Day 10 米湖溫泉(冰島Myvatn)

(Day 10) 2012-09-30
雨
住宿：Storulaugar民宿

行程：Seydisfjörôur --> Myvatn米湖--> þingeyjarsveit




0830起床，今日天色仍然烏雲密佈及落雨，期待有幸今晚遇到好天氣,因為今日既極光指數係"Active"!食完自製早餐就出發，先去港口兜個圈,但就無野睇! 感覺進入冬季,真的好似書所講,整個冰島也在冬眠一樣呀!

今日既行程初步預計直去米湖; 沿途多雲,又大霧,有時仲落雨tim! 但秋天既冰島佈上一層金黃色,仍然很美~

去到一個小鎮,又搵到經常幫襯,相信係全國最平既Bonus超市入貨(認住隻豬嘜)

後來去到一處風景幽美既地方,一個觀賞亭開餐! 食剛才係超市用(約$30-HKD)買既大大個藍莓芝士Cake食tim~ 又於太凍太大風啦! 到係留係車內進食。

不過係呢個美景前用餐,係觀賞亭既隱閉處有一篤屎,雖然望唔到,但始終美中不足... 呢篤屎不知是人定是狗留下,我地成日都思疑係剛才到埗,就見一架車走既人有三急留下既! 當我地用餐完離去,就見另一架車緊接來到,唔知佢地又會唔會懷疑係我地痾架呢? 哈哈~

後來要經過高地,只見黑漆漆既山坡不時舖上一層白雪,黑白分明,可見溫度已下降到零度以下! 於是落車,個個都係雪上奔跑大叫一番~

翻過高地,一路下山,就見到廣闊既原野上,有好多縷縷炊煙冒起; 再駛近D,原來呢D煙霧係由溫泉水所發,即係到達米湖地區~


tim嫂~

Wiki係咁描述米湖的:

'米湖'（Mývatn）是冰島北部的一個淺水富營養化湖，面積37平方公里，位於一個活躍的火山區，距離克拉夫拉火山不遠。該湖及其周邊濕地生活着異常豐富的水鳥，特別是鴨子。約2300年前，玄武岩熔岩大量噴發而形成該湖，周圍主要是由火山地貌景觀，包括熔岩柱和無根泉。以其為源頭的拉赫（Laxá）河以盛產斑鱒（Brown trout）和大西洋鮭鱒（Atlantic Salmon）而出名。

湖名來自冰島語mý（蚊）和vatn（湖），夏天這裡有大量的蚊子。





米湖最出名除了是因冰雪封路既火山外,當然是溫泉啦! 唔使諗,緊係即刻浸溫泉啦~

但唔係見出煙既泉就可以浸架! 一定淥熟! 有警告牌架!!! 唔使錢邊有咁著數丫! 要浸都係比錢啦!

米湖溫泉每人$2500-Kr(約$160-HKD),比起藍湖要成€33-40入場費,足足平左一半有多! 藍湖個名就真係響,但係溫泉同米湖應該差不多,一樣係奶白色,只是配套豪華點吧! 如時間唔夠應該都唔專程去藍湖了! 況且我喜歡米湖既清幽,相信呢點藍湖應該無吧!

 

浸完溫泉成身暖晒,好似有個保護罩一樣呀! 於是繼續一如以往咁,驅車沿路搵心儀既住宿; 最後去到米湖近郊既þingeyjarsveit小村, 搵到間民宿Storulaugar $8000-Kr,全屋又係得我地一台客,成間屋玩晒~ Yeah~

來到冰島,除了首都,直到現在咁多日,差不多都係包晒成間住宿來住,可見冰島旺季淡季真係好分明呢~

其實來到冰島,所有熱水沐浴都有硫黃味,但呢度唔知係迷近米湖,水龍頭流出來既自來水琉黃味勁重! 好似嗅蛋咁嗅呀!

今晚晚餐,又係包起個廚房玩晒! 白酒青口,薯仔雞椎,牛油烚菜~ 冰島買既青口,真的同係香港超市買既唔同噃,零舍鮮,零舍重海水味架!!!

住宿有個私家溫泉,一定要浸個夠啦! 下午係米湖浸完,依家再浸! 係極寒冷又下雨既晚上,我倆真空著住件浴袍,騰騰震咁行出室外浸... 呼~ 熱辣辣,暖晒~

右上:睡房
左下:廚房
右下:溫泉

浸溫泉係好舒服,但來冰島主要目的係要睇極光嘛! 今晚極光指數係"Active",但整個冰島被厚厚既雨雲覆蓋,雨是沒有停下來既跡象tim... 浸住溫泉,抬頭呆呆望天,相信Active既極光係雲層上飛舞著,真是無緣... 冰島行程已過了一半,真的有點擔心...


整個冰島被厚厚既雲層覆蓋

極光呢一刻也很強烈地覆蓋整個冰島,可惜無緣...