2012年8月21日 星期二

Day 32 天空之城(秘魯馬丘比丘)

(Day 32) 2011-03-09
住宿 :不知名Hostal $50-Sol ($150-HKD)
行程 :馬丘比丘
高度 :海拔2500米




 食早餐時真係火滾! 話說尋日入住時加多$10-Sol($30-HKD)既早餐,原來只係一人一個麵包加一杯茶,邊夠食呀!!!
咁就收我地每人$30港紙! 於是出去舖頭買定D麵包一陣食,買左6個大麵包都只係$2-Sol咋! (即$6-HKD)
Hostal收咁貴仲唔係禁住搶? 返黎Hostal仲特登”樣”袋包比老板娘睇tim!


出發前好在睇一睇Lonely planet,如要入Machu Pichu,要係鎮上買定門券架! 頂! 尋日咁得閒早知買埋啦⋯ 0900到達售票處門外,已排了四、五十人,條隊唔行,睇黎售票處仲未開工噃。 隔離既旅客中心
仲主動派D投訴表格比排緊隊既遊客,叫我們寫下不滿tim!
排了成個鍾差不多輪到我時,先知道只收取Sol,成人正價為$126-Sol ($270-HKD)。 呢度真係古怪,觀光火車,登山巴士就通通收美金,入場為何費就一定收本地錢呢?真吹脹! 攪到我唔夠本地錢,要即時外出換錢!



巴士從之字超斜既路上山,其間見到有人沿梯級步行登頂,夠了…尋日行夠了… 都係比錢人賺吧! 其實都慳左好多架啦~



 今日天氣同尋日又截然不同喎! 天朗氣清,藍天白雲,果然又再一次得到上天既眷顧啦! 今次旅程得到上天三番四次既保佑,又賜給我一個好既天氣~


巴士到達入口,旅客就要步行入遺跡,經過一條小路後,由於地勢較高,大部份既天空之城遺址盡入眼簾,身旁既一個年輕遊客仲大叫Amazing! Amazing! Amazing!
唔唔唔… 踩過大部份既梯田,到過書中所講既宮殿,民居,神廟… 但我就有一種同與眾不同既感覺喎!
我會覺得… 
啊! 呢度就係傳說中既馬丘比丘拿!
啊! 原來經常係電視,書籍,相片中
所見既馬丘比丘係咁既…
唔同鹽湖天空之鏡,無左一種極度興奮,好似果位年青遊客大叫三聲咁驚訝。
一個係遺址,一個係自然景觀,當然兩者不同種類不能比較喇,可能馬丘比丘係電視,書籍及相片中出鏡率太高啦! 神秘感欠奉,再者早前沿路軌行時,都見到不少印加遺址,其實都差不多! 只不過馬丘比丘這裡被群山所包圍,建於山巔,比較大一點及完整一點吧了…
說實話有少少失望,當然每個人都有唔同感覺,我唔會因為寫blog而虛弄作假,只想記底我既所見所聞同感覺。
希望我相反既觀感,唔好令到喜歡馬丘比丘既朋友而反感喇…

行到尾聲,竟然有幾隻唔驚人既草泥馬行過喎! 唔通佢地就係天空之城既居民???
去完傳說中既天空之城,係出口處有一間房,內裡有一個馬丘比丘既印臺,我就係BNO及筆記簿上蓋了,作為到過天空之城既印記!







 


返到town已經晏晝三點啦! 之前係馬丘比丘只係食左D麵包,所以依家又係食野既時間啦~ 當然又係食秘魯套餐啦~ 價錢合理又多款式! 不過set menu個餐牌,通常都係門口先至有,引左你入去後,職員奉上既餐牌係無的! 呢D係當地餐廳慣常既技倆,睇吓你夠唔夠面皮厚問佢啦~ 食緊野期間,就正正有幾個鬼妹被坤左入黎,點左D貴野食啦!
於是係小鎮四圍逛吓,仲見尋日載我地黎既維修職員Tim~ 行左成日好攰,又要返酒店瞓晏覺先~




 

















南美獨有既動物
一瞓就瞓到旁晚時份2000,食左幾餐好野,今晚決定搵餐平民餐食先~
係平民區路經一個好大既足球場,裡面分左好多隊鬥波呀! 睇左一陣呢D街波,發覺佢地同我一樣咁水皮!
唔怪得之秘魯足球只屬南美3、4流啦,同阿根廷D街童簡直差天共地呀!!!










6 則留言:

  1. 我上次同fd plan旅行佢都話想去呢到呀
    睇你啲相又唔覺得話好震撼喎
    [版主回覆08/25/2012 16:38:19]個個人唔同,唔好比我影響到...又或者我影得差呢~

    回覆刪除
  2. 我都有少少同感。MP係幾特別,但去到睇,又無想像中咁激動。
    [版主回覆08/25/2012 16:39:01]原來都有人同我有同感~

    回覆刪除
  3. 哈,你影響唔到我,秘魯係我一定會去嘅地方。
    或者佢出名唔係佢嘅宏偉,而係佢嘅印加故事?
    [版主回覆09/03/2012 21:41:34]哈哈~ 秘魯等緊你架~
    世界上有好多個古文明,我都只係略知皮毛,真係要"不如行萬理路"來親身體驗一下~

    回覆刪除
  4. 點解唔整番D吊車呢? 我咁問真係冇乜文化.
    [版主回覆09/05/2012 13:48:08]係有建地~ 但可能會有人覺得要保持原始好D~

    回覆刪除
  5. 你說得對呀!到達天空之城後唔覺那震撼感。反而我覺得值得俾錢去行inca trail,整個過程也很好!
    [版主回覆09/11/2012 03:15:41]原來你都有同感...

    回覆刪除
  6. Petite poupee @安提比2012年12月28日 清晨6:33

    Gunaco, 同 Vicuna 有咩分别?

    回覆刪除