Day 8 食月餅迎月(冰島Skaftafell)

(Day 8) 2012-09-28
住宿：Litla HOF
行程：Vik近郊 --＞ Skaftafell近郊







0800起床，望出窗外，天氣算係唔錯啦! 食早餐時屋主”痾尿”講吓佢日常既生活，因為我地都好好奇，一個人獨居於方圓幾十公里都無人既荒郊，而又無畜牧既佢係點打發時間呢? 佢話平時睇吓報紙，電視，上網等•••
仲教我們睇風向預測天氣Tim! 之後佢攞出一本由佢個仔影,有關本住宿既相冊,佢話佢個仔好鍾意攝影,係2010年冰島火山大爆發時影架,仲話座火山就係佢間屋既後山,真係唔講都唔知噃~

左圖:地下室有大量房間及床位,供應冰島流行既"睡袋住宿"
右下:廁所內既天窗

"痾尿"間屋同一般既郊外民居一樣,四野無人

食完早餐後出發,越行越陽光普照，唔通今晚有機會睇到極光??? 先去尋晚食過飯,南部一個出名小鎮Vik行過圈先; 途經一個Porsmork國家公園,有個好大既冰川,但地圖上顯示,都唔夠稍後要去最大既咁大,所以只係遠距離影幾張相。

命名為Batman山~

邊個話馬唔識坐? 唔通冰島馬聰明D?

去到Vik,先路經去山上"擘大個口得個窿"既教堂,從教堂可飽覽整個Vik小鎮,還可望到海中,零零舍舍一個黑漆漆,好似架帆船既古怪大岩石! 呢舊岩石據說是精靈, 因乘三桅帆船來冰島遭遇暴風雨,就變成這個岩石啦~

 

佢地三人話今個旅程未運動過,所以跑落小鎮,我則揸車落去會合佢地。係Post office門外會合竟然撞到香港人喎! 佢地原來之前唔認識，係一個網上討論區約埋既。共兩女一男，其中一個女仔係台灣人••• 不過我就覺得奇怪，台灣唔係應該去”背包客棧”搵伴架咩? 而且背包客棧裡不論資料或人氣都比香港既網站多好多喎...
呢個台灣女仔同我一樣玩完冰島後就自己去Greenland, 一樣係去果兩大城市! 當然唔少得交流資訊啦~
另一樣得意係個男仔竟然無車牌喎！ 全程由兩名女士開車，佢真係幾識嘆噃~

臨離開見有油站去入油,冰島D油站通常都無人服侍,要用credit card再輸入密碼,我地試左好幾次都唔得,好在有熱心既當地人用佢張card幫我地入油,然後再比返錢佢。

剛離開Vik,係海邊見到好大片”黑沙灣” 亦係Vik最出名之處!

1540到達全冰島最大冰川Skaftafell National Park，泊好架車,先係辦事處睇吓當年探險者D遺物先... 然後步行行去冰川,行吓停吓影吓相，單程約45分鐘步行到冰川; 呢個位置視野唔夠遼闊, 感覺好似得十分一既阿根廷”佩里托莫雷洛冰川”咁大...  沿途見到很多香港人; 同其中一個港人傾左幾句,佢話同朋友一齊來冰島十日,每日都落雨,今日係最好天氣既一日... 咦! 咁我地咪好好彩?

然後問我地住宿問題,佢話要趕住去一早book好既住宿,佢地竟然係係香港一早book好晒咁多日既住宿喎! 邊日要去邊個景點,邊日又要到邊個小鎮住... 真係唔明D香港人點解咁鍾意安排好一切,包括我身邊所有人都係一樣! 何況自駕遊? 又係淡季? 有車真係唔怕搵唔到住宿啦! 可以做到揀到啱先住呀~

途中係個靚景食件包頂頂肚先~

去完冰川都成5點幾,太陽開始落山，都唔趕吓一個景點Lu... 見前面有一大片烏雲，就係就近既小村落搵到間住宿 經Esther講價後,現金價$12000-Kr 不連早餐

住宿係一間木屋仔,係一個家庭所經營; 間住宿好正，係一間獨立屋，有三間房,有廚房用，仲有一個露台Tim•••其實好想欣賞美麗既夕陽,但都係驅車去超市買餸要緊,以免關門~

於是去 十公里 外既油站超市買左D補給用品來作晚餐及聽日既早餐。$8055-Kr (HKD $ 500)
農曆八月十四迎月，飲係超市買既當地啤酒，開一個月餅食來賞月~ 起初個天都無乜雲，見到好多星同好大既月光，到飯後個月光已被烏雲所覆蓋Lu,再者今晚既極光指數係Quiet,又睇唔到極光... 飲飽食醉後都係早抖吧!