收多了我們$4xxx-HKD附加費嘞!


之後由我駕駛,揸到職員位於不遠處嘅屋企。發現架車只行了兩萬公里,即係同新車無異。到達佢嘅屋企,係豪宅格局,有兩個當地黑人工人正在打掃,喺當地應該屬於富裕一群了,應該不是普通司機咁簡單。佢給了我一套未開封嘅被鋪床褥枕頭,仲話有多一套「士啤」、問我地夠唔夠添,哈哈~ 





22 則留言:

  1. 真係好犀利連淋浴花灑都有@@
    我睇電視美國紐西蘭果D露營車都係算豪華版,似架大貨車,未見過喱種摺合式的,真係好神奇細細架車竟然可以打開裝咁多嘢!!!

    回覆刪除
    回覆
    1. 你睇埋我之後嘅行程,就知同傳統大貨車咁嘅露營車無得比架! 呢種機動性強,大型果種就要用來享受。

      刪除
  2. 架車真係幾勁..收納得好好!!!而且架車好新..
    我就係想講...乜非洲都有白人做司機既咩??
    佢地係非洲應該係高人一等哥d人黎架...(南非就係咁....所以但下d既野都係黑人做)
    哥個唔通係老闆....

    回覆刪除
    回覆
    1. 係呀,架車行二萬公里咋! 嚴格來說是一部新車。加番先!
      嗰白人屋企仲有兩個黑人工人打掃,唔似普通司機咁簡單,所以有機好似你咁講,不過公司總部係南非噃。。。

      刪除
    2. 睇外表已經好新~估唔到少女既內裏都係一個少女~~~~~(我唔知講咩...)
      人地有錢人梗係有幾間屋架啦衰鬼~~~~~~

      刪除
    3. 哈哈,你成日都語無論次架啦! 不過我都係,成日要港女來更正,唔係遊記點會咁順暢呀! Wakakaka~~~
      睇佢肥肥白白一定係好有錢!

      刪除
  3. 這露營車你地瞓幾日呀?唔沖涼呀!

    回覆刪除
    回覆
    1. 十日,通常campsite有廁所,所以無沖,已加返上去啦~ 唔該JJ~

      刪除
  4. 呢種露營車我未見過添。

    回覆刪除
    回覆
    1. 之後網上發現有好多用其他車改裝嘅露營車,德國有用Volkswagen貨Vaan改成露營車,不過要google搵好耐先搵到來租。

      刪除
  5. 回覆
    1. hehe~ 通常campsite有廁所,所以無沖,已加返上去啦~

      刪除
  6. 將來我都想體驗一下露營車.而家繼續欣賞你嘅體驗先!

    回覆刪除
    回覆
    1. 有個美好經驗會上引架! 不過如有個失敗經歷就會怕怕,好似之後我去美國咁⋯

      刪除
  7. 架車好正喎, 石油氣咁曬法怕唔怕架?

    回覆刪除
    回覆
    1. 係非洲酷熱嘅日曬,經過精心設計計算,應該無問題吧⋯ 呢個問題我都關心過!

      刪除
  8. 架車真係麻雀雖小,五臟俱全。
    十年前我在澳洲八過隔離隻鬼架VAN,
    LOOK完D設備,齊全到我地個個嘩嘩聲...
    猛咁同妹夫他們說下次自駕都要嘗試下住...

    回覆刪除
    回覆
    1. 當職員開合這露營車時,我同港女都嘩嘩聲架!
      第一次感覺好重要,我第一次玩好happy,好想再試,可惜之後美國印象較差。如掉轉美國先,應該未必有下次⋯

      刪除
  9. 你所謂的豪華露營車,可是指那些屋仔車motorhome?我都有玩過:http://desafinadoreborn.pixnet.net/blog/post/5290894 可惜呢篇野從「丫烏」搬過來既時候,D相消失嗮。「同港女兩個人喺荒涼嘅非洲原野露營」––––真係夠勇!我記得響肯亞safari,晚晚聽到野獸叫,我就唔敢自己去。

    回覆刪除
    回覆
    1. 「丫烏卜」搬過嚟嘅相我一張都睇唔到呀! 不過應該是你指果種。 絕對認同你文中所講,與其有公廁,為何仲要用車內要倒夜香嘅廁所呢! 不過你最後果part好攪笑,一路睇我完全有晒畫面,wakakaka~~~~

      刪除
  10. 嘩, 呢架車好厲害呀! 俾我聽完一次一定唔記得晒點變啲嘢出嚟 >.< 在意嘅功能我會要求俾我用手機拍片 ^^"
    期待之後嘅行程

    回覆刪除
    回覆
    1. 所以我係咁狂影相,哈哈。。。
      之後會越來越好睇架!多謝~

      刪除