2012年8月14日 星期二

Day 31 歷盡艱辛(秘魯Aguas Calientes)

(Day 31) 2011-03-08
住宿 :不知名Hostal $50-Sol ($150-HKD)
行程 :Ollentanbo —> Aguas Calientes
高度 :海拔2800米


從窗口透進光線,原來已經天光,望一望電話已經6點啦! 成晚久唔久就有人係門口行過,都唔知係咪壞人,令到我提心吊膽; 而且天氣寒冷,件褸只蓋到上身至Patpat,腳部得不到足夠既保暖,成晚都凍醒; 再者雖然有張毯毯住瞓,但地下太硬太寒冷啦… 總之就瞓吓醒吓啦!



走出室外,雖然只係過左一晚,但就由尋日既陽光普照變成依家烏雲蓋頂,大霧濕氣重,而且綿綿細雨,無陽光既天氣極為寒冷呀!!!



於是一個人行返轉頭,好在唔太遠
去搵返尋晚遺失既手錶。 好在真係同想像一樣,跌係曾經小休既空地上,比我搵得返~ 今次旅程除了曾經被搶劫外,但係其他事情都真係好彩,如手提電話都兩次失而復得,今次就輪到隻錶。


返到黎見好多當地人係呢排荒屋行出黎,行去路軌方向,頭先仲諗住係門口光明正大”開大”tim! 好在無咁做!
無耐見一班車箱極殘舊既列車到達,接走晒呢班當地人… 相信呢班就係遊客搭唔到既列車,總之一句講晒,就係當地政府劏遊客啦!

終於明白為何尋晚,咁多人係門口行來行去同推門啦! 原來都係係呢D荒屋露宿一宵,以便搭呢班火車!




於是收拾行裝準備起行,見到只係有一小卡既維修車,有個職員仲主動兜我地去Aguas Calientes tim~
最後兩人共$75-Sol成交! ($220-HKD)

 







於是乘坐該工作車,行吓停吓,雨勢越落越大,途中仲上左位背住書包既小朋友,睇佢地既關係似係親人,而小朋友上車既地點,見急流既對岸有小村莊,只有一條幼幼既吊橋連接兩岸,相信該小朋友就住對岸。



其實工作車都唔算慢,但都要行個多小時才都達Aguas Calientes,途中仲見到兩個高大既遊客背住個大背囊冒雨前進Tim~ 我地好彩遇到工作車,如果真係要行,可能行多4、5個鐘先到呀! 仲要冒雨同應付寒冷天氣。




維修員的工作




又見到對岸有印加遺址



千山萬水終於都達馬丘比丘山腳既小鎮啦~ 於是搵左間不記得名字既住宿,正門就係路軌旁,房間既窗戶就對正大洪水! 經講價後用$50-Sol住一晚($150-HKD),再加多$10-Sol連早餐,不過Wifi就要每日收$10-Sol,唉…仲比佢個Wifi標誌坤左入黎tim… 緊係無再比啦! 有幾多時間真係上網丫! 於是沖乾淨涼洗晒要洗既衣服,就即時好好咁瞓返一覺先~
















由於呢兩日一夜太辛苦,一瞓就差不多瞓左成日,瞓到成晏晝4點! 就算澎湃既洪水聲,我都一樣熟睡架~
會唔會嘥左一日? 唔會~ 反正個天都無停雨既跡象! 
諗返轉頭,就算尋晚真係同佢地連夜趕路,半夜到達諗住第二朝一早上Machu Pichu,係咁差既天氣下,烏雲摭蓋整個遺址,都係只有失望的; 唔知尋日同行嗰兩啤情侶,今日會唔會上左Machu Pichu呢? 又會唔會失望呢?



經過兩日一夜艱辛既旅程,尋晚同今朝只係食左飽來充飢! 係瞓醒後當然食餐好啦~ 隔離果個唔鍾意食野既! 於是我一個人行多幾個舖位既一間餐廳,食返個秘魯set memu先!



都未係主菜,
淨係呢個叫做湯都值回票價啦!





食完又返上房揀吓相同hea吓,直至天黑夜晚8點先出動,行過近火車站既手信市集,及路經一間專營有巴士上Machu Pichu既公司,原來每日0530至1730每隔25分鐘就有一班巴士往來,於是用$15.5-USD買了定來回車票; 之後就到中心區域求其搵間餐廳食晚餐啦~















3 則留言:

  1. 3700 米,真係用幾步都氣喘。行幾個鐘,唔死都差唔多。個湯睇落唔錯,苦盡甘來
    [版主回覆08/21/2012 00:34:54]未改個高度令你誤會tim...即刻改返~
    不過都係高原過左個幾兩個星期,都習慣左高山反應lu~

    回覆刪除
  2. 坐工程車去AC都幾yeah喎~
    [版主回覆08/25/2012 16:40:10]連我都估唔到~

    回覆刪除
  3. 旅行最討厭就係落雨, 乜mood都冇晒
    [版主回覆09/05/2012 13:50:02]真係無辦法... 不過個多月旅程,又難保日日好天...

    回覆刪除