2015年9月9日 星期三

Day 9 發現賊踪(西班牙巴塞隆拿)

(Day 9) 2015-04-09
住宿 : 民宿
行程 : 巴塞羅納


原本同港女有共識話自然醒,但唔知點解港女又會較鬧鐘。晨早就比佢嘈醒,唔理佢繼續瞓,瞓醒時全部人走晒,可能港女叫左我幾次都唔醒,嬲我唔理我呱⋯


瞓醒已是中午了,擦完牙港女買左一大盤士多啤梨回來燶口燶面,即時與港女用食完早餐就去聖家堂會合團友。(港女按:呢段時間兜咗幾個block,買了postcard、郵票、同埋好難食的朱古力churros。喺西班牙買郵票係要搵煙草店嘅,幾有趣。)
@1330





團友Ellen今早再去購物區物,並講了少少難題。話說尋日幫人睇一個袋並Whatspp回香港朋友,因時差問題無即時回覆,隔了一日回覆才知道唔係想買嘅Model,所以今朝再去幫朋友買⋯ 我會咁諗如果自己興趣買野係ok嘅,但如果純粹幫人買而自己唔鐘意購物說幾受難。(購物相信都是Ellen的興趣) 我有個朋友話去親旅行,老公D屋企人就列出水蛇春咁長嘅清單比佢入貨;如日本就必定去執藥、零食,有好多甚至香港可以買到,去幾日旅行必定用左1/3時間於其他人身上,話又唔知點推老公D屋企人喎!真係慘⋯ 所以銀仔永遠唔會幫人買野,天皇都係咁話,更加唔會走水貨賺錢!今次阿妹死纏叫我幫佢買名牌袋,就俾我剷到佢飛起。除非我買開,否則絕對唔會浪費寶貴嘅假期去做D唔鍾意做嘅事。而且幫人買貴重物品,責任實在太大,買錯、買貴、整花、整唔見點算呢?早前中港矛盾,港人就話大陸人只懂購物搶人地嘅用品,自己何嘗又不是呢⋯


建築百多年還未完工、高第畢生傑作聖家堂,外圍長期有天砰、棚架,點樣都影得唔靚,明信片嘅聖家堂都係經電腦加工嘅⋯ 一入到去就覺得內部好壯觀,人人即時舉起手上嘅相機、電話拍攝。如果是教堂迷、建築師及室內設計師一定為之著迷!高第死後被安葬於自己嘅心血之內,未有開放嘅地下墓室。
想登上其中一座塔上,有升降機可達至塔中間。先要寄存手袋,塔上可飽覽巴塞全景。沿住好窄嘅樓梯落塔,對長者都唔係咁容易,有個老伯伯停低休息時,就講笑話 “I feel so close to god”。去返大堂,喺座位區拿出資料認識聖家堂及高第,也坐低抬頭慢慢細味一吓高第嘅心血。雖然銀仔對設計一竅不通⋯ 臨離開時看到掛牆嘅音響原來用上頂級品牌”Bose",不知是否贊助還是動用經費,如是後者就⋯ 因為百多年還未完工的聖家當資金的來源主要靠個人捐款,捐款的多少直接影響到工程進度的快慢嘛。
參觀完畢再於買些紀念品就離開,於聖家堂總共逗留了三小時。€19.5
@1600


讀萬卷書不如行萬里路之-聖家堂:(取自Wiki)
聖家宗座聖殿暨贖罪殿加泰羅尼亞語:Basílica Expiatòria de la Sagrada Família;西班牙語:Basílica y Templo Expiatorio de la Sagrada Familia),一般簡稱為聖家堂Sagrada Família),是西班牙巴塞隆納一座天主教教堂,由安東尼·高第設計,其高聳與獨特的建築設計,使得該教堂成為巴塞隆納最為人所知的觀光景點。
聖家堂從1882年開始修建,因為是贖罪教堂,資金的來源主要靠個人捐款,捐款的多少直接影響到工程進度的快慢,所以至今還未完工,是世界上唯一一座還未完工就被列為世界遺產的建築物。雖然該教堂並非主教座堂,但教宗本篤十六世於2010年11月7日造訪此教堂時將其冊封為宗座聖殿[2]

這個教堂有東、西、南三個立面:「誕生立面」(Nativity façade,位於東側)、「受難立面」(Passion façade,位於西側)和「榮耀立面」(Glory façade,位於南側,尚未完工)。每個立面各建有四座鐘塔,共計十二座,分別代表耶穌十二宗徒。除此之外,建築的中央另有六座高塔,其中四座代表聖經四福音書的作者——馬太(瑪竇)馬可(馬爾谷)路加以及約翰(若望),一座代表聖母瑪利亞,一座代表耶穌基督。所以整個聖家堂的設計當中總共將建造十八座高塔。代表十二宗徒的十二座高塔的高度介於98.4公尺到117公尺,代表福音書作者的四座高塔為120公尺,代表聖母瑪利亞的高塔為120公尺,代表耶穌基督的高塔則為170公尺。


入口是"誕生"




呢張相每人都話我執相,識得銀仔耐嘅都知我嫌煩、及唔識執而無去後製,大家不妨去聖家堂都試吓吖~

搭𨋢上塔前先要寄存行李

不要破壞文物!

