Day 1 長途機(墨西哥城)

(Day 1) 2014-11-1

住宿：Oasis民宿

行程：HK—> 達拉斯 —> 墨西哥城

［由於旅途中後段不見了新買既傻瓜機，所以大量行程點滴欠奉，遊記照片亦都欠奉! 由於無照片，行程點滴真係從腦袋好努力搜刮出來，所每篇都將會係嘔心瀝血之作⋯］

諗住出發前搵屋企人飲早茶，加上執行李需時，所以出發前只瞓了三小時…

去東涌會合港女，點知佢千叮萬囑叫我print 證實自己係single既個人資料，佢自己竟然漏左係公司喎！好在港女同我都曾經係機場工作，咁啱又識人可以借部腦一用。

話晒美國機，怕保安繁複，所以預足時間check-in，但又比想像中順暢噃！ 今次選乘American Airlines，無諗過服務及設備都幾好！座位控台有齊插蘇位，USB及Headphone 插頭，唔知係咪銀仔搭飛機搭得少，除了插蘇位係N年前坐阿聯猶航空見過一次外，其他都未見過！（我講經濟艙） USB用來差電又話可駁電視，而可以用自己headphone 亦都係第一次！早前從報紙得知美國機已開放wifi，我都係第一次接觸！價錢分別美元計$12/1hrs, $17/4hrs及$19/全程，以十萬八千尺高空都有得上網就唔算貴了，我地都蠢蠢欲動，不過最後同有「網癮」既港女商量左好耐，覺得上網用途只係facebook 之類，而且可以睇戲打發時間，所以都係唔好浪費金錢了。

登機後發現機上所有乘客都帶備禦寒衣物上機已心知不妙，我就只著短衫短褲上機，當機長廣播達拉斯只有10°C… 大獲！ 轉機時咪有排凍？會唔會直接泊登機橋，或要坐接駁巴士呢？ 如後者就大鑊了！ 都怪check in前掛住幫港女煩print野，無暇細想Tim…

機上睇完套"begin again"就瞓！該戲內容與"冧歌情人"類似，我覺得更好睇。 我大覺瞓時港女繼續煲戲，都不知煲了3、4、5套了，我提醒佢要追返D時差，瞓唔著都不應過份傷神吖，加上佢D傷風咳又未好番，佢唔聽我話一陣辛苦我實唔可憐佢架！

港女：「真係好攰喇，喺飛機渡過咗差不多12小時。食咗兩餐、睇咗三套戲(begin again, blended, the fault in our stars)。”begin again"令我諗起同一導演兼編劇的"once"，都係因音樂結緣嘅故事，最尾一套就睇到我喊苦喊忽（銀仔最憎我睇戲喊，無計），但都係瞓唔著，仲要無人可憐 :( 點算？」

長途機既鬱悶，令我諗起對上一次坐長途機已是兩年前經英國去冰島既事，唔怪知有種好耐未出過遠行既感覺啦！

航班由光明，穿越黑暗世界再重返光明，食過三餐飛機餐後，估唔到空姐派只是一張簡單入境卡，跟上次關島超繁複既兩張入境卡差天共地呀！ 當然我地轉機都要填啦！

近15小時機程，到達達拉斯機場，好在班機直接泊登機橋，無外套都還頂得順! 到美國境不論入境或轉機，都要辦入境手續，所以轉機都係預返多D時間好。 既然到達達拉斯，當然冒著寒冷天氣走出室外影返張相啦，當然又無埋啦⋯

係美國當然留意吓物價，機場据扒都好合理喎！ 而16oz牛扒更只是42-USD咋！ 回程時擦返餐先~

去墨西哥城係細機，但一樣有wifi，睇黎American Airlines所有既航班已有wifi提供噃！ 不過上到機先知Delay no more！原定由1715開出，等到1845先起飛。

2小時後到達墨西哥城，已是晚上9:00了，這裡比達拉斯慢一小時，見禁區內有銀行櫃台可換錢，換些少防身先，換了$50-USD，但原來入境後係到境大堂既長長走廊，有無數咁多間既找換店，匯率平均1:13（USD＜－＞Peso)，好過禁區內既1:9好多好多！睇黎禁區內都係睇吓有乜傻仔上釣，好在我換雞碎咁多啫！

