2016年1月11日 星期一

續Day 3 起點(莫三比克島)

續(Day 3) 2015-9-13
住宿:Ruby backpacker
行程:Nampula —> Ilha de Mozambique


上回講到經過五個小時車程,到達莫三比克東岸嘅同名小島。我這主題之旅是橫渡非洲,由東非前往西非,但為何又往東走呢?



這島上嘅Ruby Backpacker好大間,亦較有規模,Reception有好多島上活動嘅宣傳單張。這住宿與Numpula的Ruby有共同名稱,不知是否同一個老細。我今晚亦都住床位
$600-Metical($100-HKD),價錢比Nampula略平一點點。仍未決定住一晚還是兩晚,隨意吧!


右上:reception+吧台
左下:廁所+浴室
中下:中庭
右下:廚房


安頓好一切已很晏,趁入黑前隨即動身外出遊覽。來這個跟莫三比克同名小島有一個原因,就是我要找個非洲大陸的東岸,見到個海先算起點,來實踐我這個旅程的主題”橫渡非洲之旅”。其實起初尋找起點是二揀一,另一個則是較北面嘅臨海渡假聖地Pamba。Pamba有飛機直達,不用好似來莫桑比克島咁麻煩要再搭車前往。最後選擇這小島因為較具歷史價值,整個島都列入文化遺產(雖然我經常講毫不理會是否文化遺產)。而渡假聖地隨時都可以去,識得我耐嘅都知我喜歡歷史啦。
於是向較近島嘅北面海邊進發! 先到一個位於海邊嘅廣場及舊總督府,廣場上有一個石像不知是達咖瑪還是舊總督。但這海邊位於島的西北部,並非我要去的東岸。於是往東面走,這島上十分寧靜,除了一條大街有點人氣外,其餘的建築物都是十室九空,全是荒廢了。街道上亦無人行走,偶爾看見一兩名孩童玩耍,有點像劫後餘生的城鎮。




無耐看見島東面海岸的印度洋,千辛萬苦,終於到達我這趟旅程嘅起點啦! Yeah~~~ 好興奮咁拍了很多張自拍照~
只見這面海岸驚濤拍岸,人影都唔多隻,只見有一頭狗,而海邊嘅欄杆都被海水沖爛晒。建築物方面全是頹垣敗瓦,有戲院、大宅,有些看來也是歷史文物,日久失修,一於入內探吓險先~


到左東岸印度洋啦! 橫渡非洲之旅正式開始!



人影都唔多隻!

呢隻獅子,好明顯係殖民地標誌,入內探險先~

應該是日本辦學


之後沿海岸線北行,到達島嘅盡頭看見城堡,這城堡留待聽日才參觀吧。轉返西岸開始有返D人氣,經過有球場及當地人連嘅沙灘。行到天已黑齊食貴價餐廳,龍蝦$720-Metical($120-HKD),及當地啤酒。雖然貴價,但島上電力供應不足,停了好幾次電。


今日於島上行走當一見有人,總會向我大叫Amigo,我唔知佢地有乜企圖或意思當然無理佢地。結賬時順便問一問侍應乜野係Amigo,原來係葡文,佢話係”friend”嘅意思。






晚餐後天已黑齊,見燈光昏暗嘅街角,襯托著破落的建築,人影都唔多隻,一片死寂,說不出的感觸。黑夜期間set好腳架影低這一刻,又有人在遠處向我大叫Amigo,我都即時回應一聲及揮揮手。佢無走埋嚟意圖不軌,純粹行過叫聲Amigo就算。可見當地人嘅純樸,我之前亦疑心太大怪錯了人了。自此,整個莫桑比克行程講得最多嘅就係Amigo,亦都完完全全對當地黑人放下誡心,讓銀仔感受到遊歷來最真誠嘅一面。(可能是預期與現實差距太大呱)
之後看到於荒廢嘅建築物內透出燈光,原來有很多當地居住於這些荒廢建築物內,空朗朗、乜都無,比家四壁更甚呀!真淒涼,香港人實在太幸福了⋯





