南美之旅...出發!

突然一口氣咁清左斐濟同長灘島之旅，就係唔想越積越多，依家只剩低馬耳他…

因為就黎要寫南美之旅啦~ 真係唔係有D推動力都懶懶閒既…

原本對南美既興趣並不是太大，就係因為埃及朋友醬爆，係facebook Post左一段由日本電視台NHK拍既天空之鏡短片
，我就係同其他睇過呢段片既人一樣，對呢個仙境般地方趨之若驚! 於是專登安排呢個行程，為當地既雨季二月，先至可以睇到天空之鏡既奇景!

一開始plan行程撞正Lans有新航線，由Lima去復活節島，而且有promotion，來回只係2千零港幣咋!!!

而上網搵資料時得知，由聖地牙哥前往復活節島既機票極其海鮮價，普遍為4至5千港幣!!! 咁唔使講,扑左椎先算啦!!! 所以呢個南美之旅乜都未plan，就先買左程內陸機!

起初plan行程，Plan plan 吓南美變左plan去南極! 就係因為其中一個blog友係網上講過，南美呢D地方，對於我地呢D身處香港既人黎講，機票又貴，又要浪費左來回共4日既機程，咁辛苦先可以去到，一係就唔去! 一去就緊係盡玩啦!!!

全世界最南既城市烏蘇懷亞就係阿根廷，亦都係主要出發前往南極既港口，既然路經緊係諗住去埋啦!

不過由於要遷就船期同價錢覺得好唔抵既問題，先打消呢個念頭… 因為南極係一年裡，只有11月至3月先有船前往，而農曆新年期間就係去南極最貴既時間，返而係聖誕時既一倍呀!!!

呢個一倍唔係講緊幾千蚊，係講緊幾萬蚊港幣呀!!! 所以今個南美行程，並唔包括全世界最南既城市，因為我總有一日要係呢度出發去南極!!!

而今次既行程，係我之前去咁多次旅行，準備最多既一次! 因為要安排內陸機,闖關,打防疫針等等… 唔輪到你唔準備!

內陸機買晒係行程既頭段及尾段，方便行程安排!

攞BNO都幾經辛苦，因為入玻利維亞要用BNO闖關，所以過左18年期既BNO要去續期，由於過左期太耐啦… 比人問左超過半小時，仲要全程英文tim!!!

出發南美第一時間就係諗到打黃熱病針，於是就預約衛生署醫生，諗住淨係打枝針會好快，原來見醫生時佢會仔細咁了解我地行程，比D意見我地； 雖然醫生佢未去過，但對當地既環境十分熟悉，可能佢每日就係聽無數次南美既行程，唔熟都變熟啦!

於是接受醫生建議，拮左4針，就係霍亂,黃熱病,傷寒及甲型肝炎，膊頭都痺左幾日… 仲開左D高山症藥，叫我地到2500M就要開始食啦~

而南美之旅我相信係最最最辛苦既，因為依家講緊既係成個洲，並唔係一、兩個國家，長途巴士閒閒地坐十個八個鐘! 不過旅行Timeing唔錯, 早個零月前，湊大我最鍚我既嫲嫲剛過左身，正正就係要呢D咁辛苦既行程，來磨練吓自己，來散心…

2011年2月6日大年初四，即係今晚! 開始42天既南美之旅~