續Day 25 恐怖的巫婆市集(玻利維亞拉巴斯)

2011-03-02（Day 25)
住宿 ：Hostal Tambo de Oro
行程 ：Uyuni --＞ 拉巴斯
高度 ：海拔3660M

係酒店放低行李後,事不而遲即刻遊覽呢個全球最高既首都拉巴斯！

由於巴士總站及住宿在高地,首先行落地勢比較低既市中心,只需15至20分鐘路程就到,途中仲食左個類似”角仔”既小食,內包有唔知乜肉既餡料,大大個熱辣辣,都幾好味~




中心區域既人流真係好多,商場，教堂都遊覽過後,就前往地勢較高既Hard Rock café; 因為當時女友儲開Hard Rock 既杯仔! 不過就未開門•••

其間路經一條好古怪既街道,呢一帶全部既商舖,就似足香港賣元寶臘祝香既舖頭! 連個店主都似到足香港D拜神婆婆咁呀！

睇一睇Lonely planet,原來這裡叫”巫婆市集”呀！舖內全賣稀奇古怪東西,望落似一份份金銀衣紙既祭品,溪錢，藥水，山草藥等等••• 最恐怖就係有好多草泥馬baby既乾屍賣呀！睇落有點心寒! 相都唔敢影太多•••

見Hard Rock未開又再落山再逛多陣街囉~ 最後瘋狂購物下,一口氣買左成二百幾港紙既野呀！ 包括買比剛出世姪女用草泥馬毛做既冷衫~ 同埋係小販檔,買左隻民族音樂CD~

我發現拉巴斯真係好得意,好似一個大型市集咁,而且每個類型既商品,都集中晒成條街! 例如早前既巫婆街,就係成條街都賣呢D野！仲有花街，菜街，鞋街，衣服街，舊音響街•••
同成條街都係剪髮鋪既髮廊街等等•••

菜街

衣服街

晚餐去左Bas極力推介既Steak house据扒~ 食既係火燒牛扒! 即起菜時係你面前用火一燒,成舊牛扒著晒火! 幾秒後隨著火種熄滅,就可以開餐啦~

嘩！好美味呢~ 係入口溶果隻呀！我呢份牛扒只不過為港紙$74咋！ 而且沙律仲任食tim~ 真係抵到爛呀！
我諗香港食呢餐,起碼超過三百蚊呀！估唔到係全球最高既首都,可以品嘗到人生中最美味既牛扒~

食完美味既牛扒,已是晚上8點幾,天都完全黑齊喇！ 入夜後既拉巴斯依然咁旺,人流一樣好多！

於是再一次好辛苦咁,行返上去Hard Rock,都仍然從門深鎖••• 問個警察都係指住呢度無去錯！ 不過就雞同鴨講唔知講D乜! 唯有當佢執左笠囉•••

嘩!!! 上上落落真係好鬼攰呀••• 拉巴斯係高原城市
依山而建,所有街道都係斜路,我諗我一生人都未行過咁多斜路架！ 而且仲要係海拔三千幾米,真係好喘氣架•••
最後落完斜路穿過中心區域,又要上返斜路先返到酒店呀•••

酒店窗口影既拉巴斯夜景