返回住宿期間迷路⋯ 由於住宿位於小巷,而島上的小巷縱橫交錯,加上燈光昏暗又無人,行走期間都迷話唔心寒。寧靜中當一有人出現,不知是否歹人,杯弓蛇影。好彩都好快搵到,安全到埗。


返回住宿沖完涼,攞部相機上天台拍攝星空。咦! 這款感光元件低一兩個檔次嘅3/4機,而3/4機當中級數也低一兩個檔次嘅輕便相機都拍攝到美麗嘅銀河喎! 可惜有雲及這位置構圖唔夠靚。不過都令到我後來用這輕便相機拍攝任何題材、包括拍攝銀河都加有信心。所以我成日都同人講我不是器材派,平價相機不是相機嗎?我就係要用平價相機影得比人好!




影完相路過中庭,與正在準備晚餐的住客又雞啄唔斷,住過這類旅舍都知實識到朋友。一見面一定問Where are you from? 你來自哪裡?做乜職業?行程經歷及路線等等來交換情報。傾談間得知一個英國女仔是助產士,手舞足蹈咁形容自己嘅工作,好好笑~
今日坐完長途車又速遊小島,想早點瞓,但被7-8名住客邀請一同BBQ,咁開心看來今晚又要夜瞓了~ 
看到當地雷鬼人正用純屬手法醃製四條大魚,望一望有兩條正是香港賣好貴嘅東星班,當聽到只需$400-Metical($80-HKD)四條魚,真抵到爛!!! 當然要個當地人先可以買到咁抵啦~ 由於無酒要外出買酒,我當然為團隊服務吓啦,與雷鬼人及英國助產士一同外出。但行了最近一間無酒賣,由於島上尤如死城,如要買飲品都不知去何處買了。我們跟著雷鬼人一直行,佢極之健談又攪氣氛嘻嘻哈哈。期間遇到落大雨,大家都在黑夜中V娃鬼叫跑步,不過苦了我剛沖乾淨涼⋯ 最後係今日搭車路過嘅廣場附近買了數支啤酒$50($10-HKD)



返回住宿D海鮮已燒好,果然好鮮味,不過我總是覺得唔醃製會更好味,咁當然用我地中國人”蒸"熟佢會最好啦~ 開餐期間大家已不是講旅遊了,聽到一頭霧水,唯有做聆聽者⋯ 計數時他們知我早前已食過晚餐,free我,真係太好了~ 

BBQ後再沖多次涼,1200上床 Zzz


18 則留言:

  1. 估唔到當地人咁友善
    破落欄杆o個張相好有味道

    回覆刪除
    回覆
    1. 係,全部都好友善,呢樣野先係整個行程最開心,最大的發現!
      呢張竟然好有味道?多謝你~ 可能被我遺忘了。

      刪除
  2. 找個非洲大陸的東岸>> 你都好堅持喎.

    回覆刪除
    回覆
    1. 係找個非洲大陸嘅東岸,島上再找東岸呀,哈哈~ 係行程中比D任務自己啫,幾得意。

      刪除
  3. 好有一份破落美感(比之前你去古巴的相片更破落),昔日喱度應有不少富貴歐洲人住吧
    能結識到好朋友,沖多次涼無所謂^^

    回覆刪除
    回覆
    1. 跟古巴比較方面你有這種感覺,我相信絕對是因為古巴是熱門旅遊地點,媒體出現率一直人氣高企,比較這個鮮為人知的非洲角落,所以比較無咁特別了。
      其實我想早點瞓的⋯

      刪除
  4. amigo西班牙文都解朋友,阿嫂無教你?哈哈!那些 where are you from 背包客對話,我熟悉不過,不過假如沒有語言障礙而且在安全情況之下,我寧願與當地人交流,所以有時候住AirBNB比青年旅舍更多得著(雖然我對Couch Surfing非常抗拒)。另外,一萬個同意旅行帶的攝影機不一定需要專業,近年我越來越發覺,越是醉心旅遊的人,照相機越細越簡單,因為他們對於用心去感受和瞭解異國的風土人情,比對影靚相更有興趣。我可能都開始昇華到這個階段,哈哈!