塔上可飽覽巴塞市,洋腸物體叫阿格巴塔Torre Agbar


小小心意吧~

從"受難"主題離開


下午4時才參觀完聖家堂,於附近餐館食遲來的午餐。西班牙炒飯又係唔少得,又叫咗西班牙奄列,食慣米飯嘅香港人來到,絕對唔怕唔啱食。



午餐後我們去西班牙最後一個要參觀嘅景點-畢家索美術館€11。以我們不懂欣賞藝術嘅人來講,一入內由頭笑到尾!美術館內展出畢家索於藝術創作的歷程,起初感覺正常,後期開始走向抽象,我們細心欣賞吓這些抽象大作,原來好多正正就是我們小學生時的作品風格,所以笑到碌地囉~ 可惜館內不準拍照。參觀後例牌去紀念品店,買了貼紙簿給姪女;我與高Ling也精心挑選畢家索恐怖Postcard給共同好友醬爆及Stephanie。希望唔好嚇親人,不過我地一定會回敬一句:「藝術嘅野你識條鐵咩!」哈哈~

入美術館前有人叫我影張有藝術感覺嘅照片,諗都唔諗亂咁影





於畢家索美術館附近的食肆都好貴,又唔太吸引。最後經過一間麵包店,就買點角仔來作聽日嘅早餐,跟住就搭地鐵回程。於地鐵車箱內終於遇見賊踪了,於車廂內行駛期間我們均站立著,突然前面有一名黑人高聲提醒一名外國人,令到全車卡人都注視。只見該外國人孭了一個斜孭袋於身前,已被數名女子近距離重重包圍,斜孭袋正是該班賊人的目標。該班賊人全是女子,皮膚黝黑,像日常所講嘅吉卜賽人,領頭羊年約40多歲,其餘4人全是年輕女子。回想剛才行車期間,這班人就係正正於我面前行過,我也感覺到前褲袋輕輕被摸了一吓添!好在財物收得密實,無成為賊人的目標,所以我成日講,偷竊我並不害怕,因為太多數是個人的疏忽引致,賊人通常係取易不取難,最怕都係老笠啫。
經提醒後該受害人不知是否感到瘀爆,下不了台,見他只是不在乎地望了一眼自己個斜孭袋,也沒有向提醒他的黑人道謝,見此情況我主動向該黑人道謝。埋站後賊人匆匆落車,大家家互提be carafull。回港後將這遭遇跟人分享,聽後每人都覺得竟然是黑人做好人而好驚訝。而再次証明好人與壞人並無人種之分,黑人也有好人!



晚餐再次於聖家堂附近食,不過不失。回到住宿後大家來個畫畫比賽,以這旅程的一個畫面,再用剛才笑到碌地畢家索嘅抽象來做主題畫一幅畫。我構思時第一時間就想起畢家索所畫嘅幼稚園版貓狗、幼稚園版眼神。最後勝出者係高Ling!原來佢都幾有抽象畫天分喎,也同樣有幼稚園版貓狗。
這幾張名師大作點處理呢?我們好調皮地將這4張名師大作,放入這間民宿內的一本關於巴塞嘅手繪介紹內,而這畫冊相信喺屋主每次跟新住客都必定拿出來講解的⋯ Wakakaka~~~


P.S 最初諗住趕及出發前寫完這個旅程,可惜事與願違,夢想小國安道爾、舊地重遊莫斯科唯有下回分解了。






讀萬卷書不如行萬里路之-畢家索
畢卡索西班牙著名畫家雕塑家法國共產黨黨員,和喬治·布拉克同為立體主義創始者,是20世紀現代藝術的主要代表人物之一,遺作逾兩萬件,包括油畫素描雕塑拼貼陶瓷等。畢卡索是少數在生前「名利雙收」的畫家之一。

