Day 17 慢遊首都(巴拉圭阿松森)

(Day 17) 2011-02-22

住宿 :Centro Hotel $ 110000 Par ($180-HKD)

行程 :Asuncion(巴拉圭首都)

今日絕對係來南美以來最悠閒既一天，先早起食完酒店包既早餐，然後再瞓過，一瞓就瞓到成1300先起身呀~

今日唯一既行程，就係慢慢徒步暢遊，呢個被遊客所忽略既國家，巴拉圭首都”阿松森”

先去酒店對面巴士總站，搭係巴拉圭既超殘超古老大巴去市中心(同我之前去馬耳他見既巴士一樣) 不過呢度既巴士每一架都油上不同既花樣，花呢花碌~

睇黎我上左架係兜爛路既路線，櫈到甩肺!!!

可能已經玩左半個月，覺得南美大城市既景色處處都差不多，就係充滿西班牙殖民地既色彩，只是阿松森有點兒殘舊吧~ 我諗係巴拉圭比較窮…

來左半個月，一樣既殖民地色彩有D睇到無晒感覺，不過最有興趣係呢度既特色巴士~

先係市中心既邊緣近貧民窟落車，行經一個地道一點既市場

午餐

 

然後就睇地圖逛市中心，用兩個零鐘基本行得晒中心區域，真係有如Lonely Planet所講，貧民窟既爛木屋同現代既高樓大樓只係一街之隔，做成強烈對比!

貧民窟沿河而建，河既對岸就係阿根廷啦~ 原先就係計劃諗住係度渡河過境架! 不過入到阿根廷都要兜好多路先可以到玻利維亞，依家發現有車直到阿根廷北部，當然唔選擇渡河啦!

巴拉圭天氣實在太潮濕太熱啦!!! 而且勁多白蚊伊蚊，Lonely Planet話貧民窟既木屋，就係帶有登革熱既白蚊伊蚊滋生既溫床呀! 所以巴拉圭係登革熱極度高危既國家我緊係塗晒蚊膏啦~

遠距離zoom埋去...唔敢行近呀!!!




對岸就係阿根廷喇~

於是前往中心方向，途徑教堂, 廣場, 政府大樓等建築物

見有人set腳架影相喎!!! 治安都唔係其他人講得咁差啫~

去到近憲法廣場有個專賣紀念品既市集，想買之際原來唔夠當地錢喎… 去ATM攞錢，完成過程後竟然無錢出話故障喎!!! 我怕就緊係無錢出但又扣左數啦! 當時銀行已經過左辦公時間關左門，好在裡面仲有職員，佢好唔願意之下先出黎了解，當然係雞同鴨講啦… 大家用埋身體語言加埋靠估情況下，應該係無扣錢，咁我都放心D…

銀行雖然過左辦公時間，但門口仍然有得黑市換錢，換返多少旁吓身先~

換完錢又有另一個問題，就係肚痛好想拉屎! 靠身體語言問路下，係英雄廣場既地庫公廁攪掂，當然廁所要入場費啦! 加送廁紙~

殖民地遺物, 今時今南美日已經好少地方仲有電車行Lu...

今日天氣陽光普照，再一次証明上天是眷顧我的，因為尋晚搵到酒店後先狂風暴雨，到今日行街就天氣晴朗~ 不過巴拉圭天氣既變化也真係好大呀! 下一個鐘都唔知係乜野天氣!

原來出發前訂下來到南美，要瘋狂食牛排既目標，只可係巴拉圭實現另咋!!! 晚餐又係酒店食牛肋骨，勁正呀!又係記住賬先，退房一次過計~