    回覆刪除
    回覆
    1. 佢無教我喎,哈哈~
      Airbnb絕對是比較好,我都不時會用。但有時對於我呢D去到邊住到邊,又無得上網嘅人就唔係咁合適了⋯ 咦阿Nado,原來你都係攞緊大機周圍去架?

      刪除
  5. 其實會唔會有時我地真係諗多左...世上仲有好多好人?
    不過我去南美都係有d驚驚地...求安慰~
    英國助產士都係一個人去?!?!
    好正呀個bbq~~
    你床位先100蚊....餐飯要120.......真係貴價餐廳喎~~~~
    不過對澳門黎講真係好平~~~~~~~~~~~~~~

    回覆刪除
    回覆
    1. 有時真係會諗多左,但如果我們累積過落後地方嘅經驗,就絕對是好多衰人,經常要鬥智鬥力,激到好鬼勞氣,所以防人之心不可無。加上非洲黑人比全世界渲染到幾咁邪惡,暴力強姦老笠殺人放火通通都一定係佢地,起初難免會擔心。現在就係用我親眼看見來同佢地平反!
      以我經歷南美絕對較我這非洲諸國較危險,不過只要小心點應該無問題的,努力!
      係呀,助產士係女仔,一個人去架。係當地都遇上好強多一個人去嘅女仔。
      相信呢間餐廳絕對不是一般人去的⋯

      刪除
  6. Silver,真係好詳細的旅遊Blog.自由行特別精采.住民宿可以認識很多朋友.其實有些用人很貴的攝影器材都沒有你拍得那麼美,攝影最重要有攝影眼,只要構圖美用手機也能拍出美麗的相片.

    回覆刪除
    回覆
    1. 其實我盡量詳細記下,唔想D精彩行程點滴被遺忘呀! 同埋想將這訊息帶比更多人知,消除誤解。
      Andrew兄見笑了,我很多都不加思考隨意影,只有少數會用心去影。無錯,有時一張相靚與否唔係齋睇相機嘅質素,而是有好多元素的,有D大師用手機也可影到大師級傑作!

      刪除
  7. 蒸魚是中國秘方,天涯海角,我至今仍未碰到過一個外國食家跟我討論蒸的藝術。
    非洲星河怎樣看我都覺不及南美星河的美,銀仔可有同感?多過幾年,待我長大沒再那麼怕冷,去看看北極星河,然後再跟你討論……

    回覆刪除
    回覆
    1. 咦! 莫非外國人始終鍾意食較無味嘅炸魚!
      我覺得都係,不過我南美旅途上最多時間只係玻利維亞高原上看見星河,較近天空,亦都較美。非洲行稍後租車,於郊外露營晚晚與銀河相伴,反而較為深刻。
      是否待你的小六斤長大呀?哈哈~ 好! 等你。
      見你連續幾篇留言,有否興趣重拾封塵嘅金筆(應該是金健盤),再打見聞給我們睇呀!

      刪除
  8. 每個地方都有好人同壞人,相信黑人亦一樣,有你驗証後起碼黎過你卜就會知!不過女士獨遊我始終有保留,唔怕一萬至怕萬一嘛⋯⋯><

    回覆刪除
    回覆
    1. 我見都有唔少鬼妹架! 可能佢地外形較硬朗呱~
      係呀!旅行就係帶比我要親眼才相信!

      刪除
  9. 香港人真係好幸福,所以希望有能力嘅人可以多D幫吓有D有需要嘅人!

    回覆刪除
    回覆
    1. 無錯! 所以我地呢D捐錢係最基本了,不過我諗住唔捐,後記話你知

      刪除