1881年,畢卡索生於西班牙安達魯西亞自治區馬拉加市,畢卡索的父親也是一位畫家,專攻自然素描鳥類等動物,一生擔任工藝學校的藝術教授和當地美術館館長
畢卡索很小的時候就展現了對繪畫的熱情與能力。根據畢卡索母親的說法,畢卡索第一個學會說的話是「皮茲、皮茲」,是西班牙語「鉛筆(lápiz)」的簡短發音。七歲時,畢卡索的父親開始正式的訓練他學習人物素描油畫。畢卡索父親是思想傳統的教授,他深信模仿大師的作品、素描石膏像與人體模特兒是每個畫家必要的訓練。於是,畢卡索一心一意的專注於藝術上,因此忽略了課業。
1891年,由於父親當上了一所美術學校的教授,畢卡索一家搬到了拉科魯尼亞省。他們在拉科魯尼亞待了將近四年。一次偶然,父親發現畢卡索對他未完成的鴿子素描塗色,在仔細觀察畢卡索的筆法後,畢卡索的父親深深覺得他十三歲的兒子已經超越了他,並發誓從此不再繪畫。
1895年,畢卡索七歲的妹妹康琪塔死於白喉,這件事成了畢卡索一生中陰影,畢卡索一家搬到了巴塞隆納。後來,父親說服學校讓畢卡索參加跳級考試,而畢卡索在一星期內完成了一般學生需要一個月完成的考試,當時年僅十三歲的畢卡索獲得了評審委員會的極度肯定。父親在家附近租了一個小房間讓畢卡索獨自工作,並一天內多次檢查畢卡索的畫作,這使得父子經常爭吵。

畢卡索的父親和叔父決定把畢卡索送到西班牙一流的藝術學校學習:馬德里聖費爾南多畫家藝術學院。1897年,十六歲的畢卡索第一次獨自一個人出發前往馬德里。然而,在註冊後,畢卡索卻因沒辦法接受正式、規規矩矩的教育,而停止上學。畢卡索轉而到馬德里普拉多美術館欣賞可敬的藝術家的作品,像是迪亞哥·委拉斯蓋茲弗朗西斯科·戈雅弗朗西斯柯·德·蘇巴朗的作品。畢卡索特別崇拜埃爾·格雷考,他的特色,像是拉長的肢體、醒目的顏色、神秘的面容,都深深的影響著畢卡索的畫風。

17 則留言:

  1. 塔頂望出去好似子彈那座係咩建築物呢
    教堂入面個天花好靚
    你地果4幅佳作一定令人會心微笑
    如日本就必定去執藥====>XXXD我都有去陪人執過藥和零食wakakakaka....

    回覆刪除
    回覆
    1. 加左資料上去啦! 基爾講子彈真文雅,我地叫佢洋腸,當地人叫做陽具,哈哈~
      個天花設計,真係高第先比佢諗到。
      我都好想知屋主同人介紹時跌出嚟乜反應呀! Wakakaka~
      你自願陪人嘛,你試吓被迫就幾討厭;所以我好少鬧D big6人來搶野,因為身體有親戚朋友一樣搶其他國家D野。

      刪除
    2. ICIC~~~~原來係間供水公司,建築師話意念係來自噴泉喎XXXD
      你喱度女性讀者比較多,唔係幾好意思丫嘛,都係文雅啲好wakakakakaka.....

      刪除
    3. 但內裡上網睇原來好多人都唔知係乜,哈哈~
      哈哈~ 原來基爾怕羞~

      刪除
  2. 好彩我去旅行冇乜人叫我去買野

    回覆刪除
    回覆
    1. 你去個d冇野shopping地方,都唔知叫你買咩囉!

      刪除
    2. 王子都夠膽叫! 人嚟,拖出去斬!

      刪除
    3. 王子通常去完先話畀人知,邊趕得切叫佢買唧XXXXD

      刪除
  3. 你旅行返尼再加多d聖家堂相啦!唔夠喉喎!

    回覆刪除
    回覆
    1. 好啦~
      上次你問果間日本餐廳叫Ta Mi
      http://www.tripadvisor.com/Restaurant_Review-g187497-d997513-Reviews-Restaurante_Japones_Ta_Mi-Barcelona_Catalonia.html

      刪除
    2. 港女:喺TA MI仲食咗當地好普遍嘅炸尖青椒,都幾得意。如果平時散叫要幾euro就唔會考慮,所以今次放題唔錯。

      刪除
  4. 我仲以為畢卡索係法國人.

    回覆刪除
  5. 我反而唔捨得比錢入呢間教堂^^

    回覆刪除
  6. 回覆
    1. Andrew,係呀,旅途上係一個建築物逗留咁耐我都算少見了

      刪除