Day 25 全球最高首都 (玻利維亞拉巴斯)

2011-03-02（Day 25)
住宿 ：Hostal Tambo de Oro $100-BR
行程 ：Uyuni --＞ 拉巴斯
高度 ：海拔3660M

返到香港後,係書店見到一位時裝界達人,去完南美後出左本書,書名叫[天空之鏡] ,好奇吓緊係翻幾頁睇吓啦,一睇之下佢竟然係旱季去,只係睇到一片白蒙蒙既鹽湖... 用呢個書名會唔會有D誤導呢？



話說尋晚2000開車,整晚車程勁癲疲,早上7點零醒左望一望窗外,諗住會差不多到啦,但竟然先到一半路程既波托西喎！
波托西係全球最高既城市,有成海拔4090米,也是曾經係全南美最有錢既地方,不過係”曾經”! 因為其”白銀”既產量曾經係全球最多••• 不過依家已被搜刮一空Lu... 窮到窿！


巴拉圭既高速公路,被Lonely planet說成全南美最崎嶇，最危險既公路,坐過又無乜特別; 不過我肯定依家呢程,就一定係最危險既！ 因為遇到兩宗交通意外••• 仲有一架車跌左落河Tim!

由於遇到兩次交通意外,攪到兩次大塞車,所以呢程車好耐好耐... 係晏晝先進入拉巴斯範圍,仲要穿過一條大過女人街一百陪既市集,先去到總站呀！ 落車已經係1430啦••• 計一計呢程車超過18個鐘呀！






頭先車上所見既拉巴斯,真係一個好大既城市,而且所有建築物依山而建,遠方仲有雪山做背景Tim~ 就好似一大片既山脈上,佈上一層厚厚既石屎一樣呀！ 全球最高既首都果然名不虛傳！睇到我目瞪口呆呀！

一落車就買定聽朝,0800去Copacabana既巴士票,呢間巴士公司一日兩班車前往,下一站要去的的喀喀湖呀！Copacabana小鎮,就位於的的喀喀湖旁!


於是就係巴士總站,就近既一間住宿落腳,一晚$100-BR = $100-HKD,個窗口仲可以遠眺拉巴斯山城既全景Tim！


巴士總站

住宿