由於香港有佔中，出發前仲話有人想佔領埋機場，不過原來墨西哥城機場已有人佔領，抗議政府同毒犯勾結，擄走左幾十個學生！ 係一排check in櫃台位置已有人紥營，大約有十多個營及大量標語、照片、剪報。

(遺失珍貴相片，只能從文字記錄)

由於屋主話今日唔在家，搵了另一個人係屋內等我地，而班機又delay左一個多小時，出到室外成晚上9點，怕要煩到人等我地咁耐，所以想快D去民宿，正當港女想搭的士之際，原來要去櫃台先買票，發現價錢昂貴，「好似」索價$300-peso以上(因為唔見了相機，無晒記憶)，如搭的士咪換左既peso都用左大部份？ 於是走去搭地鐵，去到地鐵站上上落落都要行樓梯，原來港女搵資料時已知墨西哥城既鐵路月台電梯欠奉，睇黎當地人都幾好腳骨力噃！

地鐵$5-peso，跟的士比較差2、3十倍！

地鐵上遇到熱情，樂於助人既墨西哥人，先係買票時前面既人偷聽到我地去邊，然後係同一車廂內主動提我們轉車；轉車後又遇到另一班熱情既當地人，見我地遊客十分熱情，不停同我地傾計同影相，而港女初試啼聲用西班牙語溝通，唔錯喎！溝通到！

從轉車站開始已見到不少既當地人都悉心打扮，扮鬼！ 正呀！ 我前一晚飲宴完趕住出發就係要參觀呢個party咋！

離開地鐵，係無乜人既橫街摸黑尋找預約好既民宿，出名危險既墨西哥城都咪話唔驚！ 

民宿當然無招牌啦！但根據門牌編號，也不算太難找到； 屋內有個肥大叔招待我們，佢只懂西班牙語，又係港女發揮既機會啦～

安頓好一切後外出食晚餐，室外氣溫極度寒冷，剛才拎住行李行到爂合合唔太覺，相信只得幾度! 

先經過幾檔幾受歡迎既檔口，但都係食熱氣既Taco，我知Taco係墨西哥人既主要食糧之一，但港女有咳，我又唔鍾意食「薯片」做正餐，所以再冒險模黑向未明確既橫街前行。無耐行到大街，大街有較多選擇，當然都係地道小店啦，因為這裡唔係遊客區。

我地看見一間有類似香港見到既「牛雜牛腩」食店，見有肉應該會飽肚，而且店內都好多客人，所以入內進食，我記得有一樣好似係羊腩配洋蔥，而港女點左上西班牙文時學懂Quesadilla既餡餅，凍冰冰食肉好D~ 雖然唔見左相機，但好在港女有記低食乜：Costilla, Pocole, Quesadilla, 乳酸飲品（佢地當係水）, 一共$135-peso ($80-HKD) 其實墨西哥城物價都幾貴喎!

路經有間餐廳有麵包櫃，就諗住入去D麵包做聽朝早餐。一入到去就見到一個東方人面孔，佢同我地講普通話，我地以廣東話回答，佢又識喎，原來佢係台山人，已經係墨西哥住左好多年。佢就話大家係中國人，麵包唔收我地錢! 不過我都係堅持比錢，人家老遠跑來做生意，我真係唔好意思。最後仲叮囑我地小心點，這一帶遠離遊客區、頗為危險，可能因為正值鬼節先好些少喎!

由於沿途見好多小朋友都攞住南瓜膠兜，根據當地傳統係向大人討糖果，於是係麵包舖門外既糖果檔買了些少，回到住宿門口仲看見一家大細有三個小朋友，派完糖果仲合照留念tim，可惜⋯

民宿：$316-HKD 

補充[係美國過境時好得意，見有人拖住隻芝娃娃排隊過關，也有人袋住隻貴婦狗，問關員後得知原來只要有足夠証明，如醫生紙等，証明雙方無左邊個唔得就可以帶上機啦! 佢仲話會有人拖隻馬仔過關Tim~]